起舞吧!愛與舞蹈的感覺: 4
「拍拖我自己點會唔知，當然冇啦」笑笑口咁回應完爹地，我就返左入房…
困左自己成晚都係間房入面，之後就係返學日子，而芝詩佢地都冇問過啲咩。
鈴鈴…，學校放學鐘聲嘅響起，代表住舞蹈堂嘅開始，咦，點解依旋佢會…
「依旋，點解你會…」「係我調佢入黎」老師嘅聲音係背後響起，咁即係…
「佢會係伴舞之一，雖然資歷比較短，但進步好快，樂盈你同佢熟，就多啲幫下佢」老師講完呢句之後我地就開始左跳舞堂，而今日練嘅係半年後嘅表演。
「估唔到可以同姐姐一齊跳，好開心」佢一邊跳一邊講呢樣野，咁我會唔會…
「盈盈」砰…，係聽到芝詩嘅叫喚之後，我就撞左埋一條柱度，好痛呀…
「哈哈…你冇事呀嘛」一路笑住一路問我安慰我，冇錯，呢班就係姊妹…
「點解唔一早叫住我…」「我地有架，你聽到先得架」嗯，我聽唔到你地叫我？
「好啦，快啲返屋企」兩姊妹一齊送我返屋企，而依旋就自己彈返自己屋企.。
「盈盈你搞咩，岩岩落堂之後一直發呆到依家…」「冇，冇事」「冇野嘅你休息下，不過唔好唔記得溫書」聽到芝詩嘅提醒不禁苦笑一下，但我比較在意係…
叮…，手機收到依旋嘅訊息，內容都係問返岩岩我有冇事咁，仲有條跳舞片…
「佢真係可以日跳夜跳，我應該點好…」唔想失去領舞嘅位置，但又要照顧…
「阿女食飯啦」媽咪叫左我幾下，之後先發現，原來我已經發左呆個半鐘…
「岩岩叫左你幾聲，冇事呀嘛？」「冇，岩岩做緊功課聽唔到」唔想媽咪擔心所以咩都冇講，而爹地塊臉冇琴晚咁黑，但仲好似覺得我係呃住佢地拍拖咁。
「你就揀科，跳舞果邊…」聽到爹地呢一句，我即刻想反枱，點解一定要停？
「唔駛，我搞得掂」岩岩先做到領舞呢個位，我一定要堅持，仲有幾年就得。
「係囉爸爸，阿女佢仲可以keep到頭幾名，即係冇問題啦」「嗯」爹地好簡單咁就回應左我同媽咪嘅回復，而今晚…我係一堆功課同溫習之中渡過…
「咦，依家幾點？」好似聽唔到鬧鐘響咁，而我一醒就已經係直曬屁股…
「阿女你醒啦？」媽咪嘅聲音係門口傳黎，咦，你唔係應該返左工架咩？
「唔好郁住，你有少少發燒，我幫你同學校請左假，抖多陣啦」媽咪講完之後就離開左我間房，而手機上面出現左幾條訊息，全部都係姊妹群發出嘅。
「盈盈你係邊」「咦，點解唔見左盈盈嘅」「樂盈？」三位同校姊妹都問我身在何處，但係依家時間，仲係上緊堂，就算復左佢地都睇唔到，唯有訓多陣…
「阿女，食粥啦」唔到三十分鐘，媽咪嘅聲音再次傳到耳邊，係瑤柱白粥！
「冇味嘅…」一副扁嘴嘅樣回應媽咪，而係大廳，我聞到有炒麵嘅香味…
「有炒麵！」「為食妹，等等啦」阿媽擺左碗粥係床頭櫃度，之後就出左房。
「盈盈？」手機上又再度出現姊妹嘅訊息，睇返時間岩岩好係小息時間。
「我冇事呀，係有少少唔舒服，聽日會返學架啦」「放學見」芝詩同樂愛都傳左呢條訊息出黎，唉，唔返一日學損失好大，一陣好返少少就開始預習先得。
「阿女，食多少少野先再訓」媽咪遞上細碟炒麵，食完就再做一次睡公主。
叮噹…，嗯，呢個時間邊個上黎？，嘩，原來已經係四點，我訓左五個鐘？
「伯母你好」「佢係房」姊妹嘅歡笑聲由門口慢慢到房門口，麗晴都一齊黎埋。
