因為EX 我成為左一個禿頭嘅毒撚 然後遇到一隻猫: 2. 心癮
「返黎喇?」阿敏見到我同朋友飲完酒返到屋企後講。
我:「嗯… 你仲唔訓?」
敏:「煲煲下劇就唔知時間… 你好大陣酒味喎，飲左好多?」
我:「係呀，耐無見佢地唔覺意就飲多左…」
敏:「最緊要開心~ 咁快d去沖涼然後訓啦。啊，廚房仲有碗湯我一陣叮返熱你沖完涼飲埋先訓啦~」
我:「唔駛啦，我一陣自己去叮得架喇，你都唔好再煲劇快d訓啦。」
「知道~」阿敏露出一個微笑應道。
“灑”
花灑溫暖的水流讓本身已經因酒精而昏昏欲睡嘅我精神為之一振。而當搽搽下皂液時，我突然諗起頭先Bryan新女朋友張相，名乎其實天使嘅面孔，魔鬼嘅身材，我不禁暗暗羨慕起Bryan，然後小祖不自覺咁竟然起左反應。生理上嘅渴求令我有諗過立刻用手解決，不過明明自己已經有老婆，而且諗住人地個女朋友黎打飛機感覺又唔太好，所以我好快打消左衣個念頭，然後快快手沖埋個涼就離開左浴室。
當我沖完涼飲埋湯返到房時，阿敏已經訓著左。我知佢其實早已經好眼訓，只係唔放心我仲未返先格硬死頂等我返黎。望住佢嘅包包面同埋頗為龐大嘅身軀，我心裏有股暖流嘅同時，心入面又同時有種悵然若失嘅感覺。岩岩升起嘅欲火，原來已經被眼前嘅畫面所撲熄。不過當我嘆完一口氣正打算上床訓覺果陣，突然又有急屎嘅感覺。於是我拎起左個電話又急急腳咁返返去廁所。
「呼~」
感受到大量嘅毒物從身體裏面排出體外，我舒服得忍唔住呻吟左一聲。然後，我又諗起Bryan同埋佢嘅新女朋友。
(其實Bryan都係同我一樣大啫，佢有market，話唔定我都仲有? 未必個個女仔都睇樣嘅…) 我自己安慰自己咁諗。
記得佢有講過近排玩嘅交友app好似叫Heymandi (HMD)，而衣個app最大賣點係唔駛upload自己嘅相，所以非常適合我。於是我順手拎起個電話download左我人生第一個交友app。
(咦，要打句topic? 打咩好呢?)一入個app，做完簡單setting佢就要你打句野介紹自己。
“中年男性，搵人傾偈”
胡亂打了一句後我就開始睇下有咩女仔可以match下。
(外協? 走甜? 人地? FWB? SL?)
突然間我發現左好多我睇唔明嘅terms，不過衣刻嘅我並無心情深究，然後見襟左十幾個人都無人accept自己，失望之餘屎又屙得七七八八開始眼訓，於是我就放低左個電話，快快清潔完後就返返入房倒頭大睡。果然毒男就算排完毒後都仍然繼續係毒男。
第二朝訓醒已經唔太記得琴晚自己做過d咩，而再諗起衣個交友app就要等到兩日後返工果陣，一次係電話搵app嘅時候突然睇到HMD個icon。
於是心血來潮開始上網搵下果d 詞語嘅意思。
(原來外協即係外貌協會睇樣，走甜即係走sex，人地即係人地男/女朋友…)
睇完衣堆解釋，我先明白自己原來真係有幾咁out date，然後我又好奇開始睇下HMD 入面其他男性通常會打d乜。原來唔少會打自己身高體重，有d又會寫明自己係自住或者車巴。於是我將自己嘅topic換成左另一句。
“30+，人地，176，傾偈”
果然之後除左多左人accept自己外，間中亦會有人invite自己。興奮嘅我霎時間立刻開始左同幾個唔同女性嘅對話，有左種少男回春嘅感覺。
「Hi，人地做咩玩app呀?」
我:「無呀，悶想搵人傾下偈。」
「同女朋友有問題?」
我:「我都唔知… 好似好平淡咁…」
