因為EX 我成為左一個禿頭嘅毒撚 然後遇到一隻猫: 45. 姻緣天降?

第四個平行時空
 
 
強光一閃後，我見自己一個正喺屋企一邊飲緊悶酒，一邊係電腦睇緊自己同Grace一張又一張以前嘅合照。
 
“叮噹”
 
突然間門鍾一響，一開門竟然係Byran。
 
(我記得喇，衣晚應該係我同Grace分手兩三個月後嘅一晚，Byran黎左想捉我出去飲野幫我解愁。) 天上嘅我心入面默默在想。


 
「祖，頹夠喇，今晚同我出去飲下酒放鬆下啦~」果然Byran見到我開門立刻提出。
 
「唔喇… 酒我屋企飲都得啦，出去做乜啫，又咁貴…」而我完全無興趣。
 
「點同啫~ 你係屋企自己飲果d叫悶酒，出去飲果d叫開心酒~ 而且出去又可以抖下氣見下唔同嘅人，個人都有活力d啦~ 最重要係可以識新女仔，有第二個你就唔會再諗起Grace架喇…」Byran繼續遊說我。
 
「做咩要唔再諗起Grace? 我無諗住放棄架喎… 一陣佢見我去飲酒識女仔，以為我咁快變心然唔返黎我身邊點算?」我反問。
 
「返黎你身邊? 史德祖，你醒下啦! 人地同條新仔都唔知幾開心呀，邊會返你身邊? 再講，佢入左HKU住埋hall後成個人唔同晒架喇，佢唔會再鍾意你你地亦都唔夾，唔係佢都唔會變心啦!」Byran聽完我講後想鬧醒我。


 
「唔會架… 佢一時唔清醒架咋，總有日佢會記返起我嘅好然後同返我一齊…」但我唔相信。
 
「你真係無得救… 你睇你衣家咁嘅樣，仲邊有人會鍾意你呀? 」見一計唔成Byran又向另一個方向遊說。
 
「咁點先可以有人鍾意? 或者Grace點先會鍾意返我?」而我果然聽到後立刻有左反應。
 
「人地衣家個男朋友都唔知幾charm，又social，佢都成日會去clubbing架。」Byran想用激漲法。
 
「… 我唔想同佢一樣，變到佢咁又有咩意思?」但我聽到後臉色又一變。


 
「咁你當陪我去飲酒得唔得呀?」Byran繼續勸道。
 
「唔喇… 你自己去啦…」我當然亦繼續拒絕。
 
Byran:「攪錯呀! 咁到底點你先肯陪我去呀?」
 
我:「調返轉你點先肯放過我呀…」
 
Byran:「一係我地用返最原始嘅方法…」
 
我:「…你好煩呀… 怕左你，一盤過唔好再煩我。」
 
「包剪揼!」
 


係我個世界我直接KO左Byran然後就立即趕左佢走，但係衣個世界嘅我竟然輸左。男子漢最緊要有口齒，所以雖然萬分唔情願，但衣個世界嘅我結果都係跟左Byran出去。原來包剪揼出咩都係一個決定，而唔同嘅決定就可以做成唔到嘅結果，因而衍生左衣個世界。
 

衣個時間嘅Byran已經係完全發育成為左一個型男。而係大學薰陶左年幾嘅佢，對出去玩衣樣野自然駕輕就熟。係衣晚好明顯佢係有目的，就係要灌醉我然後張我送去第二個女人嘅懷抱。
 
因為Grace嘅關係加上我無住hall，所以夜生活當時嘅我係從來無參與過，最多都係同d大同食完飯去飲下酒。但今次Byran帶我去嘅地方好明顯係另一個種類。因為以往去嘅多數都係比人傾偈吹水多嘅酒吧，而衣度就更似比人”識朋友”嘅酒吧，中間仲有個好大嘅舞池比人跳下舞。
 
雖然頹，但衣家嘅我仲算係一個型男，加埋Byran係側邊，本身就容易吸引到其他人嘅目光。加上可能我真係頹得太出面，大家都會覺得我係黎賣醉尋開心易入手，所以無耐就已經有唔少女仔行埋黎想搵我地傾偈。
 
Byran知佢今日唔可以離開我，唔係佢一走我一定即刻返屋企，所以雖然佢明明有幾次蠢蠢欲動，但都一值係我側邊幫我物色人選。始終作為老友，佢都唔會求其搵件豬扒比我，而且佢知一定要比我試過甜頭，先有機會食個翻尋味然後再想有下一次豔遇，然後慢慢脫離Grace衣個陰霾。如果唔係，只會令我以後都唔再出黎然後繼續沉淪。
 
