第二日嘅早上,我準時返到自己崗位,每日9點至9點半,係藥房最忙嘅時間,大量嘅藥單交到藥房,再由藥劑師檢查劑量仲有藥嘅效能會唔會對病人有影響,然後再交俾我地配藥員執藥,最後由藥劑師再檢查先可以將藥送上病房或者交俾病人。而9點15分果時,係有一個5分鐘break俾大家食餅飲水去放鬆下,就係9點半,藥房衝刺時間完左,有醫生黎搵我,連同藥劑部主管,一齊要見我
 
「Clarence!!!老總要見你!!!」
 
係我面前有主診醫生之外,仲有幾名巨頭;QM肝臟移植嘅資深醫生、QM內科主管、QM ICU主管、QM肝臟外科主管、QM藥劑部主管、HKU醫學院院長、QM院長同埋我老細,呢個陣容就等於公立醫院嘅皇馬咁樣,星光熠熠
 
「咁多位主管…早晨」
 
「Clarence請坐」
 


我坐低之後,各巨頭係到睇佢地手中嘅資料,然後醫生開始問我問題
 
「尋晚,你係咪去過ICU,探過凌慧思小姐?」
 
「係,我用自己員工身份入去,所有事係我責任」
 
「然後你做左Test,係唔係?」
 
「係」
 


「係完全出於自願,冇任何人強迫你?」
 
「係,醫生可以進入正題嘛?藥房好需要人,你叫左我呢個SD仔上黎,又叫埋我地個SP上黎,少左兩個人做野」
 
「你個肝完全適合凌小姐」醫生好快講出結果,然後會議室內嘅目光全部投向我
 
「醫生…思思…呀…係凌小姐係咪要50%成年人嘅肝先可以渡過危險期」
 
「最好係65%,但係donor有機會引起其他問題,死亡機會有0.5%,而且手術後要休養,所以…」
 


「手術個程序有咩?」
 
「正常Donor要休息一段時間…但凌小姐情況…」
 
「我捐俾佢」
 
我嘅答案令到所有醫生都好驚
 
「Clarence,我知你平時係藥房好幫手,幫埋ACC藥房,但係你唔洗同屋企傾下?而且你年尾結婚,俾你女朋友知道嘅話…」
 
「老總,你唔洗擔心,手術後我SL一段時間,一出院或者身體許可我會立即返藥房返工」
 
「唔係人手問題,而係你同屋企…」
 
「老總,乜我有屋企人架咩?」


 
老總聽到我咁講,佢冇聲出,然後到院長出聲
 
「陳偉翹高級配藥員,CW IVE 配藥及制藥高級文憑畢業,一畢業就入浸會到做dispenser,然後去OU讀Part time degree first hon畢業,之後加入HA係我地醫院做Dispenser,3年前UST Master of Science in Biotechnology畢業並同年晉升為高級配藥員,短短6年左右就升職,你絕對有資格去做一個藥劑師」
 
「係…院長」
 
「點解唔去讀書?」
 
「院長,我冇錢,而且香港嘅大學冇位收我。要做藥劑師就只可以去澳洲同英國讀書,不過我冇錢,屋企唔俾資助」
 
「大好人材…如果你要捐肝臟俾凌小姐,藥房會有咩影響?Chris」
 
「係…冇左Clarence,會少1/3戰力,永遠係朝早,佢都可以帶住新人去做野,佢都可以幫手減輕前輩工作量,佢而家28歲,係黃金時間,冇左佢…藥房會幾麻煩」
 


「直屬上司有咩意見?」
 
「如果佢堅持要捐,都冇辦法,人手方面,可以俾藥劑intern黎試下,我地SP都可以落場」
 
「OK…Clarence,我想知道,點解你要堅持捐個肝俾凌小姐?」
 
我坐低靜靜諗一諗