因為EX 我成為左一個禿頭嘅毒撚 然後遇到一隻猫: 36. 漣漪
轉眼間又過左差唔多一年，由於Mabel終於讀完個master，我地半年後就會正式註冊結婚，所以都開始為婚禮嘅事而忙碌。不過睇得出雖然忙又多野煩，但Mabel仲係好開心好雀躍咁樂在其中。就算一齊左咁多年，佢對我嘅愛真係從無減過半分。
有一晚，當我同朋友食完晚飯返到屋企門口發覺搵極都搵唔到條鎖匙嘅時候，我先醒起朝早自己拎過條鎖匙出黎開其他野然後唔記得放返入褲袋漏左係公司，於是只好揸車返公司拎返。返到公司果陣已經差唔多十一點，但一開門我發現竟然仍然有人係公司入面。
(邊個OT O到咁夜?) 我公司一向都無咩OT文化，所以我諗唔到有邊個。
「Leanne?」然後我發現竟然係Leanne，但佢正伏左係自己張枱上面。
Leanne聽到有人嗌佢就抬起左頭，但一望到我好快又張個頭拎左去另一面唔比我望到佢個樣，不過我已經知道原因，因為佢正係度喊緊。
「你無事嘛? 唔開心?」我關心問道。
「我無野呀…」而佢亦正路地答無野。
「你喊到咁覺得我會信?」但我無就咁放過佢，因為無人會想見到女神喊。
「…你咁夜仲返黎嘅?」佢嘗試扯開話題。
「係呀，岩岩反到屋企門口先醒起漏左條鎖匙係公司…」我解釋道。
「哦…咁你去拎返然後返屋企啦，唔駛理我…」佢仍然背住我講。
「咁我去拎返先。」知佢唔想比我見到佢衣家個樣，我都好識做咁行返入自己房拎條鎖匙，然後我又專登過左陣先出返黎。果然佢已經整理完畢，雖然隻眼仲有d腫，但至少已經無再喊。
「唔好再做咁夜喇，我揸左車呀，車你返去?」我提議道。
「唔駛麻煩你啦，我自己返去得架喇…」佢當然又正路地拒絕。
「車行啫，而且我架仲係電車，油錢都唔駛~」我嘗試講笑舒緩下氣氛。
「咁好啦…唔該。」知道時間已經好夜，我又係出於好意關心佢佢就無再拒絕。
係車上面大家都無咩點講野。不過因為公司係荔枝角，我突然諗起有個夜景係幾靚。
「不如我地去昂船洲橋底睇下風景吹下風?」我提議。
「好呀…」其實我都係問下無諗過Leanne會話好，但感受到Leanne似乎並唔想返屋企，所以可能因為咁佢就同意左。
可能比較夜，去到橋底個位竟然完全無人。望住個海景加上遠處樓宇嘅燈光，確實係幾靚，被微微嘅海風吹住仲幾舒服。
「好耐無黎過衣度lu…」我主動講道。
「我都未黎過衣度… 好靚呀…」一直唔開心嘅Leanne好似終於比個景distract左佢。而衣個時候海風微微吹起左佢嘅秀髮，佢下意識用手撥左一撥。係側邊望住佢個樣同衣個動作，我不得不讚嘆一聲老天爺嘅傑作，真係好靚…
「無帶錯你黎呢~ 雖然衣度都未算最靚…」我收斂左一下心神然後講道。
「咁邊度係最靚?」Leanne好奇問。
「嗯…都真係有好多選擇答唔到添… 不過主要都係山頂望返落黎或者係維港邊望最靚…」唔同嘅地方係我腦海浮起，但我又講唔出邊度係最靚，因為各有特色。
「攪到我都好想去睇下添…」Leanne有d憧憬咁講。
我:「實有機會嘅~」
「嗯…」
沉寂左一陣後，我再次主動關心問道。
「其實如果你唔開心有咩想同人傾，可以同我講架喎，我好樂意聽架。當然如果唔想講都無所謂。」
