宇宙傳送門: 1.13

現時黃昏五點三十九分，我同少女買完餸，係返屋企嘅路上。

佢行係我前面，我見到嘅係佢背面短又攣嘅頭髮，雙手連同兩袋嘢放係屁股後面。

我哋漫步行係呢條黃昏嘅道路上面，呢一刻係呢段日子以嚟最平靜嘅時間。

「你點解唔留係同一個宇宙吖？」我係背後向佢提問。

「….」





「如果係要死先會穿越到去另一個宇宙嘅話…」

「….」

「定係你曾經做過嘅嘢，令到你逼不得已一定要走？」平靜嘅時間俾我打破咗。

我哋兩個都停止咗腳步。

少女90度轉身，唔係面向我，而係面向左邊嘅嗰個黃昏景色。





由左邊吹嚟嘅微風，吹起咗佢嘅瀏海，完全咁露出佢嗰對充滿咗無奈嘅雙眼。

「逼不得已係真，而且我都覺得係因為我。」

根據返前兩個殺人犯，佢哋就連跳樓都要趕住離開，就係因為佢哋做咗啲傷天害理嘅事。

雖然睇落唔似，但始終我都只係識佢幾日，於是我單刀直入咁問。

「你做咗啲咩？」





佢再轉多90度，呢次係面對我，無奈嘅眼神變成認真嘅眼神。

「因為我留底咗。」

少女面向我，右腳向後踏，倒後咁行，我亦都配合佢嘅步速，向前行。

佢繼續講「我今次係真心想留低。但應該係由上年開始，我唔可以係同一個宇宙留太耐。因為留太耐，你哋呢個世界會有危險，而且今次比我想像中快…..啊！」

佢踩到身後地下嘅一舊石仔，身體不慎失去平衡，向後傾斜。

我下意識行快半步，放開手上拎住嘅嘢，捉住佢右手，拉返起佢將要跌倒嘅身軀。「你指嘅危險係咩？」

「唔該。」佢整理好亂咗嘅頭髮，執返起跌咗嗰兩袋嘢。「你可以放心，你唔會有機會見到㗎啦。」

佢轉身繼續踏上回家之路。





佢所講嘅危險，我諗係講緊近期嘅極光事件。所以啲極光事件之所以會發生都係因為佢？但係照而家嘅程度嚟講，都唔算係好嚴重。

原本就只有十分鐘嘅路程，我哋好快已經返到屋企。

一齊整理完買返嚟嘅嘢之後，我去咗沖涼，少女係習慣性地去準備今晚嘅晚餐。

沖完涼出嚟，我打開雪櫃，諗住飲返啲凍嘢飲。

「嗯？」原來我連嘢飲都冇晒，頭先又冇買到。

於是我同少女講聲，係佢煮飯嘅期間，我去樓下買嘢飲。

我樓下三分鐘路程有間超市，我係間超市求其揀咗幾樣嘢飲嚟買。





出咗超市，頂唔住口渴嘅我，開咗包檸檬茶嚟飲。

我邊飲住檸檬茶，邊沿住頭先條路行返去。途中，我路過間就嚟閂門嘅麵包舖。

係間麵包舖嘅玻璃櫃裏面，仲有兩件蛋糕剩低。此時此刻，我諗起嘅係少女啱啱過咗嘅生日。

唉！做咩呀我？做咩關心佢？算啦算啦，繼續行啦。

行多兩步，見到有垃圾桶，我迅速飲埋剩低嗰兩滴檸檬茶，揼咗佢。

揼完垃圾，我倒返轉頭去間麵包舖，指住最細嗰件「唔該，我想要呢件。」

係囉係囉，我買嚟當飯後甜品食啫，唔一定要生日先可以食蛋糕㗎。我咁大個人，想買咩咪買囉，係囉。

最後，我係左手一袋嘢飲，右手一件蛋糕咁等緊過紅綠燈。





紅綠燈個綠公仔彈出嚟，我就行出馬路。係呢個時候，我右手邊迎嚟一道光，我望過去，係一架紅色的士。

的士呢一刻已經離我只有六至七米嘅距離，而且我見到嘅光源係有三處，車頭燈嘅兩盞燈，最後仲有司機位有一個人形嘅極光。

我已經驚到成個人定咗格，只能夠眼白白咁望住架車駛埋嚟。

但個天可能仲未想收留我住，司機位嗰道人型極光，手搭軚盤，向左扭。

架的士係將要車埋嚟嘅一瞬間，向左急轉，一嘢剷上行人路，撞入咗一間地產舖。

我知道自己冇俾車撞，一下子放鬆咗自己，腳軟軟咁坐咗係地下。我個心跳自上一次以嚟，再次達到高峰。

周圍嘅人都嚇死「嘩！」「嘩～咩事？」





有人行近架已經不似車形嘅的士「司機呢？司機唔見咗！」

「極光事件吖！真人嘅極光事件吖！」有人大叫。

周圍啲人開始攞電話出嚟，左影右影。

當個個都將注意力集中係架的士嘅時候，都總算有一兩個好心人行過嚟我身邊，問我有冇事。

我調整好自己嘅呼吸「冇，冇事。」

我努力咁企返起身，拎返起兩袋嘢。比起司機嘅極光事件，我更加關心我自己。

我仲係驚魂未定，除咗嚇到我傻之外，我照計應該係冇物理傷害，因為架車根本冇掂到我。但我硬係覺得有啲唔妥。

我慢慢咁離開呢個事發現場，周圍嘅人已經對我冇興趣，全部人都拎住部電話圍住嗰架插咗係地產舖，出緊煙嘅的士。

我拖住呢個有啲唔妥嘅身軀，返到樓下嗰個公園仔坐低。

我慢慢咁一呼一吸，我諗係一時嚇親㗎啫，唞下應該會冇事。

我個身有啲熱就除低件外套，放埋一邊。

我雙眼望住面前嘅公園設施，公園嘅燈光昏暗，但我對眼係感覺到周圍好光。係有人用電筒照我？

我企起身，光嘅源頭唔係周圍，我望一望我對手，再望一望我個身。

就係我自己發緊光。