(17) 東窗事發
 
 


自從Johnny爸媽知道佢哋拍拖,佢哋有時間拍拖都係去Johnny屋企…
 
因為媽媽接受Chloe,所以成日叫佢上屋企食飯。
 
「雅兒,飲湯吖。」媽媽攞碗湯俾Chloe,Chloe講:「唔該呀姨。」


 
「叫呀姨怪怪哋。」媽媽講:「叫我auntie喇。」
 
媽媽咁講即係將Chloe變咗另一身份,以佢係個仔女友看待,Chloe明白用意所以好開心。
 
此時爸爸挾舊雞俾佢,Chloe講:「唔該uncle。」
 
Chloe話頭醒尾,媽媽對於哩個未來新袍好滿意。
 
Chloe同Johnny講:「食快啲喇,夠鐘開場喇。」


 
「係喎。」
 
佢哋買咗飛睇戲,就快夠鐘所以兩個急急食飯。
 
食完飯後急步去戲院,因為Chloe着高踭鞋所以行唔快,Johnny就拖住佢行。當去到燈位時綠公仔閃燈,代表就快轉燈。Johnny行得快啲,一過完馬路Chloe講:「行到咁急,隻腳痛嫁。」
 
「邊隻呀?」Johnny望住Chloe黑絲,Chloe講:「你望邊度呀?」
 
「妳隻腳囉。」


 
「你望黑絲多過望腳喎。」
 
「黑絲唔係响隻腳咩?」Johnny奸笑:「奇怪?」
 
「哈哈,淫蟲!」Chloe想打佢,不過雙手俾Johnny捉住。
 
「我係淫,都係淫妳一個…」然後錫落Chloe個嘴。
 
一錫嘴,就有人拉開佢。
 
「你做咩錫我個女!!」
 
好惡嘅聲線鬧Johnny,一睇…
 


佢就係Chloe爸爸老六!
 
「爸爸,我…」Chloe想解釋時老六舉起手掌想星把佢,媽媽見到就制止佢:「老豆,唔好嘈喇,有咩返去先講喇!!」
 
「好呀!!我都想知老麥個仔做咩錫我個女!!」老六惡啤Chloe、Johnny,然後行咗去。
 
佢一行,媽媽、Chloe、Johnny都跟住行。
 
行緊時Chloe講:「陣間我開口,你唔好出聲。」
 
「哦,妳小心啲呀。」
 
Chloe微笑點頭。
 
無幾耐就入到屋,一入去老六發哂脾氣:「你哋頭先當街當巷做乜嘢?」


 
「無咩嘢…」Chloe一講,老六打斷說話:「妳哋打哂車輪都話無嘢!!」
 
「我哋…」Chloe原本想講佢哋拍拖,不過見到老六咁就睇定啲先。
 
「點呀,講唔出口哩!!」老六轉望Johnny:「你做咩非禮我個女!!」
 
「我無非禮呀。」
 
「無非禮,即係我個女自願呀!!」
 
「Johnny係我男朋友…」Chloe出聲:「我哋拍拖…」
 
「妳係佢表姐,同表弟拍拖咁賤格!?」
 


老六鬧Chloe賤格,Chloe聽到好嬲!!
 
眼眶都濕濕哋。
 
「係你個衰仔搞我個女喇!!搞亂倫喇!!」老六攞電話出嚟:「等我報警拉你!!」
 
老六正想打時,電視機播出粵語長片…
 
「婉君表妹,世伯已經接受咗我哋婚事。」
 
「家明表哥,我哋終於可以一齊喇。」
 
咁啱播出哩一段推翻老六說話,更加激嬲佢!!
 
