「院長,你人生中有冇朋友係對你好重要,即使相處時間唔長?」
 
「咁一定有,每個人都會有」
 
「凌小姐…凌慧思小姐….Jessie Ling…佢就係我一生中最重要嘅人,我同佢11年前相識,9年前佢去澳洲雪梨讀書,然後我地失去聯絡,之後我一直搵佢,我用左9年近10年時間先搵到佢,我要講嘅係咁多」
 
「Clarence,你檯面上個真光校章…係屬於凌小姐?」
 
「係….香港真光中學,係Jessie母校,佢由3歲讀到19歲」
 


院長聽完我解釋之後
 
「我同意你捐肝臟,醫院會配合你」
 
「同事你需要返屋企準備?」
 
「唔需要,反正…我都係經常係醫院過夜,你地通知凌小姐屋企就可以。冇咩特別事,我返藥房先」
 
我係自己個位到嘆左口氣,希望唔會又引起屋企衝突啦
 


「你今晚又OT呀?!」
 
「係呀,妳自己瞓先啦」
 
「間屋點呀?裝修費真係要俾呀?」
 
「咁大舅父都要養家架嘛」
 
「自己人俾咩錢者,仲有呀!!我鄉下D親戚都要黎飲架!!你同我安排俾佢地靚D景呀!!」
 


「有咩事等我返屋企再講啦」
 
Candy好快cut左我線,我一直懷疑緊,點解我IVE Yr3果年會開始同佢拍拖。同佢拍拖冇耐,佢就對我想繼續讀書嘅決定好不滿,佢同我屋企好夾下,要求我盡快出身賺錢,最好就係坐係Office涼冷氣對住電腦。但係我係一個坐唔定嘅人,而可以令我坐定定嘅人只有一個,而家佢係ICU同死神搏鬥緊
 
我檯面上,有好多手術資料,老總同巨頭開完會後,將資料都拎俾我睇。雖然我只係一個SD,但係仲有少少醫學常識
 
「Clarence你決定要捐肝?」
 
「老總…我同Jessie之間,有一種特別嘅關係,我搵左佢差唔多10年」
 
「所以早年你過雪梨跑馬拉松都係為左搵佢?」
 
我伸一伸懶腰,鬆一鬆筋骨
 
「係呀,去過雪梨6次,差唔多行均成個雪梨」


 
「婚禮…可能因為咁而廷期喎,Candy佢…冇意見?」
 
「我冇同佢講」
 
「Clarence,兩個人相處係要坦白,如果你認為有問題嘅就盡快解決」
 
「我明架啦老總」
 
「我知你為左個婚禮,已經將所有積蓄扔哂落去,有問題就開聲,我地成個部門一人夾d會幫到你」
 
「唔該哂老總,我會處理架啦」
 
手術日子定係後日,而我為左避開麻煩,而選擇係宿舍留宿
 


Jessie家人收到我肯捐肝嘅消息後非常開心,佢地好想見一見我呢個捐贈者。但係我拒絕左佢地要求。同一時間,Jessie係ICU醒左,知道有人捐肝俾佢自己,佢同未婚夫非常開心
 
係手術前一日,我自己一個人去ICU到睇一睇Jessie。當時佢未婚夫係佢身邊同佢傾計,我亦都見到佢幸福嘅笑容。只要佢幸福快樂,我就好開心。