因為EX 我成為左一個禿頭嘅毒撚 然後遇到一隻猫: 4. 心動
「阿祖，今日去唔去巴富街跟隊?」平時一齊打開波嘅阿希係班房門口問我。
「唔喇，今日好似有少少發燒...抖一日先。」平時嘅我多半會答應，但今日嘅我狀態確實唔係幾好，所以我諗左陣後都係決定唔好逞強。
放是今日放學之後我並無好似平時咁流連波地或者同其他同學流落街頭，而係選擇左立刻去搭巴士返屋企。
(我記得喇！衣個係中三時嘅我，而就係因為衣程巴士，改變左我嘅一生！) 我係天上面望住地下二十年前嘅自己突然醒起。
平時嘅我唔會咁早就搭巴士返屋企，而正因為衣一日唔舒服，令我係巴士上遇見佢，仲因為咁經歷左我人生第一次因異性而黎嘅心動。
果日嘅我好好彩，過左馬路就見到架巴士正駛去巴士站，於是我雖然唔舒服，但最後都趕得切車尾及時上到巴士。車上都幾多人，我慣性走到上層，一見到仲有空位好快就坐低左。
混混噩噩咁過左兩個站後，我見前兩行突然有個女學生企左起身，原來佢係諗住讓坐比個老人家。佢笑容滿面咁起左身，好溫柔咁講左句 "婆婆小心慢慢呀"，然後就扶住個阿婆幫佢慢慢坐低係佢自己原本個位上面。果刻望住衣個善良，充滿愛心，成身好似散發出聖女光芒嘅女仔，我覺得佢真係好似個白衣天使咁，好靚。
而當佢發現左係不遠處嘅我正眼甘甘咁望住佢，就對我露出左個淺淺嘅微笑，用口型輕輕咁講左句"咁岩嘅?"，之後就走返落下層。因為上層已經無晒位坐，所以佢只可以落返下層企。
但佢衣個笑容就令我全身好似觸左電咁，整個世界彷彿都靜止左，你只係感受到自己嘅心臟仍然跳動，可以好清楚咁聽到佢每一下跳動嘅聲音，然後你會發現佢正不斷加速越跳越快，但除此之外你再思考唔到任何嘅野。果刻，我終於知道咩叫心動。
當日衣個畫面令我一世難忘，同時亦為我悲慘嘅下半生埋下左伏筆。衣個女仔就係當時我嘅同班同學，亦係我之後嘅初戀女朋友黃可欣，Grace。
戀愛有時真係可以發生係一瞬間。本身我地並唔熟絡，亦從來無交談，佢係班上嘅乖乖女，而我係班上嘅活躍份子。但就係因為衣次嘅偶遇，佢嘅一個天使舉動加上甜美嘅微笑令我從此鍾意左佢。
不過鍾意還鍾意，極其量其實都係我自己單戀，到到我地之後真係一齊，都仲有一段唔短嘅路要行。而衣件事發生後嘅第一個改變，就係我從此留意多左佢好多，亦好有興趣想知道更多關於佢嘅野。
就我之後嘅觀察，佢係一個文靜，好有禮貌嘅女仔，而作為學生更加係無可挑剔。上課專心，會主動舉手答問題，同學問佢功課佢都會好有耐性同禮貌咁解答。不過放學後除非要參加課外活動，唔係佢好似都會好快離開學校唔會點同其他同學一齊去玩。
但衣d觀察其實都只係好皮毛，我完全了解唔到佢個人真正性格同興趣係咩。然後我突然醒起我有個老死應該會比我更了解佢，因為佢地係讀同一間小學。
「阿釗，你之前好似有講過你同黃可欣係讀同一間小學?」有日放學我一邊玩手機一邊扮晒若無其事咁問我個老死阿釗。
「係呀，做咩?」阿釗亦一邊玩緊手機一邊答我。
我:「佢其實係個咩人黎架?」
釗:「乖乖女囉，所以雖然識得耐，但我同佢都唔算熟。做咩無啦啦咁問?」
「無呀，咁岩醒起問下咋嘛...」我繼續扮若無其事。
「史德祖...你塊面紅晒喎！」阿釗聽完後眼神突然從手機遊離到我臉上，再把臉靠近了我審視完一番，然後大聲說道。
「邊有呀，痴線！」我當然唔承認。
「識你咁耐都未見過你咁...你睇你一副春心蕩漾咁嘅樣，唔通你...鍾意左Grace!?」阿釗當然唔會咁易比我呃到。
「低能！費事睬你...」被說破心事我只想急速逃脫。
「唔駛走咁快喎...一世人兩兄弟，講黎聽下?或者我可以幫到你呢~」阿釗不懷好意咁突然搭住我膊頭笑笑口講道。
不過細想下阿釗講嘅都唔係無道理，衣個世界要收穫就先要付出相應嘅成本，有阿釗幫手或者成件事會易好多，而且我亦相信阿釗唔會周圍同人講，放是我就將巴士當日發生嘅野同埋自己嘅感覺講左比佢聽。
「都估到你係思春架喇，不過無諗過你會睇中Grace啫…老實講好高難度喎兄弟~」聽完我嘅自白阿釗繼續笑住咁講。
我:「鬼唔知咩，唔係都唔駛問你意見啦...之前我都無諗過，但果刻我真係好似中左電槍咁...」
「佢衣d乖乖女，成績好，文靜又有禮貌，感覺好高不可攀。第一我想像唔到佢會鍾意人，第二我想像唔到佢會鍾意你，第三我想像唔到佢會係衣個年紀拍拖... 所以諗諗下，不如你都係直接放棄啦...」阿釗諗左陣後開始苦口婆心咁勸我。
「頂你，我講完比你聽你同我講d咁嘅野！唔駛你幫喇，你淨係講下佢d資料我聽就得喇…」無人想聽殘酷嘅真話，我都唔例外，而且感情嘅野邊有可能試都未試就放棄?
「其實要講都差唔多講晒喇… 呀，據我所知，佢除左讀書叻，畫畫都好靚，小學果陣我記得佢贏過好多比賽，而且好似有學鋼琴，仲已經係演奏級添。」見我發脾氣阿釗諗多左陣後又講。
「點解你講嘅所有野好似都只係打擊我信心咁嘅...」我苦笑道。
「兄弟，事實永遠係殘酷架! 所以頭先勸你放棄我都係真心為你好..」阿釗繼續一副苦口婆心嘅語氣。
同阿釗傾完，我雖然好似了解黃可欣多左，但感覺卻只係更加失落，因為越了解佢就越發覺我地之間嘅距離係有幾大...
不過當我都漸漸諗住放棄唔再多諗嘅時候，一個月後上天卻突然為我創造左個契機。順帶一提，貓仙人衣個能力原來係有快鏡功能。所以一d唔重要嘅片段或者時間係可以極速飛過，唔係嘅話就真係唔知要係衣個世界呆等幾耐先完。