那天放學後，我撞見有同學在學校後樓梯敦倫: 36 - 煙頭

「煙頭喎。搞咩？」

「你問我，我可以問邊個呀？」

「我又唔係你，我又點知你可以問邊個呀？」

「我知道可以問邊個嘅話，我又點會問你呀？」

「頂！做乜春啫，我哋又唔係莊子同惠子，小學雞咁樣樣。」





「但係而家就嚟小息完喇嘛國鋒，咁而家我哋可以做咩？」

我從褲袋裏拿出手機，並把手機調教到拍照模式。

「唔理三七廿一啦，影低佢先啦。」

xxxxxxxxxxxxxxxxxxxxxxxxxxxxxx
「請問你係嚟搵邊位？」

「想請問台長喺唔喺度。」





「你等等。」

「國鋒！就嚟測驗㗎喇喎，你唔使返去溫書咩？」

「梗係有嘢請教你先落嚟啦。」

「我文科人嚟㗎喎，你問我中三嘅phy chem bi我都唔擔保可以答到你。」

「咁我問econ得唔得。」





「得！但係中三嘅econ有咩咁難呀，第一個學期咪又係淨係讀供求，你真心唔識解咩？」

「識呀。我都冇話上嚟問功課，可唔可以入去裏面再講。」

「好呀。」

我從褲袋裏拿出手機，並打開相簿。

「呢張相喺邊度影㗎，幾時影㗎？」

「呢張相係今朝喺學校三樓男厠厠格影嘅。」

「err......」





「無啦啦有個煙頭喺個廁所度，未沖嘅。你覺得係邊個揼喺度？」

「平時嘅話我可能心中有啲答案，但係今朝我哋級嗰啲煙鏟根本冇返學，呢個就係個問題啦。」

「咁即係仲有其他人？」

「呢層我就唔知喇，初中嘅話有啲人會好接近我嗰級嗰啲mk，但係去到食煙呢個地步佢哋又唔會。呢個係一個好問題。我有啲嘢拜託你。」

「乜嘢？」

「一係咁，等啦下星期五測完驗，放咗學之後你得唔得閒？」

「冇問題。」

「我帶你去一個地方。」





「好。」

「咁到時再傾啦，我學生會有嘢要處理，仲要溫聽日History測驗。」

「你剪一個好似我哋學校嘅歷史老師咁型棍嘅頭就一定合格㗎啦。」

「你條友仔喺度搞事，唔通我真係要剷曬兩邊同後面嘅頭髮，跟住將前面嗰執頭髮梳埋一邊？」


Ig: marx_ice_
https://instagram.com/marx_ice_?utm_medium=copy_link