要愛情，定要麵包?: 1. 數年後的訪問

電視的時事節目之中，記者訪問緊一個人，佢比以前消瘦左、清減左唔少
 
「陳先生，請問你有冇後悔過呢?為你幾年前嘅決定而後悔」
 
陳先生摸一摸自己肝臟位置，皮膚上仲有一條清晰可見嘅刀疤。佢為左拯救一條性命，犧牲左好多野，當中包括最親嘅人
 
「我冇後悔過，因為我拯救嘅係一個性命」
 
記者寫低野後，繼續追問「有人話你當初決定好傻好天真，因為係新聞一報導出黎之後，你即晚趕左去醫院做測試，結果閣下嘅肝臟係適合病人移植，你就即時決定捐出，咁你認為自己有冇做錯到呢?」
 


諗返起當日係醫院發生嘅事，一張支票睇穿哂所有事；自私、貪婪、人性嘅醜惡，當諗起果日嘅畫面，佢自己都覺得好噁心
 
「我唔認為我有做錯過，我當日所做嘅決定都係冇錯」
 
記者睇完手上嘅資料之後再問「我地係訪問你之前，搵過你屋企人同埋呀…有機會成為屋企人嘅人啦，佢地都異口同聲話你所做嘅決定完全係錯誤，咁大舊肥肉係面前竟然唔識食，自己放走左，咁你有冇回應呢?」
 
原來相隔幾年，果D人仍然係為左一個錢字，而同我斷絕來往，只有少數明白我嘅人會知道我捐肝嘅目的，錢真係咁重要?錢換到快樂?換到回憶?
 
「我諗我冇咩野回應佢地啦」
 


「但係咁樣就失去左親情，你捨得?」
 
「冇話捨唔捨得」
 
記者再望一望資料「咁其實，點解你會立即決定捐出肝臟俾病人呢?其實你地係咪之前已經相識呢?因為當日有病人嘅中學同學話，一聽到陳先生願意捐出肝臟，仲要咁短時間之內，就只有你一個會咁做，應該話全世界可能只會得一個人會咁做。咁我地又想知你同病人之間，當時係咩關係呢?我地睇返，當時病人係由澳洲返香港，通知親友自己準備結婚嘅事，但係突然間發病，然後你就捐出肝臟」
 
陳先生諗起後生時嘅往事
 
「我同病人…係相識左多年嘅舊朋友，相處時間大約只有兩年左右，佢就去左澳洲留學。最初我地仲有聯絡，之後慢慢減少，最後佢畢業後我地失去聯絡，直到幾年前佢返香港係電視上出現」
 


一家人食飯之時，電視傳來了一則新聞
 
「一名移居澳洲嘅港人，回港探親後突然出現嚴重肝臟衰竭，被送入瑪麗醫院留醫，情況危殆，現在處於換肝名單第一位，新聞記者報導」

「有冇搞錯呀!!!要人地個肝救自己個女，係唔係人呀?」
 
「抵呢D人死啦，無啦啦去咩外國，留係香港唔好咩?發展又好，大陸又照顧我地」
 
講呢D說話嘅人，係我屋企人，一群大中華膠，永遠都係錢字行頭，冇錢咩都冇得傾，做人最緊要搵錢，返工唔開心唔緊要，最緊要賺多錢；夢想、自由、民主唔可以當飯食，最緊要搵錢；係香港除左醫科之外，最好係讀財經，因為搵錢多
 
坐係我身邊嘅Candy都非常同意，佢地屋企就更可怕，佢屋企人名言；嫁人最緊要係有錢
 
「喂!講返你地婚事先，裝修搵你舅父得啦，自己人唔洗收錢，一於係咁話啦」
 
「喂，咁你快d搵舅父傾啦」


 
「點知舅父有冇時間者，」
 
「搞錯呀!!!咁都唔得咩!!!幫下個外甥好辛苦呀?」
 
我都唔知點解會想同呢個女仔結婚，佢除左大胸之外，其他野都冇果個女仔咁好