地府實習生: 再次離別

晚上，還魂崖，小冰、牛頭、孟婆、外公

【小冰睜開眼，來到地府另一個工作崗位】【小冰臨近崖邊，差少少掉下去】

小冰：   【望下面】哇，爭啲跌死我呀
牛頭：     呢度已經係地府，唔會跌死㗎。
小冰： 咁驚死囉
牛頭： 做咗咁耐，仲未習慣，後年女
小冰：   不過呢個風景又真係幾靚嘅，雖然見唔到太陽，但都一片橙色天空。
牛頭：    呢度就係你最後實習崗位，還魂崖。【指着前方】前面條橋叫孟婆橋。
小冰：   橋上好似有人喎，【對住前方揮手】喂，好似係個婆婆！
牛頭：    你嘅工作就係要幫婆婆煮同分配湯，而亡魂飲過孟婆湯就可以投胎。 

【小冰和牛頭前行】【孟婆煮緊湯】

孟婆：   後生女，過嚟幫手呀。【向小冰遞過草籃】你向前行大概10分鐘，會見到忘川，係河旁邊採忘情草返嚟煮湯，好容易咋。
小冰：  好呀，係咪每個亡魂都要飲㗎？飲完會點㗎？
孟婆：   係呀，飲完就會忘記前世今生，重新展開一段新旅途。
小冰：  【前行】  原來時間過得咁快，實習就嚟完。 

【孟婆煮緊湯，小冰向分配湯】

小冰：   下一個，張月娥

【遠處看到剛剛去世的外公】

小冰：   外公？【衝上前緊抱着他】
外公：   係咪你呀小冰？點解你會喺度嘅？係咪發生咗咩事呀？




小冰：   我好掛住你啊，我喺地府度做實習生，今日係最後一日。【抱不緊捉不到外公】
外公：   我離開咗之後，你過成點啊，有冇幫我照顧外婆？

 【小冰哭起來】

孟婆：   下一位，魯樂
外公：   係時候啦，下個到我。再見啦小冰，要好好照顧自己，可以見到你大學畢業已經好開心，未來日子繼續加油努力，我會守護住你㗎。

【外公行前，小冰拉著他】【孟婆手持一樹枝，在斗大的湯壺中翻搞】【小冰手接過外公名牌】

小冰：   我唔想，外公你可唔可以唔飲，我唔想你忘記我，你一定要搵返我哋㗎，可。
外公：   小冰呀，投咗胎你都唔認得我㗎喎，唔好咁執着啦。
小冰：   唔可以呀，你一定會認得我。
外公：   點解你咁有信心？生有時死有時，死亡係必經嘅階段，我只係去開始新嘅旅程咋。




小冰：   因為…你成世人都無忘記過你老婆同我。

【外公微笑，拍小冰肩頭】

孟婆：   為人容易做人難，再要為人恐更難，飲過五味孟婆茶，忘卻甘苦辛酸鹹。

【孟婆將湯遞給外公】

 外公：   很多離別都令我哋措手不及，學識活在當下，擁抱記憶，將呢一份記憶成為活著嘅依據，應承我要好生活！【喝下去】

【小冰皺著眉頭，淚水一湧而下，看着外公的背影】

小冰：   【望住石碑】再見，外公！
小冰： 【內心】今晚係第一次唔想合埋眼返人間。來去匆匆，好多嘢都趕唔切道別，原來唔單止喺人間，喺陰間靈魂相聚都只得片刻。