宇宙傳送門: 1.9

現時夜晚七點零四分，係我屋企門前，有我企咗係度，仲有踎咗係門前嘅一個少女。

少女見到我嚟，企咗起身，望住我，半舉起佢嘅右手，搖一搖手，細細聲同我打招呼「你好。」

「….」

「我跟住落嚟要講嘅嘢，聽落會好荒謬。」佢雙手放背後，頭耷耷咁踏前一步，諗住行近我。「我係…」

「唔好！唔好行過嚟。」我伸出右手示意想佢停係原地。





「哦..。Okay。」佢抬起頭，表情有啲疑惑。

經歷過前幾日嘅事，我第一時間嘅反應係要警戒面前呢個人。其實都估到佢話荒謬嘅嘢係咩，我都唔會好驚訝。

嚇到我嘅唔會係我將會聽到嘅嘢，而係我眼前嘅佢。

呢個少女睇落應該細過我，身高比我矮少少，同李浩朗差唔多，身型嬌小，塊面細細個，短嘅攣頭髮。

佢個樣雖然係好似我，但橫睇掂睇佢都係一個女仔。





我見到佢嘅衝擊比起上兩個仲要大。而家我面前係一個女版嘅我。

「你可能會以為我係痴線，但我就係你，另一個你。」佢繼續開口。

「平行宇宙。」我好平靜咁講。

「原來你已經知道啦。等等，定係你唔係呢個宇宙㗎？但我跟咗…」少女問。

「你叫咩名？」我問。





少女個表情帶有問號咁諗咗諗「林日星。」

「…」

「我哋可唔可以入去傾呀？」佢一隻手用手指公指住我屋企，一隻手攬住自己。

聽到呢個問題，我留意到佢着得一件長袖T恤。以而家嘅天氣嚟講，着咁少肯定會凍。

但係我仍然係好警戒佢，如果佢又係另一個痴線嘅，咁今次佢咪殺埋我？

「唔好意思，我諗唔可以。同埋唔該借借。」我行近門口準備開門。

佢好自然咁讓開「我知我哋未見過面，我都係第一次見到第二個自己，但我真係冇地方可以去。同埋我身上已經冇晒錢。」

我打開鐵閘門「關我咩事。」





「……」

「你知唔知？！」佢都冇應我，但我就自己繼續講。

「你知唔知對上一個自稱嚟自平行宇宙嘅痴線佬嚟揾我，佢做咗啲咩呀？」

「吓？仲有一個？」

「佢殺咗我媽。」我係度做緊咩，我係發緊佢脾氣？

「…..」

「所以，如果你係嚟殺我媽嘅話，你遲咗啦。除非你係想殺埋我。」我背對住佢，唔知佢咩反應，但我唔想望住佢講。





「對唔住。我唔知你阿媽..。我諗呢段時間我孤獨咗太耐，唔知點解我見到你，我好開心，至少而家知道我唔係一個人。」

「打搞晒，拜拜。」我聽住佢嘅腳步聲行遠。

我都係冇回過頭，然後開埋道木門入屋。我轉身去閂道鐵閘門，係閂埋道木門嘅時候，我望到佢係度等𨋢，佢冇望我，而我望到嘅，係佢失落嘅表情。

最後我都係閂埋咗門。我放低條鎖匙，再放低埋個背囊。我兩手放係張飯枱，撐住我向前傾嘅上身，我係度煩惱緊，係度猶豫緊，係度遲疑緊。

我維持咗呢係姿勢大約兩分鐘，最後我做咗個決定。我重新攞返條鎖匙，出屋，等𨋢，入去撳G樓。

部𨋢顯示嘅樓層不斷咁下降，而我就係度諗緊我係咪做咗個錯嘅決定「屌～」

落到嚟樓下，我左望右望都見唔到佢。然後我係周圍行下，最後嚟到一個公園仔。

原來少女日星坐咗係公園仔個石櫈度，佢都發現咗我，佢望住我，冇出聲，雙手抱住自己係度上下磨擦。





我行近問佢「你有冇殺過人？」

「我冇。」佢一刻都冇猶豫過。而且我見到佢嗰個眼神同上一個唔同，我知道由佢嘅眼神嚟判斷佢係咪講大話有啲兒戲，但呢一刻我選擇咗相信佢。

「就一晚咁多。」我叉住腰細細聲咁講，畢竟幾分鐘前我先係佢面前發咗個爛渣，可能對佢嚟講我先係痴線佬。

「嗯。」佢聽到之後，嘴角上揚，微笑咗下，就好似望住我自己笑咁，但又唔會反感。

我帶住佢再次上返22樓，今次係我同佢一齊入屋。

「同我嘅好唔同，冇咁冰冷。」佢入屋嘅第一句。

唔知佢係咪係度比較緊佢屋企，但而家對我嚟講，我屋企係冰冷嘅。





圈圈係我間房行出嚟，得到咗少女日星嘅注意。「點解會有隻鴨仔嘅？」

「Hi」少女行前踎低摸一摸圈圈個頭。

圈圈冇驚親，反而合埋眼拍晒翼咁享受緊，仲擘大個口，但依舊係咩聲都冇。

「嘩！」少女突然彈咗起身，雙手撳住雙耳。

我望住佢，完全唔知佢係咩事。

「好高音吖。」佢同我講。

我望一望周圍，又望一望圈圈，再望返少女，我係聽唔到有咩聲。

雖然都係唔知佢做乜，但我都要講下我俾佢留低嘅目的「既然你想留係度，我都想你幫我一個忙。」

佢撥一撥兩邊頭髮去耳仔後面「係。我咩都可以做㗎，煮飯、拖地、洗衫。」

「我需要嘅係，你知道嘅所有嘢。」