因為EX 我成為左一個禿頭嘅毒撚 然後遇到一隻猫: 35. 再見女神
「因為我更自私更仆街，結果反而同左Mabel一齊仲得到幸福?」天上嘅我有d無語。明明係因為自己仆街唔捨得Mabel衣個FWB所以留返住佢唔放佢走，結果反而因為咁造就左自己之後嘅幸福。細個老師同父母唔係成日教我地善有善報惡有惡報架咩?
「善有善報惡有惡報衣d講法從來都只係為左氹大家做多d好事唔好做壞事而作出黎嘅啫，世界從來唔係咁運行。無錯，”平衡”係世界運行嘅不二法門同原則，世間萬物所有野都係向住”平衡”二字而行，但並唔係用個人做單位，而係整個世界。就好似你地人類嘅六合彩咁，一個人有運中左，係因為其他所有唔中嘅人嘅唔好彩而唔係因為佢自己個人之前或者之後嘅唔好彩。簡單講即係佢贏嘅錢都係輸果班人夾出黎。所以有人好彩就一定有其他人唔好彩，但唔代表好彩嘅人之前或之後就會唔好彩。明唔明?」貓仙人好似識聽我諗乜咁好快解答左我個問題，仲難得咁有耐心去解釋。
「明嘅… 所以有d人可以成世都好好彩，有d人就成世都係過住悲慘不幸嘅生活。不過如果我地所有人都唔接受善有善報惡有惡報衣個講法，衣個世界就會失去控制個個都唔介意做壞事架喇…」雖然明白佢講嘅道理，但我唔係好想接受衣個講法。
「所以我咪話只係為左氹人而作出黎嘅”講法囉，就好似你地人類都會自己寫d法例出黎去規範人嘅行為。不過原則上我都支持你地有咁嘅諗法嘅。」貓仙人有d不屑。
「不過有時真係一個微少嘅改變就可以促成另一個截然不同嘅結局。」其實只係一個想法嘅細微改變，我嘅人生就已經變得完全截然不同。
「唔係我就唔會同你有咁多個平行時空係度穿梳啦。不過衣個世界想比你睇嘅野仲未完，繼續睇落去啦。」貓仙人接道。
經過幾年時間，我同Mabel嘅關係已經好穩定，開始有少少老夫老妻嘅感覺，而大學畢業後我地都投身左社會一段唔短嘅時間。由於衣個世界嘅我並無變得頹廢，所以我個外型仲keep得好好，因此我並唔係好似原本世界咁一直做個毒撚programmer而係好似第一個世界同Grace一齊返後咁喺間比較大嘅IT 公司做Sales Manager，但就受Mabel影響選擇左另一間對頭公司。
而今個世界由於我無變得頹廢，Mabel亦無移民，所以我地幾個中同仲keep住成日聯絡見面。衣度都可以大概講下佢地嘅近況。
阿釗係大學玩得太犀利，最後要defer一年先畢到業，但亦因為咁佢係最後果年識到year 1一個女仔，然後兩個人好快就相戀，到到女仔畢業無耐仲突然奉子成婚埋添。
阿偉大學就好努力讀書，讀完post grad再讀埋mphil，然後仲係大學做研究。雖然佢都有少少毒毒地嘅感覺，但有日佢突然同我地講佢係交友app搵到佢嘅soulmate，然後兩個人一齊左，最後亦結埋婚。
至於Byran，其實到到高中當佢開始突然飆高後，就已經再唔係之前果個又肥又矮嘅男仔而係搖身一變成為左個型男。到到大學憑住佢嘅外表加上好動貪玩嘅性格更加係玩到七彩，不時會同佢d大學樓友夜蒲。係year 3果年佢去左exchage一年，到到畢業後又去外國做左兩年野先返黎。浸左幾年咸水後佢成個人更加完全唔同晒，變得有深度左好多，又成個世界仔咁，令溝女對佢黎講變得更加無難度。
講返我，事業幾好，愛情唔錯，所以去到某個時間我亦跟隨大眾嘅社會步伐向Mabel求左婚。不過由於佢當時讀緊master，所以我地就打算等佢畢業後先舉行婚禮。一切都向住幸福嘅方向行走，直至有日我係公司聽到出面兩個下屬嘅對話。
同事A:「喂，有無見過隔黎Finance果個新同事?」
同事B:「未呀，做咩?」
同事A:「快d搵機會去見下啦，好靚呀! 我相信佢係我做人以黎見過最靚女仔嘅三甲之一!」
同事B:「咁誇張? 即係扮拎文件過去𥄫𥄫先!」
起初我都無特別為意，直至過左段時間後，突然有人敲門，係Fiance個Manage Daisy。
「Joe，想介紹個新同事比你識，我地新嘅AM Leanne。 Leanne佢係我地Sales team個阿頭Joe。」
其實係佢未講完當我見到佢身邊果個女仔果陣，我就已經有d嚇親，因為衣個Leanne就係當年大學我追左好耐都追唔到嘅果位女神Leanne。佢仍然係咁靚咁有氣質，難怪今朝出面班狗公個個爭住去隔離部門𥄫女啦，如果係Leanne衣種級數，我真係完全唔意外佢地會做出d咁失禮嘅行為。
「你好，我係Leanne，多多指教~」
