因為EX 我成為左一個禿頭嘅毒撚 然後遇到一隻猫: 64. 認識
「原來阿敏嘅過去係咁慘…」天上嘅我不禁嘆息道，而且個心仲有d痛…
「某程度上你地嘅經歷同演變都有少少相似，不過佢受嘅傷害應該遠比你大…」貓仙人語重心長咁講。
「咁點解上一個世界佢又唔接受我嘅?」我諗起後問。
「應該係因為上一個世界嘅你經歷唔同，佢係你身上搵唔到果種熟悉感，同埋… 佢應該認得你曾經同佢有過一夜情，所以知道你係玩家唔係良配…」貓仙人答。
「比起佢嘅經歷，我突然覺得自己經歷嘅真係好少事，根本唔應該為左咁催毀左自己嘅人生…」睇完阿敏嘅故事，我覺得自己好廢亦無資格咁傷心。
「其實睇過咁多個世界，你應該明白有時放低執著，特別係感情，人生先可以繼續向前行。放棄唔一定就係認輸…相反，你可以將佢當成係一種對上天嘅反擊，佢越係玩你，你就越要開心比佢睇。」貓仙人緩緩說到。
「嗯… 不過估唔到就算唔同嘅決定，經歷唔同，最後結果都係一樣甚至比衣家更悲慘… 可惜後悔已經太遲…」睇過咁多個世界嘅經歷，我越黎越後悔。
「真係太遲咩?」貓仙人別有心意咁望住我問。
「我已經返唔到轉頭啦…」我帶著唏噓地說。
「你無發覺其實之前d 世界雖然你最後都係變左禿頭毒撚，但唯獨你自己衣個世界，最後你並唔係孤苦伶仃?」貓仙人提示。
「你指我仲有阿敏?」我諗左後問。
貓仙人無答我，而喺我地頭先對話期間下面嘅世界同時間亦繼續以快鏡運行，轉眼間已經去到幾年後。
「敏敏，下個星期六你得唔得閒呀?」有日，阿敏媽咪突然問阿敏。
「得呀，做咩?」宅女阿敏其實只要唔駛返工就自然得閒。
「無呀，媽咪見你好似好耐無同朋友出去，又無識新朋友仔，所以想幫你搵返個新朋友咋嘛…」敏母笑住咁講，但睇得出笑容係有d勉強。
「新朋友?男仔?」敏銳嘅阿敏當然估到咩事。
「係呀…」敏媽有少少尷尬答道。
「想幫我相體呀?」敏苦笑問。
敏母:「咁都要睇你自己岩唔岩眼緣嘅，唔鍾意咪當識下朋友囉，唔係勉強你架。」
阿敏本身想質問阿媽無啦啦做咩攪d咁嘅野，但見阿媽一個好擔心自己嘅樣，然後見佢越黎越白嘅花髮，越黎越多皺紋嘅臉孔，佢突然又心一軟。
敏:「你… 好想我去?」
「媽咪好擔心你將來自己一個無人照顧你呀… 女仔嘛，都係有男人照顧嘅好…」敏母苦口婆心咁講。
因為唔想阿媽擔心，所以阿敏就順佢意去左相體，然後我先知原來我並唔係阿敏第一個相體對象。係遇見我之前，佢已經見過兩個男人，只係佢地見完一次後就無左下文，因為對方見到阿敏後就無左興趣，然後第三次佢遇見左我，亦令我諗返起我地第一次見面嘅情境，係喺一間coffee shop入面。
坦白講，第一眼見到阿敏，發覺佢龐大嘅身型，我本能上都有少少想即刻離開，不過禮貌上我當然無咁做，而且當時又禿頭又肥嘅我，其實係極度自卑，每次出親街，周圍嘅人特別係女仔，都總係好似歧視嫌棄自己咁，所以雖然第一下有咁嘅反應，但好快我就覺得自己根本無嫌棄人嘅資格。
「你好呀，我叫李思敏，你可以叫我阿敏~」
