到衣個世界嘅我有返記憶同知覺,已經係第二朝,我發現自己係一張陌生嘅床上面,而隔黎係全裸嘅Jessica。衣個世界嘅我並唔太記得琴晚發生嘅事,只係感受到宿醉果種頭痛欲裂嘅感覺,但同時又覺得有d負面情緒得到左釋放個人好似無咁負面。望住仲訓緊未醒嘅Jessica,我有d後悔嘅同時竟然又有一種少少嘅滿足感。
 
當然係天上嘅我就睇得一清二楚發生左乜事,不過其實都係正路劇情,錫錫下就失控,然後Byran同Michelle返到黎見我地咁開心就直接送左我地上的士然後佢地再上另一架的士。而我地係的士都已經繼續不停咁錫同摷,返到Jessica屋企自然直接上埋床,大家都將所有不快嘅感覺渲洩係對方身上。
 
「對唔住…」無耐Jessica醒左發現我係佢嘅床上後第一句講嘅竟然係對唔住。
 
「下? 傻架咩,係都係我講對唔住…」我接受唔起衣句對唔住,始終發生衣d事世人包括自己都會覺得係男方拎左著數。
 
「我仲記得係我主動錫你…不過平時我唔係咁架,咁岩琴晚真係好唔開心又飲醉左…」Jessica嘗試解釋。
 


「我明呀,作為過來人我當然明白啦。」我真係明,因為琴晚嘅我又何嘗唔係咁呢。
 
「咁…你覺得琴晚我嘅提議好唔好?」Jessica又提起。
 
「提議?」但我已經唔記得。
 
「不如我地試下一齊互相幫大家平伏大家嘅傷口?」Jessica有d怕醜咁問。
 
「你…認真?」我想確定一下。
 


「係呀… 不過如果你唔想咁就由佢,我地一齊忘記左琴晚嘅事佢啦…」感受到我好似唔想Jessica一臉傷心失望嘅樣子。
 
「咁如果你唔介意,我地都可以試下嘅…」本身我下意識其實唔想答應,但拒絕好似𡁻完鬆咁,我就唔好意思拒絕。而且對方確實好靚,好以真係某一個channel入面嘅Jessica咁,諗落試下好似都唔係一件苦差,真係唔岩咪停,咁我又唔係𡁻完鬆又好似無咩損失,所以就答應左。
 
「真嘅!?」Jessica即刻好開心咁嘅樣。
 
「嗯…」佢嘅反應令我更加唔敢say no。
 
聽到我ok,Jesicca就好開心咁即刻撲左過黎錫左我塊面一啖。
 


之後Jessica好快就離開左張床話要煮野比我食。而就係我地食食下野果陣,我突然聽到開門聲,心頭一緊驚係Jessica屋企人然後就發現好彩入屋嘅係琴晚同Jessica一齊黎嘅Michelle。
 
「咦,睇黎我琴晚嘅付出無白廢喎~ Joe果然好本事呀下!」佢一見我同Jessica,特別係Jessica仲只係著左件襯衫無著面褲就知咩事。
 
「Michelle!」Jessica即刻一臉怕醜咁喝止Michelle。
 
「怕咩醜啫~ “鄧”你開心嘛~」Michelle笑笑口講。
 
「你都住係度?」我只好一邊尷尬咁傻笑,一邊轉移下話題。
 
「係呀,我同Jessica係大學同學,一齊合租左衣度。所以如果有晚你想搵Jessica而佢又唔係度,我都可以陪你架~」Michelle望住我笑吟吟咁講。
 
「馮紫恩!」Jessica再度咆哮表示不滿。
 
Michelle:「講笑啫~ 知佢衣家係你條仔喇,我邊敢掂呢~」


 
Jessica塊面紅晒好尷尬咁無再出聲。
 
「Byran呢?」於是我又嘗試幫佢解圍問道。
 
「阿Joe仔,開心完就梗係各自返屋企啦,你知唔知衣家幾點呀? 我地為左唔阻住你地琴晚專登唔返黎衣度去左酒店呀,衣家都過晒check out時間啦~ 仲好講!」點知反而令Michelle講左d令我地更加尷尬嘅說話。
 
「Sorry Sorry,多謝多謝…」於是我只好攪下gag。
 
Michelle:「咁又唔駛多謝,我地都玩得好開心。最重要係你令我地Jessica有返笑容同愛情嘅滋潤,所以應該我多謝你先岩~ 不過你之後好好對佢呀,唔係你就知死!」
 
