要愛情，定要麵包?: 7. 手術室前的準備

Jacqueline起身拍一拍自己屁股，然後做左個好意想不到嘅動作；佢錫左我一啖，仲要係錫咀。果刻我俾唔到反應佢，我只係知道自己好熱，個心跳得好快
 
「Jacqueline….妳做咩…」
 
「我代Jessie錫你一下，唔好誤會呀」
 
「我….明嘅…」
 
「聽日手術前，我地全班都黎探Jessie，你黎唔黎見佢?」
 


我擰一擰頭
 
「我明嘅，如果佢知道係你捐肝俾佢，佢一定唔會要」
 
「返上去瞓啦，放鬆d，你嘅心意，Jessie佢一定會知，我都肯定，佢知道之後，佢會作出選擇」
 
Jacqueline起身行左幾步後，又再轉身望住我
 
「你地呢對王子公主，我相信你地最後會開花結果，所以你唔好再呃自己啦，將心中嘅說話講出黎。你去澳洲又好，佢返黎又好，同所有人表明你嘅想法啦」
 


其實Jacqueline講嘅野都有佢嘅道理，不過咁做可能會破壞大家嘅幸福，可能呢個結局，對大家係最好呢，但係我搵佢8年嘅原因究竟係咩?我係咪真正放低佢?我地之間會唔會只有純友誼?我捐個肝出黎嘅原因，就係單單為左救佢咁簡單?
 
我自己靜靜躺係病床之上，係銀包暗格拎出左我同佢8年前嘅合照，相中嘅佢著住校服、扎住孖辮，我地兩個嘅笑容好燦爛，完全一點兒煩惱都冇，就係果年，佢去左澳洲讀書。
 
每一次合上雙眼，我就會見到佢著住婚紗行紅地氈嘅場面，而我，就只可以做嘉賓，或者連做嘉賓嘅資格都唔會有
 
可能我捐完個肝俾佢之後，我就會係佢生命中消失，只有我嘅肝臟係佢身體內陪伴住佢
 
自己嘅幸福，係咪一定要親手把握?定係自己愛嘅人幸福快樂就可以?
 


第二日，姐姐派完早餐果時，藥房嘅同事再黎睇一睇我，為我打氣，當日我份早餐係比較豐富，而且仲係病房姑娘請我食，因為佢地都好佩服我嘅勇氣，因為佢地都知道我要捐個肝俾Jessie嘅原因
 
有d上左年紀嘅病房助理同我傾過，佢地都知道捐肝有一定風險，同我講，今次可能係最後機會，要好好捉實，唔好再俾自己後悔。
 
病房醫生黎做最後檢查後，一打開床簾，已經見到一隻隻為錢而生存嘅人追問支票到手未。佢地其實同喪屍有冇分別?喪屍會保持生前最基本嘅行為；食，而眼前呢D屋企人，就係為左錢，兩者本質都冇分別
 
當我一被推出病房之時，Jacqueline已經帶住一大班Jessie嘅中學同學係到，我向姐姐示意停一停
 
「Jessie…已經入左手術室」Jacqueline快我一步講左我想問嘅問題
 
「佢瞓左?」
 
「嗯…Jessie爸爸想見你，不過我幫你拒絕左」
 
「都係妳最知我心」


 
「放心啦，你同Jessie一定會平安渡過」
 
「一定會」
 
「快d好返，我地仲未除到你條褲落黎，你一定要俾呢個機會我地班」
 
估唔到相隔10年，佢地仍然想除我條褲落黎