「其實我婆婆…兩日前過左身…」諗左陣後Leanne細細聲講道。
「噢… 節哀順便…」對於親人離逝，某程度上我覺得衣樣野係最難安慰，因為人死左就點都唔會再有希望，所以講咩都係廢話，我只可以講到衣句。
「其實我小學果陣我父母就已經離左婚，由於佢地兩個都唔想比我拖累，所以最後婆婆就主動擔起照顧我嘅責任，之後我一直都係同婆婆一齊住同生活… 婆婆一直都好錫我，對我黎講佢係我最重要嘅親人… 但兩日前當我同佢飲完茶搭電梯果陣，佢突然比個細佬係後面撞到碌左落去，然後去到醫院已經救唔返…」講到衣度Leanne又忍唔住開始喊。
面對親人嘅離世，我唔知可以講咩安慰佢，只可以輕輕拍下佢個膊頭以示安慰。
「果陣我明明係佢隔離，但就偏偏捉佢唔切，只可以睇住佢不斷咁碌落去… 我真係寧願碌落去果個係我…」Leanne繼續喊住咁講。
「你唔好怪自己啦，意外嘅野無人想亦無人預計得到… 唔關你事架…」我終於嘗試安慰佢。
Leanne:「理性上我明白，但感性上我好難唔咁諗… 然後每次返到屋企，我就會諗起婆婆平時唔係坐係廳度睇電視就係係廚房整野比我食… 衣家間屋得返我一個，我唔想返去睹物思人，唔想返去自己一個孤伶伶…」
「唔怪得你留係公司留到咁夜啦… 你媽咪呢?」我終於明白點解Leanne留到咁夜，又好似好唔想返屋企咁。
「佢? 佢係外國話好忙趕唔切返黎住喎…」Leanne嘲諷地說。
「嗯… 咁衣段時間對你黎講真係好難捱… 」我嘗試表示我明白佢感受。
「所以我唔想返屋企，想用其他野麻醉自己唔比自己諗其他野…」
「如果你唔介意，衣段時間我可以陪下你呀… 你頭先咪話好想去其他地方睇夜景嘅? 以後你唔想返屋企想搵人陪果陣就搵我，我每次都帶你去唔同嘅地方睇夜景~」我聽到佢咁講好快就衝口而出左。
「多謝你呀阿祖…」Leanne有d驚訝，亦好似有d感動。
作為過來人，果刻嘅我並無多諗，真係只係單純想陪佢幫佢走過衣段艱難嘅時間。而傾多左陣後都真係夜，我就送左佢返屋企。
第二日，雖然累但我都專登早d返到公司然後襯無人嘅時候係Leanne枱頭放低左d物品。
「支牛奶係比你訓前整返熱飲架，會容易d入睡同埋訓得好d。另外有個敷眼套裝你可以訓之前敷下隻眼，一來可以等你舒服d，二來可以令隻眼無咁腫。始終你係女神黎架嘛，唔可以比自己太醜樣!」
見佢返到黎充滿疑問咁望住堆野，我就send左個msg比佢解開佢嘅疑團。當然，衣堆野其實係咁岩我屋企有所以現成拎返黎，始終琴晚返到屋企已經咁夜就算想買我都買唔切。順帶一提個敷眼套裝本身其實係Mabel買比我用，不過男人本身就好少用衣d野。
「多謝你呀…好感動 >_<」佢回覆我。
「最緊要你快d無事! 仲有呀，以後如果唔想返屋企可以搵我陪你，唔好日日留係公司OT咁慘啦… 出去抖下氣心情一定好過係公司做野…而且公司邊有咁多野比你做呀，唔好扮晒野啦~」我嘗試製造一個比較輕鬆嘅氣氛。
Leanne:「喂呀! 唔好督爆我啦…」
「所以呢，唔好扮OT。唔想返屋企想搵人陪呢就搵我衣個老朋友啦~ ^_^」同女神傾偈我都忍唔住打左衣d 懶係cute嘅icon。
「咁…今晚可唔可以帶我去第二度睇風景?」