「閂咗部死人電視!!」媽媽即刻去閂。


 
「就係哩啲電視教壞哂!!」
 
「你係貪我個女靚,所以搞佢喇!?」
 
「唔係呀,我鍾意雅兒唔係貪佢靚嫁。」雖然佢出發點係俾Chloe靚樣吸引,但係哩個時候無理由話係貪佢靚。
 
「咁即係貪佢有錢喇!!」老六對Chloe講:「我1蚊遺產都唔會俾妳呀!!」
 
「我只係同天華拍拖,點解要鬧我賤、又要打我!」Chloe喊住講:「我係妳個女嚟嫁!!」
 
「同表弟拍拖咁賤,我無啲咁嘅女呀!!」
 
老六講話無啲咁嘅女,Chloe即時跑入房大聲喊。
 
「嗚…嗚…嗚…」一邊喊一邊執衫,Johnny都跟咗佢入房。
 
「嗚…嗚…」Chloe:「點解要咁…」

媽媽見Chloe執衫,就同老六講:「老豆呀…」
 
「妳唔駛幫口!!」
 
老六講完,Chloe就抽咗一個行李喼出嚟。文進知道Chloe要走,就走上去捉住佢隻手:「家姐,妳想去邊呀?」
 
「我…我…」Chloe喊到講唔到,老六就鬧:「走就尤佢走!!唔好理佢!!」
 
「爸爸呀。」文進都開口,Chloe講:「我而家就走!!」然後拖住行李行出去,Johnny自然陪佢走。
 
「嗚…嗚…嗚…」Chloe喊唔停,Johnny就帶佢返去,同爸媽講出件事。
 
「都話老六古板喇,唉。」
 
「咁雅兒妳响度住,老六果面等我哋應付。」媽媽講完,Chloe點點頭。
 
「我哋間屋唔大,妳瞓天華間房喇。」
 
呀爸,你想講我瞓廳,同Chloe分開瞓?
 
「爸,我會照顧Chloe。」Johnny幫手搬Chloe個喼入房。
 
「Chloe,响度住住先。」 Johnny講:「等姑丈無咁嬲果時再去同佢傾。」
 
Chloe索索鼻水,抹抹眼淚點頭。
 
「無事。」Johnny攬住佢:「有嘢我同妳頂。」
 
同我頂…
 
Johnny講同佢頂, Chloe就諗起佢細佬、佢呀爸都強烈反對…
 
點解?
 
 Chloe去咗Johnny屋企住,同Johnny一齊瞓,經常見到Johnny爸爸媽媽,佢哋都當Chloe係新袍…
 
而家就好似結咗婚咁。
 
「 Chloe,我哋算唔算同居?」
 
「算呀。」 Chloe講:「不過我覺得似嫁咗俾妳。」
 
「係?」Johnny好開心:「老婆!」
 
「咩老婆呀,我未嫁喎。」
 
「妳都話似嫁咗俾我喇。」
 
「等你有經濟基礎先喇。」Chloe講:「到時樣樣都係錢,夾硬嚟唔好。」
 
「好,我應承妳儲錢搵錢。」
 
聽到Johnny咁講,Chloe感到欣惠,錫咗佢一啖:「咁我等你。」
 
有一日Johnny、Chloe一齊返嚟,當入到屋時見到Chloe媽媽。
 
「媽?」Chloe見到媽媽有啲突然,佢媽媽講:「知道妳响度,所以嚟見妳…」
 
「我知妳辛苦喇。」媽媽攬住Chloe,一攬就搞到佢喊。
 
「傻妹,唔好喊。」
 
「嗚…嗚…」
 
「老豆果日係好惡,其實佢係錫妳。」
 
「錫…我…」Chloe講:「佢鬧我賤…打我…」
 
「妳都知佢份人喇。」媽媽講:「妳走咗,佢日日都苦口苦面。」
 
苦口苦面?
 
佢會?
 
Chloe感到意外,媽媽講:「俾啲時間佢接受。」
 
Chloe望住媽媽,點點頭;媽媽同Johnny講:「你要好好照顧雅兒,唔好再俾佢喊呀。」
 
「知道,我會好好照顧雅兒。」
 
Johnny拖住Chloe,向佢作出承諾。
 
 
 
                                                (17)東窗事發---完