因為EX 我成為左一個禿頭嘅毒撚 然後遇到一隻猫: 1. 因為EX，我成為左一個禿頭嘅毒撚

某日，一間人頭湧湧，燈火通明嘅居酒屋內。
 
「Bryan哥，見你IG又換左畫喎，今次仲要係後生妹，又係app識架?」飲左兩杯阿偉突然搭住Bryan膊頭同佢講。
 
「係呀，幾日前夜晚約出黎遊車河，見佢後生又高質，有得食無理由唔食架嘛，點知食完後發覺又幾岩傾喎 ，咁咪試下一齊囉~」高大靚仔嘅Bryan一副春風得意嘅樣子說。
 
「咁你條舊女呢?」另一位男仕阿釗問道。
 
「分左手啦~ 都三個月咯，本身都差唔多夠期，再唔散感情就開始降溫架喇，咁不如係大家最開心嘅時候完結，留返個最美好嘅回憶比大家啦~」Brya用專家嘅口吻答道。
 


「厲害，我地個個都結晒婚變晒三十幾歲嘅中年老坑，係得Bryan你仲可以咁有青春活力keep住換女，真係唔叫你一聲大佬都唔得~」阿釗對Bryan豎起了一隻手指公。
 
「大家選擇唔同啫，你地個個衣家有晒家庭都好幸福呀~ 其實我最無諗過係連阿祖都重新振作成功脫毒，前年仲結埋婚。本身我諗住你會同我一樣，衣世都唔會結婚架嘛~」Bryan講到一半就突然搭住另一個男人膊頭講。
 
「你唔好串阿祖啦，人地老母做到野呀，見個仔單身做左毒撚咁耐，幫佢相體仲搵到阿嫂，衣杯我地一齊敬阿祖老母~」阿偉見狀立刻贈興附和。
 
 
我就係佢地口中嘅阿祖，史德祖。正如上述對話所講，我已經係一個三十幾歳已婚嘅老坑。而大家頭先之所以要敬我老母一杯，係因為三年前，阿媽為單身左已經十年嘅我搵左個相體對象，而係兩年前我仲同衣位對象結埋婚添。大家係咪咁就覺得我衣家過得好幸福? 其實我都唔知自己算唔算幸福。又或者等我好快咁同大家講下我嘅故事，再交比你地去話我知答案?
 
係識到我衣家個老婆阿敏之前，我其實過左好頹好毒嘅十年，所以亦單身足十年。而之所以會攪成咁，都係多得我嘅初戀女朋友Grace。我同Grace係中學同學，中三果年正式係埋一齊，一直都好好，直至上到大學二年級，佢因為第二個同我講分手。雖然無啦啦戴左朵綠帽，但果陣嘅我出奇地無嬲，反而只係因為好唔想失去Grace而不斷苦苦哀求佢唔好離開我同返我一齊。可惜Grace並沒有答應，更覺得我嘅行為好幼稚好無男子氣慨，最後連朋友都唔願再同我做…


 
果陣嘅我大受打擊，傷心欲絕，完全封閉左自己成個人… 而更不幸嘅係除左我心境急速衰老外，我嘅外觀都深受衣樣野影響而衰老埋一份。由於長期荷爾蒙失調，我由一個頭髮濃密，體型健碩嘅型男，慢慢變成左一個禿頭爛面嘅死肥佬。亦因為咁，自信全失嘅我逼住踏上左毒撚同宅男衣條一去無回頭嘅不歸路… 基本上除左返工同間中會同頭先果幾位老死仲有聯絡，平時嘅我都只會匿係屋企打機同睇動漫，甚少出街見人，更勿論識女仔啦…
 
老母見我變成咁其實都好傷心，話過我好多次想我振作，不過我就一直都無理佢… 直至3年前，佢終於頂唔順，決定幫我搵個相體對象。初時其實我都繼續唔理佢，但見到佢突然係我面前爆喊，最後仲跪埋係度求我去，我先終於意識到咁多年黎其實除左我傷心，我老母都同時因為我而擔心同傷心，為我而心痛...  
 
敵不過佢嘅眼淚攻勢，加上我老豆早死，一直其實都係得我同老母相依為命，所以我都醒悟覺得自己或者都係時候要盡返個做仔嘅責任，於是最後都為左佢去左衣次相體。
 
相體嘅對象叫李思敏，即係我衣家嘅老婆。坦白講，佢個樣貌唔算差，不過身型就有170磅。初次見面我對佢絕對談唔上有感覺，但講真自己衣家個樣都唔係好，難得對方算順眼又唔介意自己外表，為左安老母心，所以我就繼續嘗試同阿敏接觸。
 
而說也巧，隨住大家開始傾偈交心，我知道左原來阿敏嘅情況同我差唔多，都係單身左好耐唔想阿媽再擔心先參與左衣次相體。而有感大家年紀都唔細，溝通上又似乎都算岩嘴型溝通到，加上大家都唔相信自己將來會有另一段姻緣出現，所以無耐大家就決定做對孝順仔女安父母心，一年後索性簽字結婚。


 
結婚後，其實大家除左住埋一齊外都無咩特別。與其講大家係夫妻，我覺得用同居嘅朋友黎形容會更為貼切。基本上阿敏有做足人妻嘅本份，每日都有買好餸煮好飯大家一齊食，而我則主要負責家務嘅部份。除左食飯時間，大部份其他時間其實我地都係各自係唔同嘅地方去做自己鍾意做嘅野。例如我洗完碗後會去書房打機，而阿敏就會返睡房煲劇。
 
不過人非草木，孰能無情? 隨著大家相處嘅時間越黎越耐，除左習慣左有對方嘅陪伴之外，慢慢大家對大家都會產生左感情，就係結左婚半年後嘅一晚，唔知係感情增長定係因為各自有需要，我地終於第一次好自然咁成為左真正嘅夫妻。而果晩之後我覺得我地嘅關係比以往多左少少親切感，大家亦好似更加著緊左對方。撇除各自metime嘅時間外，有時我開始會返睡房玩手機，而阿敏則間中會不自覺咁挨住我膊頭繼續煲劇。
 
我其實唔清楚衣種感覺係咪叫愛情，但我知道慢慢佢已經唔再係我同居朋友咁簡單，就算唔係愛情，我地之間都已經有某種親情產生左。而衣種情感竟令我本已經入土為安左多年，早已化為一潭死水咁嘅心境慢慢甦醒。我開始記返起有感情嘅感覺係點，記返起原來自己都有權利去愛人同埋被愛。
 
跟住衣年半嘅婚姻生活我同阿敏都維持係相敬如賓嘅相隨模式，可以話完全無半點激情但卻又唔係全無感情。或者我地算係間中有親密行為嘅同居密友? 但無可否認，我地對衣家衣種平淡嘅相處方式都感到十分舒適自在，完全無違和感。所以你問我我都講唔上到底衣家嘅自己算唔算係幸福... 不過有一樣野我可以肯定嘅就係衣家點都一定比之前果十年嘅毒撚生活幸福。