宇宙傳送門: 1.10

現時夜晚七點二十分，係我屋企，多咗一個陌生人，少女版林日星。

「我知道嘅嘢？」佢問。

「係。」冇錯，雖然我唔確定佢係一個乜嘢人，但佢都有有用嘅地方，話唔定佢可以幫我揾到嗰個痴線佬。

「無問題嘅，如果幫到你嘅話。」佢答應咗。

「咕咕～」





我哋嘅對話之中突然傳嚟呢個肚餓嘅聲音，係由少女嘅身上傳出嚟。

我望住佢，佢有啲面紅「可唔可以食啲嘢先呀？」佢唔好意思咁問。

講起上嚟我自己都未食晚飯，本身諗住叫外賣，但既然佢而家肚餓，我就去廚房揾下有咩食。

十分鐘之後，我煮咗兩個麵，煎咗兩個蛋、四條腸仔。一碗放係佢面前，一碗放係我面前。

少女望住碗麵，但未有起筷。既然大家都肚餓，就食咗嘢先，橫掂仲有成晚時間。





我先起筷，少女見到我食佢先開始食，原來佢係等緊我。

唔使十分鐘，我哋已經清咗碗入面嘅嘢。兩個空碗對立放係張枱，而我哋都坐咗係對方對面。我坐係右手邊，少女坐係左手邊。

成件事嘅來龍去脈對我嚟講並唔係最重要，我只係想確認一樣嘢。

「所以你係嚟自另一個平行宇宙，都係叫林日星？你幾多歲？」

「係，今年19，你呢？你係呢個宇宙嘅林日星？」





「……23。係。」「咁你係有穿越平行宇宙嘅能力？定係靠咩裝置？」

「原來你真係乜嘢都唔知，仲以為我哋全部都可以。唔係裝置，我諗係我自己。」

「咁穿越嘅方法係咩？」參考返前兩個人，答案應該係死。

「目前為止一定成功嘅方法係死。」

聽到呢個答案，雖然佢咁講可能有其他方式，但我想要嘅答案已經出咗嚟，嗰個痴線佬已經穿越走咗。

原先就大約預想到嘅答案，而家已經得到咗肯定，就算成件事情有幾荒謬都好。呢幾日接二連三發生嘅事，我所見到嘅，所聽到嘅，都好似話俾我聽，呢啲嘢係真嘅咁。

「去邊個宇宙可唔可以揀？」

「我係唔可以，係隨機。」





即係就算少女有能力，都唔一定可以揾到佢。

「所以結論就係，佢連嚟到呢個宇宙都唔知，就係因為知道我媽係度，然後就殺咗佢，而且我仲要係永遠都唔會揾到佢。」

「….對唔住。」佢用同情嘅眼神望住我。

「哼….哼….。佢就係經過呢度，周圍殺下人，然後就走？」我無奈咁笑。

眼球開始變得濕潤，淚水慢慢咁填滿整個眼球「你都係咁㗎？吓？」

「….」佢迴避咗我嘅眼神。

我企起身，面上嘅表情消失，留低嘅就只有眼淚。我已經冇嘢好講。





我行入廁所，除晒身上啲衫，行入浴缸裏面，打開花灑。

我抬高頭，合埋雙眼面對住花灑，熱水由我個頭流到腳指。眼前係一片漆黑，正如腦海亦都一樣，可以感受到嘅只有水嘅温度同聲音。

時間唔知過咗幾耐，我閂水。皮膚冒出嚟一團團嘅蒸氣。我以一個赤裸裸，濕澾澾嘅身軀就咁行出廁所。

少女企係鋅盤前，應該係洗咗碗。「啊。」佢見到我之後，細聲嗌咗下就馬上向後轉身。

我冇理到佢，行咗去窗口前，眼望出窗，風吹過我塊面，感覺好空虛。

呢個時候，一把温柔嘅聲音行入咗我對耳。

「16歲嗰年，我冇推佢，但我媽推咗佢落去，係幾日之後，我媽係同一個窗口跳咗落去。」

「….」





「我媽曾經對我嚟講，都係我最重要嘅人。以為係佢同我一齊挨過嗰段日子。原來一直係我一個。後來我大伯收留咗我，好唔容易咁，我以為可以重新開始，但我諗我條命係定咗，我注定唔會有好日子過。」

「17歲嗰年，我最後都係選擇咗自殺。…但個天連死都唔俾我，我就係咁開始咗。」

「所以，我想你知道，自殺唔會係終結。」

佢係以為我想自殺，我諗佢太睇得起我，因為我根本唔會有呢個勇氣。

我繼續無言，行咗入房，閂門，上床，冚被。

我只係好攰，好眼瞓。