因為EX 我成為左一個禿頭嘅毒撚 然後遇到一隻猫: 5. 壁報比賽(一)
「因為今年係奧運年，黎緊學校會攪個壁報設計比賽，題目係宣揚運動。我想搵兩位同學主力負責，其他同學協助。有無人主動想幫手?」有日早會堂班主任Miss Lam突然提出。
原先一如正常的香港學生並沒有任何人舉手，不過眼見無人主動認投，Grace亦一如以往自動請纓。
「唔該晒你呀Grace，本身如果無人舉手我都諗住提議你，因為你畫畫真係好靚，實幫我地加唔少分~ 除左Grace仲有無人肯幫手呀? 男同學呢?唔係好多男同學平時鍾意打波踢波架咩?」Miss Lam對住Grace笑笑口讚左佢一句後就開始問其他男同學。
見到Grace舉手其實我已經有d意動，再加上Miss Lam最後一句說話，於是我就膽粗粗咁舉起左自己隻手。
「史德祖? 都好，老師知你都有玩開運動平時又咁精靈應該會有d idea可以比到。咁就麻煩你地兩位喇，有咩需要協助隨時可以搵我。」Miss Lam見我舉手初初似乎有d意外，不過之後應該諗起我都係校隊成員就無再懷疑d咩。
就係咁，我得到左可以同Grace單獨相處嘅機會。不過係我都未諗好點同Grace開始探討衣個壁報設計果陣，佢已經好有效率咁係之後嘅小息就主動黎左搵我。
「史德祖，你初部有無咩諗法? 或者我地衣兩日各自諗下點設計，然後後日放課一齊留低傾一陣?」
「好…好呀…」無諗過平時口齒靈利嘅我見到Grace後竟然會突然變得口窒窒。諗返起，衣次好可能先係我地兩個第一次正式交談。
「咁後日見啦~」好彩佢無點在意講完後就拎轉頭離開了。
而係兩日後嘅放學時間，當其他同學都全部走晒後，班房就只係剩低我同阿Grace。
「點呀史德祖，有無咩提議?」Grace主動問我。
「我都有諗過下，不過或者你講先? Lady first嘛~ 同埋唔好叫我全名咁生外啦，叫我阿祖得架喇~」今次有左心理準備，我自然無再口窒窒，而第一步首先就係嘗試拉近我地嘅距離。
「好啦阿祖，咁你都叫我Grace啦~ 我其實都無咩特別idea呀，諗住搵十樣八樣奧運最受歡迎嘅運動然後將佢地整係壁報。一d 好common嘅運動例如游水田徑我地可以搵同學嘅相，一d 比較複雜無得搵同學影相嘅例如劍擊，舉重衣d，我地就用紙畫出黎代替，你覺得點?」Grace開始提議。
「Idea係幾好… 不過咁會唔會太普通? 可能班班都係大同少異…」但Grace嘅Idea我相信同大部份其他班諗嘅無咩分別。
「都係嘅… 本身我係諗住整得靚d去突出自己。咁你係咪有其他idea?」Grace反問。
「我份人比較鍾意玩… 所以我諗緊可唔可以整塊可以比大家一齊玩嘅壁報?」我講出我嘅構思。
「可以比大家一齊玩嘅壁報? 即係點?」Grace唔係太明。
「嗯…例如整個籃球架係壁報，咁咪可以比同學射下籃? 不過如果淨係籃球又太普通，所以我諗緊可唔可以加一d比較冷門無咁出名嘅運動項目，咁一方面可以當介紹下佢地，一方面又可以比同學無聊果陣玩下，咁大家就更加投入啦~」我再解釋。
「衣個提議係幾好喎，但有咩冷門運動會岩?會唔會太複雜同埋老師會唔鍾意?」Grace似乎有d疑慮。
「其實我已經諗左幾樣比較可行嘅運動。冷門嘅我地可以整射擊同埋射箭，我地只要整個靶同埋搵D小朋友玩果d膠箭同埋膠槍就得。熱門嘅我地就整籃球同埋乒乓波，前者係籃球架，後者我地可以cut個人型嘅膠板反彈返個乒乓波，我地將個人型膠板畫到成個人拎住塊乒乓波板咁，學生要將個波打中佢塊板個位置先叫成功，然後睇下可以猜到幾多板，越多越勁~」為左可以impress阿Grace，之前兩日我都有認真諗下壁報設計嘅事，而到講出黎衣刻，我自己竟然講講下都越講越興奮。