「你好，我係阿Joe。」見佢無同我相認，所以我都無特別同佢相認。
「你地唔好恰佢呀，不過我知你地都唔會捨得嘅~」Daisy留左句說話就同Leanne轉身離開。
正當我有少少失望果陣，我見到Leanne臨轉身前同我單左幾下眼，然後我就知佢唔係唔記得左我。
其實當年自從佢講佢有男朋友，之後我同Mabel又正式一齊左後，我地都慢慢無左聯絡。估唔到過左咁多年會做左同事見返面。
「放工有無興趣飲杯野聚下舊?」晏晝嘅時候我突然收到Leanne久違了嘅message。
「好呀。」咁耐無見我都想知下佢嘅近況。
不因為佢實在太耀眼太多狗公注意佢，所以我地無係公司一齊走而係直接約左係一間遠少少嘅bar度等。
「Hi 好耐無見~」佢比我早到見到我就hi我。
「Hello~ 都唔係好耐啫，今朝先見完~」我講笑答道。
「哈哈，你又岩喎~」Leanne反了半下白眼。
我:「不過我都無諗過真係仲有機會見返你。」
Leanne:「我都無諗過架，仲要你衣家咁高級，有時世事嘅野係好難講嘅~」
我:「高乜鬼呀，咪又係只係幫公司搵錢嘅產物~」
Leanne:「幫公司搵錢先係最重要呀，我地衣d就只係附帶嘅工具人，隨時可以被replace…」
我:「起碼你地唔駛日日跑數嘛~ 算啦，掃興野唔好講，你衣幾年點呀?」
Leanne:「無呀，畢業後係間firm仔做，然後為左考牌咪瘋狂OT囉，係考完先敢去第二間公司希望可以輕鬆d…」
「咁恭喜你啦，終於捱完~ 衣度跟Daisy唔會太chur嘅~」係衣間公司做左咁耐我自然知道我地finance嘅文化同拼搏程度。
「咁就好喇~」Leanne有d鬆一口氣。
「咁感情生活呢?同男朋友點呀?」跟住我又好奇試探一問。
「散左好耐喇，之後太忙都無再拍拖lu…」Leanne有少少傷感咁講。
「嗯… 不過如果比公司班男同事知道你單身，你分分鐘仲忙過之前…」我似係講笑但其實都係講出事實。
「所以我一直都扮緊有男朋友，你唔好爆我大鑊呀!」Leanne笑住咁講左個秘密我聽。
我:「咁睇得起我? 今次唔扮Les喇? 好啦，你唔得罪我我就幫你保守秘密~」
Leanne:「車! 咁你呢? 咁成功實有大把女仔等你啦~」
「我? 當年多得比你拋棄左後我就同左另一個女仔一齊一直到衣家喇，黎緊等佢讀完個master我地就會結婚。」我無選擇隱瞞，亦隱暪唔到，因為公司好多人都知我有女朋友同埋黎緊會結婚。
「Wooo~ 恭喜晒! 咁我同你都係保持返距離先… 不過咩拋棄你呀!講得咁難聽… 果陣我地係好朋友咋喎，你都無同我表白過或者正式追過我…」Leanne笑住但又有d介意咁講。
我:「咁都唔算? 你完全feel唔到?」
「下? 果陣我係撮合緊你同Cindy架喎，明明你地都好岩傾，不過最後佢都係揀返原諒佢嘅青梅竹馬…」Leanne就好似真係咩都唔知咁講。
「係喎… 聽聞佢前排都結左婚，咁証明都無揀錯呀…」提起Cindy，佢前排亦同佢個青梅竹馬拉埋左天窗。因為佢同左Johnny復合，我又同左Mabel一齊，所以畢業後我地就更加無再點聯絡，到佢結婚都無邀請我，唔知係咪仲嬲緊我。
「哈… 佢只係接受左現實啫…」Leanne苦笑道。
「睇黎有故仔聽喎~」表面上我八掛，但心入面我大概都估到係咩事。
「人地嘅野我唔方便講喇，總知男人都係信唔過…」Leanne亦間接幫我肯定左我嘅推測。
「咁都唔係個個係咁嘅…」然後我又為全世界嘅男人包括自己辯護一下。
「你又想講自己呀?」Leanne好快就get到我嘅意圖。
「哈哈，係呀，你當年走寶囉~」我厚顏無恥咁講。。
「係啦係啦~ 好後悔呀…」Leanne扮晒好後悔咁嘅樣。
「可惜後悔已經太遲~」我都配合佢講下笑。
「所以衣杯祝你幸福啦~」Leanne拎起左佢杯cocktail。
「多謝，祝你都好快搵到幸福~」我都拎起左自己杯酒同佢哼左下杯。
之後可能知我就結婚，Leanne都無再主動搵我約我，只係間中因工事傾開會閒聊幾句。而佢當然keep住都好多男同事埋身，但係知佢有男朋友嘅情況下又好多人都食左檸檬，習慣左後大家對佢嘅熱情都慢慢開始冷卻，唔會再係咁煩佢。不過就算得唔到，有個靚女係公司間中可以望下，對所有人包括我黎講已經係一件值得開心嘅賞心樂事。所以自從有左佢係公司，我覺得公司嘅整體氣氛同士氣都維持左係一個高水平嘅level，大家都以一個欣賞嘅態度去面對佢。