「一齊左好耐?」
我:「都兩三年喇。」
「明白，其實我都係人地…」
我:「咁點解你又玩app?」
「都係想搵人吹下水，我唔係想搵男朋友或者sp果d架…」
我:「所以你同男朋友有問題?」
「少少啦。」
我:「想唔想搵人傾下?」
「其實我有少少沉左另一個人…」
我:「咩人?」
「都係衣度識嘅，傾左一個月見幾好傾就約左出黎，然後就做左SL…」
「咁你地一齊左幾耐?」我好快上網serach完咩係SL後答。
「都一年喇…」
我:「男朋友無發現?」
「無啦，而且佢都有女朋友，所以我地都盡量低調。」
我:「成年咁耐，咁都幾犀利喎…」
「不知不覺就咁耐，所以咪有感情投放囉…」
雖然我係毒撚，但主要都係因為我對自己外觀果種自卑感形成。係app衣d唔駛出樣唔駛面對面嘅情況下，我嘅溝通能力係完全無問題。而衣段自己係交友app嘅第一段對話，好似真係印証左衣個app入面真係好多人偷食同埋有好多選擇咁。
不過正當我以為自己都有機會好似Bryan咁同其他靚女發展下嘅時候，好快我就發現左一個致命嘅問題。
「換相?」
隨住同越黎越多人傾偈，衣兩個字亦出現得越來越頻密。原來好多相對岩傾嘅女仔，之後都會提出換app換相，然後先有可能會再約出黎，佢地話中伏中得太多喎… 但毒男又點會影相? 每次一到衣個位我都好猶豫同掙扎，因為我知衣家嘅自己有幾樣衰同幾趕客。佢地所講嘅中伏，我深信就係講緊見到我衣類人。
不過醜婦終需見家翁，避得初一避唔到十五，無得揀下我最後都係本身就選擇唔多嘅情況下揀左張影得自己稍為算好嘅近照send左比佢地，然後我發現十個有八個會即quit同block左我，淨返兩個就會較有禮貌咁講句sorry然後先block。
其實都試過有一次有個肯唔換相就約出黎見嘅對象，但最後佢並無出現。而失望嘅我事後諗返，或者佢其實唔係失約，只係因為黎到遠處見到我個樣後就已經比我嚇走左。我之所以會咁諗係因為睇返佢quit同block我嘅時間，正正係我等緊嘅時間... 我諗佢之後都會周圍同人講自己中過伏，然後以後都唔敢再唔換相就約出黎… 而可能因為咁，我就扼殺左另一個毒撚約女仔出黎嘅機會。
為左引証係咪純粹係我個樣嘅問題，我之後試過cap左Bryan IG嘅相扮成係自己嘅相，效果果然立竿見影，好快我就換到唔少同我傾偈女仔嘅相。雖然好多可能係照騙，但感覺至少有一半外表其實都唔錯絕對可以接受。
不過咁又點? 用假相之後就算佢地主動約我出去，我都無可能用真面目出去見佢地…於是玩左app兩三星期後，我就知道憑我衣家副尊容，係永遠都無可能好似Bryan咁搵到其他女仔一齊…
其實單身十年嘅我本身早已經對愛情無左幻想，生理需要亦都早已習慣自己用手解決。但先係阿敏令我沉睡多時嘅情感觸覺慢慢復甦，然後Bryan嘅風流經驗又令我對自己嘅可能性多左幻想，加埋衣幾個星期同左好多唔同嘅女仔傾偈，所有野都更加直接令我被對愛情的渴求所吞噬...
期待與現實的落差令我一時接受唔黎，個人變得又灰心情又差，加上返工玩app咁岩被老闆見到比佢鬧左一大餐，仲串我咁嘅樣邊度會有女仔睬我。種種情緒累積令我突然失去左理智，一時意氣就炒左老闆魷魚。其實好快我就已經清醒返，只係後悔已經太遲。而當我渾渾噩噩咁離開左衣間自我畢業後就一直做到衣家嘅公司再有返意識，我發覺我竟然已經去左郊外一個湖邊，而衣度其實係我細個成日唔開心都會黎嘅地方。