「琴日見你都冇事架」「我都唔知…，今晚教左咩？」「學霸呀學霸，病左就唔該你休息下」芝詩好快就叫停左我個問題，大家都係度閒聯，叮噹，又邊個？
「伯母你好，樂盈姐姐係唔係度？」依旋？，佢係咩地方知我冇返學架？
「佢係房」媽咪一句就令依旋直搗我間房，十分鐘內我間房就聚集左好多人。
「樂盈姐姐，今次你一定要救我」依旋見到就撲埋黎，完全唔理我病好未。
「呢課好難呀！」佢好快就拎左本書出黎，上面有好多螢光筆同好多備註…
「等我一陣…」休息左咁耐都好得七七八八，就開電腦搵返自己整果份筆記。
「盈盈睇緊…」「學霸小姐，你幾時整左咁多筆記」「我一路溫書一路整架炸，依旋過黎」係度一邊用自己份筆記講一邊配合教科書嘅例子，咁又兩個鐘…
「好啦，你好好抖下，學校見啦」芝詩佢地四個離開左我屋企，而依旋仲…
「依旋？」「嗯，我仲少少就溫完，你比多十五分鐘我」一邊用筆寫低重點，一邊用口慢慢咁講出黎，呢個就係佢嘅溫習方法，唔係唔好，但總係有啲…
「等等」終於發現有咩問題嘅我停止左佢，之後就慢慢傳授自己嘅溫習方法。
「多謝姐姐」佢聽完就執野，唔到十分鐘就離開左，呼，終於有得自習一下…
「阿女，今晚有咩想食？」媽咪係房門口問，而我就當然想食最愛果幾樣！
「好啦，你唔好溫得太辛苦，今日就比自己休息一陣」講完呢句唔到十秒就聽到閂門聲，而屋企入面，就得番我自己同一大堆公仔陪住我。
叮…，手機傳黎嘅聲音打斷我溫習嘅進度，係影天？，唔通係依旋話佢知？
「冇事呀嘛，岩岩阿妹話你病左冇返學」「冇野啦，多謝關心」簡單復左一句之後就埋頭溫習，好快就到左食飯時間，呼，今日就溫住咁多先啦。
食完飯就坐係床上面睇書，睇睇下又覺得眼訓就訓到第二朝鬧鐘響…
「Shit，琴晚冇執野添」一起身就記得未執野…，今日仲有體育堂添，咦…
「見你咁攰幫你執好哂，媽咪」見到都眼濕濕，之後就食埋早餐就返學校。
同學見到我就問我有冇事，突然覺得自己人緣值爆哂燈，而依旋佢呢…
「姐姐早晨，琴日用左你教果個方法溫書真係快左好多」依旋一邊講就一邊跳住舞，真係唔講唔知佢咁仲意跳舞，呀，今日好似要練習架喎…
「冇帶跳舞野添…」對鞋同啲衫留左係屋企，一陣又要跑返去攞添…
鈴鈴鈴…，話咁快就到放學，而今次我就以極速離開學校再極速到跳舞學校。
「呼…呼…」一入到去，芝詩就望住我，好似有咩天大嘅問題咁…
「今次表演陣容有少少改動，樂盈你黎到就岩啦…」老師招手叫左我過去，而之後宣佈嘅野，大家都嚇左一嚇…，依旋佢同我…兩個一齊做雙人領舞？
「老師，我未聽過呢樣野，係唔係真係得？」「會唔會快得濟，我覺得自己仲未得」依旋好驚訝咁望住老師，再望望我，其實依旋係有天份，但會唔會太快…
「唔駛驚，你肯學肯練就一定得」老師講完呢句就開始排練，而我有啲不安…
「呀」跳跳下，我隻腳有啲唔聽使，慢慢咁就停左落黎，休息下就可以啦掛…
「樂盈你休息下，其他人繼續…」望住依旋嘅舞蹈，我開始知道個差距係邊。
「下堂見」過多半個鐘就解散，而依旋都有過黎問下我，但我就啲妒忌佢…
「係係，今日依旋表現唔錯…」嗯？，老師同緊邊個傾電話，仲要係傾依旋