因為EX 我成為左一個禿頭嘅毒撚 然後遇到一隻猫: 43. 意外之變

坦白講，對方係Leanne我真係好心動，但一方面我覺得咁只會繼續傷害佢，另一方面我又好驚傷害到Mabel。Leanne嘅反應令我有d驚，因為佢太激動同進取，我反而會擔心繼續咁落去佢有日會同Mabel講或者用其他方法公開我地嘅事去破壞我同Mabel嘅關係。當然見住佢咁我都好心痛，我知自己真係傷害左佢，衣個係我事前從來無諗過。
 
 
而隨住我開始有時唔覆Leanne嘅message，佢都開始變得越黎越偏激同埋失常。
 
「你到底當我係咩? 話黎就黎話走就走… 點解你可以咁決絕? 話走就真係完全唔理我? 係你心目中我係咪只係一個SP?」
 
「求下你唔好走，我真係好唔捨得你…」
 
「最後一次，見多我最後一次呀，求下你…」


 
「你衣個衰人根本就無鍾意過我淨係想同我上床，我以後都唔想再見到你呀!」
 
Leanne 時軟時硬嘅訊息令我確實感受到佢個方寸到底有幾亂，而我可以做嘅就係盡量唔回應… 好彩結婚前兩日我已經開始放假，至少公司上佢再見唔到我唔駛睹物思人。
 
 
「原來女神都真係一個普通人黎…」天上嘅我望見咁失態嘅Leanne，真係有d難以相像。
 
「佢一直都無以女神自居過，亦渴望自己可以好似正常人咁。所以正正因為咁，佢個前男朋友先因為對佢差而反而令佢產生左好奇同新鮮感啫。」貓仙人講。
 


「至於我就真係純好彩?」我問。
 
貓仙人:「當然啦，你咁岩係佢最需要人最無防疫力嘅時候出現左係佢身邊又係一個佢認識左好耐嘅人，唔係正常情況下你嘅成功率係零。當然咁其實都有d係受惠於你曾經有同佢相似嘅感受，同埋第二晚你有講過你同你女朋友嘅野，令佢覺得你真係明白佢大家都係同路人之餘，佢亦放低左戒心，然後先不自覺出事…」
 
「咁講好似有d不孝，不過估唔到老豆當年嘅死會帶左咁多豔遇比我… 」Grace，Mabel到衣家嘅Leanne，全都同衣樣野有關。
 
貓仙人:「只可以話都係你地所講嘅緣份囉… 」
 
「係喎，仲有一樣野，點解第一個世界嘅Cindy係撞返我之前並無出軌，但衣個世界嘅Cindy就會?」我醒起Cindy後問。
 


「我都唔肯定，但我估因為係第一個世界你雖然比左希望佢又拎走返，但因為你係揀返自己女朋友，令佢雖然傷心，但某程度上你都話緊佢聽正印都可以戰勝第三者，所以佢當年失望之餘對你其實談唔上恨，佢下意識希望有日佢老公都可以好似你當日咁，直至之後遇返曾經令佢心動嘅你，然後都係同你出左軌。
 
至於衣個世界雖然佢同你好岩傾對你有感覺，但你其實最後只係純粹表現左你三心兩意嘅一面，令佢覺得個個男人都係花心之餘亦唔覺得佢老公會變，然後忍受唔到老公出軌下自己都出埋軌…」貓仙人難得有d唔肯定咁講。
 
「原來係咁… 咁衣個世界我地係咪都睇完可以離開?」我問。
 
「梗係未啦，你見我都無出過聲話要走。」貓仙人一副不屑同”你就想”嘅樣。
 
「唔係後面又黎呀…」我開始有種強烈不安嘅預感。
 
「睇落去你咪知囉，凡人。」
 
 
果然，係結婚前一日，發生左一件事，一件衣個世界嘅我並無發現，但係天上嘅我卻睇得清清楚楚嘅事。
 


主因其實都係無乜出軌經驗嘅我疏忽，加上Mable 從來都好信我唔會check我野令我防範意識極低所至。以往因為方便，好多時我屋企部電腦都會開住web版whatsapp，而結婚前一晚我同Mabel係我屋企仲有d婚前準備要做，然後做完我就出左去拎野，佢就係我屋企stay多陣之後再出發去meet佢d姐妹。點知佢無聊諗住用我電腦上下網果陣，一開browser就見到我個whatsapp赤裸裸咁開左係佢面前。
 