「聽落又好似幾好玩喎~」Grace亦漸漸受我影響被我帶動。
「事不宜遲，我地快d畫好個簡單構圖然後搵Miss Lam傾下啦~」打鐵要襯熱我立刻提議開始行動。
Grace:「好!」
於是我同Grace就開始埋手設計整個壁報嘅構圖以及所需要嘅物料。由於佢嘅畫工實在太厲害，所以基本上都係我講佢畫。然後係太陽差唔多落晒山嘅時候，我地終於將個構圖完成。
「終於攪掂! 聽日可以比Miss Lam 睇下lu~」完成後我忍唔住歡呼一聲。
「我有信心佢實ok 嘅~」睇得出Grace都整得好開心好滿意。
「希望啦… 嘩，原來好夜喇，我地快d走返屋企啦。」我望一望出面嘅天色再望一望自己隻casio手錶先發覺原來已經好晏。
Grace:「係喎，咁我地快d執野先…」
「係呢，你其實住邊頭? 果次係巴士見到你嘅?」執執下Grace突然問我。
我:「我住官塘呀，所以平時都係搭16號返屋企。」
「我住九龍灣喎，所以都係搭16號! 但點解平時唔見你嘅?」Grace好奇問。
我:「你平時係咪通常一放學就返屋企?」
Grace:「係呀，好多時都趕返去學琴，有時會去補習社但之後就會搭地鐵。」
「咁唔怪得啦，我從來都唔會咁早返屋企，一係就去球場打波，一係就同同學吹下水周圍行下街，上次係咁岩唔舒服所以先早返去咋…」我解釋道。
Grace:「原來係咁~ 咁我地一陣可以一齊返屋企喎!」
「係呀~」我心入面正求之不得可以同Grace一齊返屋企。
執拾完後我地就一齊行去巴士站等巴士，再一齊搭巴士返屋企。而係衣短短一個鐘入面，我終於可以透過直接接觸Grace而真真正正咁認識佢衣個人。原來Grace嘅家族係教育世家，父親係教育局嘅高官，母親則係某校嘅校長，難怪家教甚嚴，又令佢學得多才多藝。平時屋企對佢嘅言行舉止都好嚴格，又搵左名師上門教佢畫畫、鋼琴、小提琴同補習，所以佢平時放學多數都係直接返屋企或者去補習社。
不過作為教育界嘅中流砥柱自然亦明白社交嘅重要，所以佢父母並唔會禁止佢同其他同學接觸，相反仲會鼓勵佢參與多d課外活動或者組織好讓自己可以同其他人多d正常交談相處。唔問唔知原來Grace係參加左學校嘅管弦學團同埋劇社。只係前者一星期先一次練習，後者則不定期先有活動，所以衣d團體都無佔用佢太多嘅時間。
「咁你呢?你屋企有咩人?平時有咩做?」
係佢講完好多關於自己嘅野後就問左我衣個問題。而同佢相比下，我都唔知可以點介紹自己。因為我地嘅距離，原來係比我之前所諗嘅更遠。
「我同你差好遠呀，我阿爸做裝修，阿媽做清潔。因為屋企環境唔算好好，佢地返工又好忙唔點理我，所以我咩都無學亦都無補習呀，放學都係去打波或者打機多。」不過我並無自卑，因為衣d都只係先天嘅條件，我相信我都有屬於自己嘅路去行。
「咁你都幾叻喎，無補習成績都唔差，打波又入埋校隊~」Grace 亦無有因為咁睇我唔起。
「哈哈，好彩我生得唔算蠢掛~ 同埋作為一個學生，基本嘅責任我都會負嘅，唔可以太對唔住父母。至於校隊，當你真係好鍾意果樣野果陣，你自然會想做好佢，而我真係好鍾意打籃球，所以自然會練好技術，就好似你都會練好琴同小提琴咁~」我解釋。
「嗯，都係嘅~ 其實我都唔知自己係咪真係鍾意佢地，但我好鍾意覺得自己學到野或者有進步果種感覺。」Grace若有所思咁講。
夜晚返到屋企後，我嘅心情都keep住好興奮，覺得自己同Grace嘅距離好似拉近左一大步咁。而係第二日當我地將個idea同構圖講左比Miss Lam聽之後，佢都覺得幾好無比咩意見。之後我地就同其他同學brief左我地個idea，然後分配唔同嘅工作比佢地。有d要幫手買材料，有d要幫手剪紙同上色，而我同Grace就會負責最後組裝上壁報同裝飾嘅部份。