那天放學後，我撞見有同學在學校後樓梯敦倫: 10 - 華國鋒

「國鋒、阿方，我哋叫你哋上嚟，因為見到你哋有執著於追求真相嘅精神，有一次事件入面可以睇得好清楚。」

在我們面前有十人，我認得他們都是中四的師兄師姐。

「學校嘅呢啲事只不過係冰山一角，事實上有更多更加嚴重嘅事我哋調查緊，我想請問你哋有冇興趣參與我哋嘅工作。」

「errrr......」

其中一位師姐表示：「我哋係一個團隊，正如黃sir喺學校門口寶馬撞Toyota嗰一單嘢，唔同角度嘅相係我哋透過團隊成功拍到，而台長就係最勇敢嗰個，每一次擔任踢爆嗰個角色。」





台長：「你哋有冇興趣加入我哋，因為我覺得你哋可以幫同學伸張正義，例如今次梁書豪同學咁樣。」

「台長，但係今次自修室呢一單嘢唔係已經完咗喇咩？」

「根據我哋嘅經驗，唔單止未完，陣間呢舖嘅嘢陸續有嚟。首先我呼籲你哋密切留意住蘇家祺同學喺今次事件上面嘅處分係點。」

「我就唔明喇。證據確鑿，仲有啲咩要質疑，記一個缺點已經好寬容。」

「阿方，梗係唔係啦。如果學校本身透過cctv睇到個真相都唔講出嚟，必定有佢嘅原因，我哋必需要密切留意住。有你哋喺同一級同埋同一個課室留意住個情況，我相信今次嘅調查應該會更加容易搵到答案。」





「痴線！根本就係亂嚟嘅。我加入冇所謂呀，一定要搵到個真相！國鋒，你決定成點？」

「好呀，等我哋一齊研究下發生緊咩事。」

**********************************
「今日陳sir又發瘟，係咁讀錯曬啲名。佢將我個名讀咗做華國鋒。」

「哈哈哈，唔係爭好遠啫，鐘國鋒同華國鋒好似意思差唔多，“國”同“華”，但係華國鋒個下場就悲慘啲啦。佢“兩個凡是”鬥唔贏鄧小平嘅“求事派”，畀人軟性政變，逼宮落台，最後晚年都幾淒慘。」

「子芊，人就係咁樣，凡事唔睇清真相然後盲目擁護人哋，最終下場都唔會好得去邊，雖然而家呢個年代壞人囂張跋扈。但係，佢將方宇軒讀做林宇軒又點解釋呢？今次你冇得兜啦？」





「阿方呢啲咁嘅人就唔使幫佢兜啦，平時成日咁串，抵佢畀人讀錯名。」

「好差囉。」

「串佢兩句啫，佢最多咪行行下街跌咗落坑渠，又唔會好似華國鋒咁樣畀人批鬥。我同意喺呢個年代，衰人永遠係恃無忌憚。話說今朝我就嚟遲到，跟住阿陳sir衝住紅燈咁叫我唔好衝紅燈。」

「笑死，佢日日都嚟搞笑。」

「今日我覺得最搞笑唔係呢樣，今日最搞笑嘅係我喺堆女仔入面聽到嘅嘢。」

「關於啲咩啊？每次提到啲女仔嘢我都唔識，你想講啲咩？」

「隻臭雞啊。」






Ig: marx_ice_
https://instagram.com/marx_ice_?utm_medium=copy_link