宇宙傳送門: 1.14

現時夜晚六點二十分，我一個人係樓下嘅公園仔，發現我自己發緊極光。

極光？我？點解會係我？我而家係要穿越？定係我要消失？

我好驚，好驚「唔好，唔好唔好…」我合埋咗眼，行前咗幾步。

求下你，唔好！

經過咗幾十秒，我仲係處於合埋眼嘅狀態，但感覺上冇咩特別，我仲感受到我嘅心跳，，仲有呼吸，我未死。





好驚開眼之後，係一個陌生嘅地方。

我小心咁開返眼，眼前只係同頭先一樣嘅景物。

我四周圍咁望，我身處嘅地方似乎係冇變。我身上嘅極光都已經唔再閃。

但我係穿越咗？定係咩都冇發生過？

我擰轉身諗住拎返啲嘢，但我唔知係踩到啲咩，定我踩唔到地，我一下子失足，仆街咗。





我集中我嘅視線，望清楚係咩事。我見到地下有幾個明顯嘅腳印。

地下係有幾個凹咗少少嘅腳印，仲好似有啲燒燶咗。咩事？頭先好似冇㗎喎。

我沿住啲腳印一直望過去，望到頭先坐嘅嗰張石櫈度有個半圓，燒燶咗嘅凹位，就好似有人挖咗下咁。係我坐過嘅位置嚟。

到底係咩料？係我整嘅？算啦，返去確認咗先。

我準備行嘅時候，先至發現我好似用緊腳板底直接行路。





我摸下自己，我啲衫褲唔見晒，就連底褲都冇埋，我係完全赤裸裸咁企咗係度。

我即刻去拎返頭先除低咗嘅外套。

「咩料呀？」好彩我已經係樓下，唔係我赤裸咁都唔知點行得遠。

我將件外套盡量拉到最長，拉拉下都勉強可以遮到重要部位

我部電話同其他嘢係放咗係外套度，電話係我平時嗰部，我亦都開到鎖，然後我選擇打俾李浩朗。

對面響咗一下就有人接「喂？咩事吖？」

係李浩朗把聲，我冇諗過聽到佢把死人聲我會咁放心「喂？」

「喂！你冇咩事吖？成個星期都唔覆我messages。」





「我…冇乜嘢。遲下再同你講。」

「吓？不如你都係再過嚟住幾日先啦，你而家一個人，又亂諗嘢又剩咁。」

「唔洗啦，我okay。我再打俾你啦。」我收線。

如果係咁，我應該仲係同一個宇宙。但都仲有一個人要確定，少女日星。

我觀察下冇人就迅速咁行入大堂，經過同保安微笑打個招呼，因為佢有個前台遮住視線，見唔到我下身原始嘅皮膚。

入到𨋢，有一個阿嬸係隔離，我拉實件外套，若無其事咁企係度。偏偏呢個阿嬸係上21樓，幾乎全程都係一齊。

我上返22樓，攞鎖匙出嚟開門，門係開到嘅。





入到屋，周圍係熟悉嘅環境，而且客廳個梳化上面，我見到圈圈。

「你終於返嚟啦？我煮好晒㗎啦。…點解唔着褲嘅….？」少女日星係廚房行出嚟，用眼掃一掃我全身。

「哦…嗯，倒瀉咗啲嘢啫。」見到佢，我終於放心咗。佢係唯一絕對證明到我冇離開嘅證據。

「所以係條街度除咗…？」佢過嚟幫手拎走我手上啲嘢。我即刻入返房着返啲衫褲。

雖然係可以放心，但而家又多一樣嘢要擔心。我頭先應該就係發極光，照計就係要穿越嘅意思，就好似頭先個的士司機咁，但係我冇離開到，仲係同一個宇宙，點解？

「你買咗蛋糕？但係成個爛咗喎。」佢係廚房打開咗個盒。

「吓？哦。我…頭先唔小心仆街。」就係頭先馬路度腳軟嘅時候整跌咗。我應唔應該同佢講發生咩事？

「你冇事吖？跌得好犀利？你塊面青晒喎。」





「冇乜事。食咗飯先。」除咗唔見咗啲衫褲，其實我都冇其他嘅損傷，至少今次係。

我哋坐底係飯枱前，今餐比起過往幾日豐富咗好多。

大家開始起筷，我仍然表現得有啲心不在焉，少女都係度睇緊我面色，不過佢冇開口問咩事。

我突然放低筷子「你，除咗死之外，仲有冇其他方法穿越？」萬一再發生嘅話，我可能唔會有今次咁好彩。