阿敏本身好專心咁睇緊書，但一見我就露出左一個幾甜嘅笑容同我打招呼。而就係衣個笑容同打招呼，令我對佢嘅觀感唔同左。唔係話好似當年對Grace一見鍾情果隻，而係果種完全無任何排斥嫌棄同歧視自己，只係發自內心當你係一個正常人肯接納你果種親切嘅感覺，我真係好耐無試過係一個陌生人身上感受過。
作為正常人嘅你地，唔會明白禿頭肥佬毒撚平時出街比人嫌棄係咩感覺，所以亦唔明白佢地點解會越黎越唔想出街而選擇做一個越黎越毒嘅毒撚宅男。但阿敏衣個微笑，無疑係令我早已冰封嘅心多左絲絲暖意同親切感。我知，對方至少一定係一個心地善良同完全唔介意人外表嘅人。
「你好，我叫阿祖…」我禮貌地對佢報以返一個微笑同招呼。
「阿祖你好，想飲咩呀?」敏問。
「熱咖啡呀唔該…」
於是阿敏就幫我同waiter order 左杯熱咖啡。
不過係衣個時間，我又從waiter望阿敏嘅眼神中見到一種不屑，嫌棄甚至係歧視嘅感覺。從佢嘅眼神你會知道，如果唔係工作需要而只係喺街上面見到，衣個waiter一定會對阿敏敬而遠之，有咁遠行咁遠，好似驚死痴近佢會整污漕自己隻眼同沾染到佢d肥氣咁。
霎那間，我又覺得對面衣個女仔平時一定都係經歷緊同我一樣嘅野，自此我對佢亦真正完全無晒一開頭果種抗拒感，相反仲有種惺惺相惜，同是天涯淪落人嘅感覺，對佢少左好多陌生人初初果種隔膜，取以代之，係一陣親近之意。
或者已經見怪不怪，阿敏對waiter鄙視嘅眼神就完全無感覺，無感覺係指不論正面同負面感覺都無，就好似完全無見過個waiter咁。
「其實我成日唔知衣d約會一開始應該要講咩好…」見我講完唔該後就無出聲，過左陣阿敏又講。
「係囉，感覺好似有d尷尬…」我有少少尷尬咁回應。
「然後有時我又會諗，點為知認識一個人，又或者點認識一個人先係最真實最好…」阿敏似乎突然有感而發。
「由傾偈同了解開始?」我諗左陣後答。
「但你有無試過曾經以為自己已經好認識同了解一個人，但到到某一日你會突然質疑自己或者發現自已原來根本從來唔認識衣個人?」阿敏帶住點傷感咁問。
阿敏嘅問題令我諗起一個人，心入面仲立刻有種隱隱嘅痛。
「有… 有d人你成日對住佢甚至同佢一齊長大，你自以為自己對佢嘅性格喜好行為已經瞭若指掌，但有一日，佢卻突然間可以變得好陌生，陌生到你都懷疑到底佢地係咪真係同一個人…」我亦同樣帶住傷感咁答。
「係囉… 識左咁耐原來都可以好似完全唔認識咁，咁你話人同人之間，係咪真係仲有認識同交心嘅需要?」敏有少少意外咁望住我，然後又望住窗外咁講。
「所以之前咁多年，我都選擇左自閉唔再識人囉… 不過其實諗返有d野又未必係因為完全唔認識嘅，只係變幻厡是永恆，人變左咪會可能由你所認識變成唔認識囉…」我有感而發咁答。
「嗯， 都岩嘅，所以有時認識一個人其實都真係幾累… 咁唔再識人點解今日你又會出黎嘅?」敏嘅眼神又從窗外返返去我身上。
「坦白講，唔好介意，其實我出現都只係為左令我阿媽唔駛再擔心我…」我如實說道。
阿敏聽到後有少少意外，然後別有心意咁望左我一眼
「睇黎我地真係可以做朋友喎~」