終於皇天不負有心人，拒絕過幾round後，突然有兩個靚女行左埋黎。
 
「你好，我係Michelle，佢係Jessica，介唔介意一齊?」其中一個著住藍色連身短裙嘅女仔對Byran講。
 


見難得兩個都咁高質，Byran當然無拒絕，即刻邀請左佢地一齊坐。
 
「歡迎，我係Byran，佢係我中同阿Joe，不過佢岩岩失戀所以會比較cool。」最後一句Byran懒係細聲咁用隻手擋住個嘴同Michelle講。
 
「咁岩嘅，Jessica都係呀…」Michelle又用隻手扮晒遮住嘴咁同返Byran講。但其實佢地兩個嘅聲浪絕對夠入到我地隻耳。
 
「咁咪岩囉，同時天涯淪落人喎~」Byran笑淫淫應道。
 
佢地坐低左後好快就開始自己係度吹水，而我同Jessica就一直低住頭無乜點出聲。無耐Byran就帶左Michelle出去跳舞，諗住制造下機會比我地之餘佢都制造下機會比自己。因為Jessica係度佢唔再擔心我會自己走左去。
 
「我地出去跳舞，你地慢慢係度傾下偈啦~」Byran搭住Michelle膊頭邊行邊講。
 
Jessica想捉住Michelle求佢唔好走，但Michelle當然無理佢嘅挽留。
 
然後我地就陷入左詭異嘅寧靜。


 
「係呢… 你都係岩岩失戀?」過左陣Jesicca頂唔順開始主動帶出話題。
 
「係呀… 你好似都係?」雖然有d尷尬，但我都有禮貌咁回應。
 
Jessica:「嗯… 所以比Michelle格硬帶左出黎囉，佢話頹得太耐個人係會上癮架喎…」
 
「哈咁岩呀，我其實都係比Byran格硬捉左出黎…」突然間我覺得大家真係好似有d同路人嘅感覺。
 
「有緣喎… 咁點解失戀?」佢應該都有類似感受所以開始問道。
 
「佢話大家唔夾，然後分手無耐就同第二個一齊左…」而我亦唔介意講比佢聽。
 
Jessica:「你地一齊左好耐?」
 


我:「7年…」
 
Jessica:「嘩…衣家先話唔夾?」
 
我:「果陣我追左佢好耐架… 然後一齊後一直都好開心，直至入左大學所有野就慢慢開始改變…」
 
Jessica:「係咪大家慢慢越黎越少見面，話題又好似越黎越話不投機，無左共鳴咁?」
 
「係呀，你點知架?」我帶點驚訝問道。
 
「因為我都係咁… 不過我無你地拍咁耐，一齊左都係三四年左右。或者衣個係戀人入到大學後分手嘅公式掛…」Jesicca無奈講道。
 
係失戀嘅時候，好多時你會好想搵到一個了解自己支持自己嘅人，但要搵到衣個人並唔容易，除非你搵到嘅係一樣失戀嘅同路人，如果唔係你總會覺得對方唔夠資格，唔會明白自己感受。或者物以類聚就係咁嘅意思，能陪伴傷心不幸嘅人，就同樣只有都係傷心不幸嘅人。不過之後佢地又會鬥不幸，覺得無人會及自己咁鍾意個ex，贏左就好似贏左全世界咁。但其實比你做到全世界最不幸嘅人，又有咩值得開心呢? 所以人，有時其實都係有d自虐傾向。或者佢地覺得做左最不幸嘅人，就可以得到世人嘅同情，得到左傷心同頹廢嘅資格，然後其他人都唔可以再怪佢地吧。
 
而衣個世界嘅我遇到Jessica後就好似遇到知音人咁，大家都將大家嘅痛苦講晒比對方聽，而同時間亦越飲越多。
 
「既然我地都咁慘，不如我地試下一齊互相陪大家渡過衣段時間?」飲左唔知幾耐，Jessica突然提議道。
 
「下?」已經幾醉下嘅我有d反應不過來。
 
「個天咁對我地，我地就偏要開開心心唔好衰比佢睇!」講完Jessica就已經俯前錫左落我個嘴度。
 
軟玉在懷，唇上傳黎嘅柔軟既觸感，加上佢身上散發出嘅女兒香味，每一樣都令我漸漸迷失，然後我地就開始熱吻起來。無可否認衣種被愛，被需要嘅感覺，好懷念…