「知道知道…」我尷尬應道。
 
 
「你唔駛理Michelle講咩架,佢份人係顛顛地,不過佢係好人黎嘅~」食完野我就急急腳離開避免尷尬,而Jessica就送我落返地面。佢驚Michelle嚇親我於是講。


 
「哈放心無事,睇得出佢都好關心你呀。」我當然無點放係心度。
 
「嗯… 衣段時間多得佢成日陪住我…」Jessica有少少眼濕濕咁講。
 
「咁就好好珍惜佢啦~」佢嘅說話令我諗起無耐前比我鬧走嘅Mabel,有感而發。
 
Jessica:「我會! 咁你返到去再打比我?」
 
「好呀。」
 
 
就係咁,衣個世界嘅我同Grace分手左無耐後好快就同第二個女仔一齊左。而由我同衣個女仔相識到一齊,其實好似都係12個小時,中間仲發生埋關係添。
 
不過不得不講,一段新感情確實係忘記舊感情嘅好方法。雖然仍然會唔開心,一開始仍然會唔習慣,好似總係覺得攬住果個人唔係自己諗緊果個人咁,但有一個人係你身邊陪住你,或多或少都會distract到你無再諗舊果個人咁多。而當你慢慢習慣左衣個新人嘅存在,只要大家係岩同夾,慢慢大家都會有感情陪養到出黎,然後不自覺間你就會漸漸將對舊愛部份嘅感情轉移到對方身上。就算做唔到100%都好,但只要有10%或者20%轉移左,你個人都會無以前咁辛苦。


 
三個月後,雖然我仍然會唔開心,仍然會成日掛住Grace,但至少我無再好似之前咁頹廢,已經算係重新振作似返個正常人。而對Jessica,我亦漸漸越黎越投入。唔知係咪為左盡快熟悉大家同消除初初認識果種陌生嘅隔膜,我同Jessica一齊後初初成日都會直接瘋狂造愛,然後好快我地之間就好似有左一種親切感同connection,仲多左種互相嘅熟識同依戀,好似大家都係屬於大家咁。 或者有時候一男一女確實係可以有性然後先再有愛,就好似武俠小說入面d由道入魔,再由魔入道咁。而當大家親密度刷爆左感情穩定左後,我地結合嘅次數就慢慢再無之前咁多,取而代之係大家開始追求多返精神上嘅交流,但又好自然唔會有任何違和感,亦唔會覺得係因為感情變淡左。
 
Jessica本身都係一個幾sweet嘅女仔。每朝佢都會同我講早晨,訓之前會同我講晚安,有咩節目又會同我講聲備案,簡單講,同佢一齊係幾有安全感。而每次同佢出街,佢都會鍾意拖住我或者撓住我,間中會撒下嬌但從來唔過火,不時又會有d 小驚喜比我。例如知我要衝功課,有時佢會過黎買宵夜比我,知我第二日要早起有時佢又會晨早買定杯咖啡係我屋企樓下等我。衣d舉動,雖然簡單但無疑係貼心亦唔會令你有壓力。而接受左佢嘅好,我當然都有努力回應。例如會同佢講返自己嘅行踪,有時知佢夜走又會去接佢然後送佢返屋企,間中亦會送d小禮物比佢。
 
再過多三個月後,我已經完全適應左同Jessica一齊,諗起Grace嘅次數亦越黎越少。衣刻,我真心覺得自己好好彩可以遇到對方,可以令自己咁快就返出黎,我相信我地可以有個美好嘅結局。
 
「原來只要肯放低,就真係會可以放低度…」天上嘅我見到自己衣個世界嘅改變後感觸講道。
 
「你有無睇過你地有套戲叫” Yes Man”? 好多時其實都係你地自己唔肯做唔肯試就成日同自己講唔得,你有無留意你係之前d世界成日會講係自己做唔到?然後再加一句”你唔會明”就好似將件事合理化左咁。」貓仙人帶少少不屑咁應道。
 
我:「所以我對Grace嘅感情係咪真係只係我自己以為好深?」
 
「衣個問題可能要你自己先知… 不過有時你地愛上嘅其實並唔係真係果個人,而只係愛上個習慣。所以當你有左另一個習慣,對之前個習慣嘅依戀自然會淡化。」貓仙人又答。
 


由Mabel嘅故事再到衣家自己同Jessica嘅經歷,我明白一直以黎其實唔肯放過自己嘅,都只係我自己本人。是真的不能也,還是只是自已以為不能所以不為也?
 
不過當下面嘅我完全投入左衣段新感情,進入左認真摸式後, Jessica卻喺我地半週年紀念果日突然同我提出分手。