宇宙傳送門: 1.18

現時朝頭早八點五十三分，我、少女，仲有變態浩朗，一齊前往少女回憶中嘅茶餐廳食早餐。

原本係我哋兩個人嘅離別早餐，而家殺出咗個程咬金。

行去間茶餐廳嘅路上，李浩朗不斷咁向少女發問「你都係叫林日星吖？今年幾歲？」少女又真係好善良咁一一回覆。

然後嚟到呢個充滿少女兒時回憶嘅地方，佢兩個仍然講個不停，甚至乎少女本身低落嘅情緒都好似俾李浩朗𠱁到有返啲微笑。

一句嘢都插唔到入去，變咗我係電燈膽咁，我就好似嚟聽電台節目。唯獨今日，李浩朗個樣係我眼中真係顯得特別討厭。





直到呢餐飯食完，我先意識到原來我咁介意，就好似上次李浩朗見到我同佢家姐咁。

食完之後，我哋三個企咗係茶餐廳出面，我諗只有李浩朗係唔知道少女呢個離別對佢嚟講有幾痛苦。

少女到最後都保持住笑容「Sorry吖，我唔記得換返我自己件衫。」

「冇嘢，你着住啦。」嚟到真正離別嘅時候，我唔知應該講啲咩。

「真係走啦？樓上商場有間…嗯…有間…呢個….有間新開嘅戲院喎！不如一齊睇個早場先走啦。」李浩朗開始上網睇有咩戲。





雖然今日李浩朗好乞人憎，不過呢刻佢總算有啲用。

「我諗睇埋先都得嘅，我都好耐冇去過戲院。」少女都冇乜苦惱過就答應咗，睇嚟佢都唔捨得咁快走住。

上到嚟商場嘅七樓，係李浩朗去買戲飛嘅期間，我話想去個廁所先，少女都同行，但廁所唔係同一層，要落下面一層。

嚟到低一層嘅六樓，我同少女分開男女廁所去。

搞掂嘅我，去洗返個手，自然地對住塊鏡，檢查一下自己個樣。





呢個時候，我見到鏡入面嘅自己有啲奇怪，一邊瞳孔綠色，一邊紅色咁。

正當我注視緊自己瞳孔之際，鏡入面嘅我開始發光，極光。

「唔撚係吖？呢個時候嚟？」不過我舉起手嚟睇，我身體並冇極光，只有鏡入面嘅我有極光。

我望下塊鏡又望下自己，大家都係做同樣嘅動作，但只有鏡入面嘅我先有極光。

我放隻左手係塊鏡度，鏡入面嘅我跟住放隻右手上嚟。

我靠近去望真啲，定係呢個人唔係我嚟？

一咁樣諗完，鏡入面隻手突然五指緊扣咗我隻手。

對面隻手嘅五隻手指係塊鏡入面出咗嚟。俾佢捉住隻手嘅我，想整甩佢又整唔到，於是我就只有向後拉。





我左手一拉，對面成隻右手都俾我拉咗出嚟。

係我嚇到死嘅時候，佢終於放開咗我隻手，我坐咗係地下。

鏡入面嘅極光人出咗隻手之後，脫離同我嘅關係，唔再係鏡入面嘅我，開始係塊鏡入面爬出嚟。

佢完全成個人爬咗出嚟踎咗係個洗手盆度，極光消失咗，佢露咗真面目出嚟，佢個樣稍稍有啲改變，佢係上次見過嘅嗰個平行宇宙嘅我，有刀疤嘅我。

刀疤佬係洗手盆度落返嚟，望一望周圍「終於走到。」之後佢見到地下嘅我。

佢皺眉頭咁問「點解又….！？」

「你….」





佢出其不意咁一手捉住我衫領，呢個人好大力，佢咁樣捉住之後，我一下子出唔到任何聲音。

「究竟搞咩吖呢度？」佢個頭靠到好近咁講，我塊面谷到紅晒。

佢講完就頭仰後，大力用額頭撞落我個頭度。

受到衝擊之後，我成個人向後仆低。由細到大，身體各個部位都受過打擊，但俾人用頭撞都係第一次。

大約有三秒我係完全失去咗視野，成個人變得好暈。

「你就係呢度嘅林日星？定係林日辰？不過都無所謂啦，我都係會殺咗你。」

開始睇返少少嘢嘅我，見到佢慢慢咁行近我，嚴重感覺到危機之後，我辛苦咁雙手撐起自己上半身，緩慢咁向後爬，希望爬出呢個廁所先。

「喔～仲識郁喎。」刀疤佬一腳踩落我左腳腳掌。





「啊～～」睇嚟呢個人比嗰個痴線佬仲危險，係真正嘅變態佬。但係，點解佢仲係度？佢唔係已經傳送咗㗎啦咩？定係又係另一個同刀疤佬似樣嘅林日星？

我仍然慢慢咁爬緊出去，視野已經變返正常，佢亦都放開咗佢隻腳，我忍住痛咁企返起身。

「哼！係啦，走啦，跑啦，俾啲刺激感我。」佢趁我走到廁所門口，一腳踢落我背脊。

我接受咗佢背後嘅一腳，身體衝咗向前，再仆咗係地下。

「啊！你冇事呀嘛？」少女原本係出面等緊我，但見到嘅就係我由門口仆出嚟嘅畫面。

「你話我點估到會見到女人版本嘅自己。而家咁望真啲，又okay喎。」刀疤佬係廁所行出嚟，係少女面前正式登場。