好人卡太多 所以愛神憐憫我?: 1.2

番到課室之後，我個腦完全冇時間去應付學業，而係一直係度諗「假男朋友」究竟係乜。
諗左好幾堂，我仲係draw唔到任何既conclusion出黎。
 
「究竟我有乜適合做人假既男朋友？」我自言自語
 
「呀明你講乜話？你講得太細聲。」出聲既係tommy
 
「冇，你聽錯。聽書啦，就快考試嫁啦。」
 
「哦…」


 
每間學校每班都有都有個肥仔，而tommy就係我地班嗰位死肥仔啦。
佢份人冇乜點，都係好似每個肥仔咁，樂觀隨和唔怕蝕。
就係佢依份咁高尚既精神，一早比佢娘娘收左入伍。
 
隨住教我地中文既ms chan講住最後一個廢話，終於放學啦。
每日放學既例行公事，上去7仔happy hour
我班老死每到每日放學都會去附近間7仔吹下水，講下波經女經。
 
唔好以為我地咁做好無聊，事實上我地學校規定每日放學之後所有f6一係走，一係就去圖書館自習。


 
所以7仔就變成我地既秘密基地。
可惜既係，今日冇得聽david佢地既「性經」
 
「喂行啦呀明，david佢地等緊我地。」tommy問我
 
「今日唔洗等我啦，我約左ms wong想討論一下econ既野，我有d唔明。」
 
我當然唔會直接話比佢聽有囡約我啦，仲有係女朋友喎。
雖然係假…


 
「哦咁好啦，聽日見！」
 
「唔好意思呀呀明！你等左好耐？」呀蚊終於黎左special room
 
「冇，岩岩到姐…」
 
「umm…呀明…你覺得…一個好女朋友…需要d咩條件？」呀蚊問得有d窒
哇咁直接既
 
「下…性格好就得嫁啦…」
 
我緊係咁答，唔通我直接講靚之餘仲要有波有身材，最好就唔港女啦。
 
「哦…其實呢…我父母一向唔鼓勵我拍拖…但係我婆婆佢…好想見到我幸福…所以佢一直一直都好想見到我拍拖…但係我一直都拖佢…話唔急既…但…但係婆婆佢前幾日突然有左cancer…仲要係末期…我唯一可以做既…就係還佢一個心願…所以…」呀蚊越講越激動，眼角仲開始濕濕地


 
「所以就揀左我…? 放心啦呀蚊…我明白嫁…唔好唔開心…每個人都需要去上天家嫁嘛…」我唔知點安慰佢
 
「嗯…多謝關心…」
 
「但係…點解又偏偏係我…? 」
 
「因為婆婆話一個好男人一定要主動唔怕輸，夠膽之外仲要肯嘗試…」
 
「咁關我咩事…」我完全諗唔明
 
「聽埋我講先…婆婆話最緊要就係要夠好人…所以…」呀蚊唔知繼唔繼續講埋落去
 
「所以就因為我做左咁多次好人，就代表我主動又肯嘗試…? 」
所謂既好人…當然唔係本質上既好人…而係好人卡。


「嗯….」呀蚊點頭
 
聽到依個解釋…
我應該多謝上帝比個咁美好既機會我…
定多謝自己肯一直表白，收到好人卡都唔放棄呢…
我好迷惘…
 
「所以呢呀明…聽日係星期六…我想帶你去一個地方…」
 
依一刻，我摸唔透。