因為EX 我成為左一個禿頭嘅毒撚 然後遇到一隻猫: 67. 奔向幸福

「我明白喇…」良久，我慢慢打開返雙眼。
 
「明白就好，咁我地都係時候分別喇~」貓仙人露出一個滿意嘅笑容然後講。
 
「多謝你… 多謝你比左咁多經歷我，修補左我唔同嘅遺憾，仲教識我咩先係最重要…」我衷心咁對貓仙人躬左個恭感激佢為我做嘅一切。
 
雖然以往我失去左好多，但如果我可以放低過去，唔再諗自己有幾不幸，唔再執著自己失去左好多野，其實衣家嘅我，仲有一個好好，好值得我去疼錫嘅老婆，我仲可以同佢過得好幸福…
 
然後強光一閃下，我發現我已經係返地面，前面仲係果條河，但隻黑貓已經唔見左。
 


 
「唔通頭先係我發夢?」雙腳重新踏回地上加上附近熟悉嘅畫面重現眼前，我都不禁疑問頭先經歷嘅野到底係真定假。
 
衣個時候電話響起，係阿敏打黎。
 
「敏?」
 
「祖? 你終於聽電話喇! 你有無事呀，突然消失左成日搵極你都搵唔到… 你係邊呀?」聽得出阿敏嘅語氣好擔心好焦急。
 
「我無事呀，只係發左個好長嘅夢，諗通左d野…」我諗返岩岩發生左嘅事。


 
「無事就好喇… 咁諗通左d咩?」阿敏鬆左一口氣咁然後問。
 
「諗通左我仲有好漫長嘅人生。」我笑住答。
 
「下?」阿敏唔明白。
 
「無野~敏，不如我地今晚出去食飯慶祝?」我無答佢然後提議。
 
「可以呀，但慶祝d咩呀?」阿敏帶住笑意同好奇咁問。


 
「慶祝我比人炒左，可以重新過生活~」
 
 
略作解釋再同阿敏收線後，我邊行邊諗返幾個平行時空，諗返頭先係佢地度各自得到嘅唔同得著。
 
第一個時空話左比我聽或者我傷心左咁多年，並唔係因為我真係咁鍾意Grace無左佢唔得，而只係我自己過唔到自己個心理關口，執著唔想放棄，不斷自我催眼自己好鍾意阿Grace無左佢唔得。而為左証明自己好鍾意佢，潛意式上我唔可以比自己有康復嘅一日。而當自己習慣左衣種感覺同想法後，就更加難走返出黎。但原來只要次序同位置換一換，個感受同結果可以好唔同。所以鍾唔鍾意，有時可能都只係自己一種嘅心態而唔係一個實在嘅fact或者parameter。
 
第二個時空話左比我聽原來一直以黎有個咁愛我嘅人一直係我身邊但我都唔知，仲激走左佢制造左另一個遺憾，不過亦因為咁佢得到左幸福，完美示範左比我睇原來有時學識放手，先真係可以行得更遠，遠離悲痛。而同時間亦令我明白原來有d人有d感情，一旦錯過左就真係任你點努力都無得再返轉頭，所以我地擁有時要學識珍惜，唔好比自己將來後悔，timing過左就係過左。
 
第三個時空話比我聽，感情係無得勉強，唔係話你努力就得。係無緣，任你付出幾多都無用，但真係有緣嘅，所有感覺又都可以發生係彈指之間。有時鍾意，真係一個moment或者巧合就可以產生。”有緣千里能相會，無緣對岸不相逢”，係老土但又真實。所以感情真係無得強求，唯有平常心隨時ready，等機會黎嘅時候自己可以捉得緊。
 
同時間Mabel嘅結局亦話左比我聽好多時因為得唔到所以我地會美化左自己想得到嘅事物，但實質上可能果樣野並唔係真係咁好，就好似佢最後雖然得到左我，但之後等待佢嘅就只係不幸嘅結局。所以有時我地都唔駛咁執著一d自己得唔到嘅野，話唔定自己衣家擁有嘅野其實已經係最好。好似其他世界入面我得到過好多我衣個世界入面曾經好想得到嘅野，FWB，女神，做player等等，但最後佢地嘅結局並不見得比我好甚至係更悽慘。
 
第四個時空比我感受到做player嘅感覺，雖然係好有快感，身體上亦好滿足，但其實並唔long lasting，人同樣都需要精神上嘅陪伴，兩者係要相輔相悉互補不足先得。而同時間有d錯，係你犯左後唔知幾時會報應返自己身上，所以有時得失唔可以只係睇一瞬間去衡量而係一個整體。仲有就係，兩個人相處坦白好重要，有時一個微細嘅大話就足以造就裂痕破壞兩個人嘅關係，然後越裂越大令兩人最後分道揚鑣。


 
至於第五個平行時空，主要係貓仙人想話比我聽，係我身邊有一個幾值得我去珍惜同疼錫嘅人，只係我一直沉醉過去而忽略左佢有幾好。既然上天讓兩個支離破碎嘅心相遇，我應該努力把握機會讓兩個心可以互相依靠修復。
 
愛可以係一瞬間，忘記可以係一輩子，但係咪忘記唔到就代表唔可以擁有幸福? 感情有時唔可以太執著，又或者執著唔係問題，但你應該執著嘅係自己得到左d咩仲有d咩，而唔係執著於自己失去左d咩…
 
 
 
「總算無浪費我一翻苦心…」同一時間，空中嘅貓仙人望住地上嘅史德祖講。
 
然後又一個強光一閃好快佢就去左另一個黑漆漆地方，好似一間大型暗房咁。衣個地方有好多唔同嘅螢幕，螢幕上全部都顯示緊唔同平行時空下嘅史德祖。細心一睇，當中有唔少畫面都可以見到佢幸福嘅笑容。
 
有無出軌所以佢同Grace 好開心咁一齊抱住個BB嘅畫面。
 
有同Mabel老左但仍然周圍環遊世界嘅畫面。
 


有同Cindy夫妻檔創立左間IT公司仲拎左唔少大獎嘅畫面。
 
有同Leanne結婚然後每次拖住Leann出街好多男人都用羨慕眼光望住佢嘅畫面。
 
有佢同Jessica一齊做左情侶同婚姻輔導員嘅畫面。
 
仲有佢同Cherry好開心咁帶住小朋友同隻狗去散步嘅畫面。
 
「其實喺好多個時空你都可以有好幸福嘅人生，但無論佢地幾幸福都好，同衣個世界嘅你都無任何關係，因為你始終唔係屬於其他世界。所以你唯一可以做嘅就係喺衣個世界自己諗通可以再次得到幸福嘅方法，放低過去嘅所有執著，不論係失去左或者得唔到嘅野，然後好好珍惜自己現有嘅野，咁你先可以再次抱擁幸福，唔係就只會繼續推開幸福自怨自艾唔開心咁過一世…衣幾段旅程就當係我答謝你係河入面救左我啦。」貓仙人望住唔同嘅螢幕，然後唔知係同自己講定同空氣講。
 
 
衣個時候，我腦入面突然有個感覺，然後又拎起左個電話打比阿敏。
 
「敏呀，食飯前不如我地去寵物鋪睇下? 」
 


「點解?你想睇咩? 」阿敏問。
 
「唔知點解突然間我想養返隻貓呀，你話好唔好?」
 
「可以呀! 其實我都想養返隻貓好耐架喇~」阿敏好興奮咁講。
 
「仲有一樣呀，今晚開始，一齊睇”想見你”呀…」



全故事完