因為EX 我成為左一個禿頭嘅毒撚 然後遇到一隻猫: 68. 作者的話

史德祖嘅設定其實都算係我一個朋友嘅真人真事。中學果陣嘅佢高大靚仔，讀書同運動都算係叻果堆，所以本身個人都係自信滿滿甚至係有d囂張。但自從大學佢比個拍左好耐拖嘅女朋友飛左後，就完全變左另一個人，唔單只自信全失，個人都無晒生氣日日自閉然後變左個苦瓜乾咁。最慘係睇住佢由本身擁有一頭濃密秀髮到到兩年後變左做一個禿頭肥佬，而因為外表亦令佢本已經去到新低點嘅自信再受打擊然後漸漸變埋做一個自閉毒撚。轉眼間十多年過去，佢到現在都仍然係單身…
 
我算係同佢仲有聯絡傾到偈嘅朋友之一，前排有次有機會聽到佢剖白一d自己內心嘅感受。其實到衣家，佢話你問佢係咪真係仲好放唔低個ex所以咁，佢覺得唔係，只係太多年咁已經令佢變成左習慣，然後自己都再分唔清自己真實嘅感覺到底係點。再到衣家想重新振作，都已經有d有心無力嘅感覺。佢有試過玩交友app，但就keep住因為外表或者年紀比人嫌棄，根本無從選擇。
 
見住佢眼濕濕咁同我講好後悔自己浪費左之前十幾年青春仲攪到自己咁，再諗返以前識佢佢果種意氣風發，我都真係有種好大嘅唏噓感，然後就有左衣個故仔嘅idea。
 
作為過來人，我都曾經因為失戀頹廢過明白果種痛係有幾痛。到到中後期明明知道仲執著於一個已經唔愛自己嘅人係好蠢嘅一件事，但偏偏就控制唔到自己仲會去掛住佢，仲會幻想有一日可能有機會同佢復合，結果習慣左果種感覺後有時係會令自己更加難走返出黎。面對衣個困局，我地可以靠嘅可能就只有時間同自己有日突然諗通醒覺，又或者咁好彩有外來因素好似Jessica嘅出現咁。
 
成個故事嘅message我估都幾清楚我就唔再係度作咩補充，最主要都只係想帶出有時唔好咁執著，特別係感情，放下先可以繼續可以行落去。有d野我地已經無可能改變，所以唔好執著自己失去左d咩而應該執著於自己仲擁有d咩。感覺好多時都會呃人，唔好比自己沉淪同習慣，唔係就算幸福主動黎搵我地，我地都會不自覺咁將佢推開左，就好似阿祖初初差d就傷害左阿敏咁。
 


可能我一開始太著重每個世界d message所以寫得好平鋪直敍忽略左故事氣氛嘅營造，無咩高潮起伏位吸引唔到人睇落去，所以衣個故仔好似都算係我暫時反應最差嘅一個。
 
不過我都希望衣個平淡嘅故事或多或少可以幫助到一d仍然受失戀困擾嘅朋友。如果佢地可以透過衣個故仔得到那伯只係少少嘅安慰或者啟發，有日可以放低執著，好好珍惜自己現在仍然擁有嘅野走出困局，咁我就已經好心滿意足。
 
有時想要嘅野，未必係最好。如果有日你可以學識放下，你會突然發覺世界仍然好大，你仍然可以行得好遠去發挖更多值得你去發挖嘅野。唔係到到有日老左先後悔，就好遲架喇。我明係難，但我地必需要去努力嘗試。衣個世界從來無話無左邊個就生存唔到，我地愛人嘅同時，都要學識愛自己。除左為自己，我地都要為仍然愛我地，關心我地嘅人，早日走出悲傷重新過我地嘅生活。只有放下過去，我地先可以有機會奔向幸福嘅未來。
 
最後，好似電影咁預備左個小彩蛋比大家~