本身佢都唔係特登睇，但因為whatsapp有個message太吸引佢眼球，所以佢就忍唔住click左衣個對話框然後睇晒我地咁耐以黎一直嘅對話。因為當時置頂個message咁岩係Leanne 定時定候send比我嘅責備加道別宣言，而最後一句係” 我寧願衣世無遇見過你，我亦以後唔想再見到你”。無意睇到嘅Mabel自然好好奇點解會有個咁嘅message。
 
結果因為我一直無delete過同Leanne嘅message，又好無sense 咁一直用whatsapp同Leanne溝通，Mabel就睇晒我同佢衣幾個月黎嘅情話，亦知道左佢一直信任有嘉嘅男朋友以及一日後就會成為佢老公嘅我原來出左軌。一路睇Mabel就一路流眼淚，然後去到某個位佢終於忍唔住仆左係台面大喊…
 
「莫非衣個世界入面我同Mabel都係去唔到最後?」天上嘅我不禁問道。
 
「換轉其他人可能係嘅，但你嘅青梅竹馬愛你實在愛得太誇張，再加上衣幾年同你一齊咁開心，佢更加離開唔到…」貓仙人無賣關子直接比左答案我。
 
果然，係喊左一段時間後，Mabel就收拾左心情，然後悄悄咁離開左我屋企，而婚禮亦都如其順利舉行。
 
其實衣個世界嘅我，之後都留意到Mabel好似有d唔妥，成日心不在焉笑容有時又好似有d牽強咁，但就以為佢只係太緊張或者未適應結婚所以無咩點特別在意。
 
Leanne最後如我所料無出席我嘅婚宴，而結婚後嘅我過左排後就好似鬆左口氣咁不斷send message比佢希望佢原諒我大家可以做返好朋友。人就係咁賤格，自己行為上做完衰人但又唔想人地當自己係衰人，所以好希望對方可以原諒自己然後無事做返好朋友，咁自己就唔再係一個衰人亦唔駛再有內疚或者唔好意思嘅感覺。


 
不過Leanne 並無接受，係衣段時間，佢原來已經將對我以前濃厚愛意嘅全部轉化為恨意。基本上之後佢除左公事上嘅message外其他message都一概唔覆，直至我結婚接近一個月後嘅一日，我先終於收到佢公事以外嘅reply。
 
「如果你講到你真係仲鍾意我care我，你可唔可以為我做一樣野?」
 
「咩野?」我即刻問。
 
Leanne:「我唔想再見到你，你可唔可以為左我轉工?」
 
「… 你真係咁憎我?」心頭一痛我問道。
 
Leanne:「我衣家見到你就覺得好嘔心，每次見到你都remind緊我自己有幾蠢以前竟然會鍾意你仲同你一齊…」
 
我:「對唔住，我真係以為我地一早已經有共識…」
 


Leanne:「有共識就可以話走就走，話斷就斷?你根本就無鍾意過我無重視過我無尊重過我。」
 
我:「真係唔係咁架…不過我都知衣家講咩都無用…真係無其他方法可以令你原諒我?」
 
Leanne:「無」
 
「明白…但我無可能因為咁辭職，我係度做左咁耐咁辛苦建立左咁多野…」雖然感到抱歉，但我亦好難因為咁而為佢辭職離開衣間做左咁耐嘅公司。
 
Leanne:「你真係好自私」
 
我:「對唔住…」
 
言談間我確切感受到佢對我嘅愛已經完全轉化成為恨，心痛嘅同時我亦都有d心寒。而幾個月後，佢見我唔走佢就自己選擇左辭職，而之後我都無再見過佢了…