宇宙傳送門: 1.19

現時朝頭早九點五十五分，係屋企附近商場，李浩朗係七樓，低一層有我、少女、同埋刀疤佬。

「同自己搞都幾新鮮喎，你要唔要試下？定係要我自己嚟？」刀疤佬對住少女淫魔現身。

相信少女都係第一次見到刀疤佬，之前聽我提過一次。

而家少女竟然遇到，佢嘅反應只有驚奇，佢曾經講過除咗我，都未見過其他宇宙嘅自己。

目前李浩朗係樓上，呢一層睇得到嘅視線範圍，就只有我哋三個。周圍嘅商店呢個時間都未開門，商場嘅保安亦都唔係度。





「走，上去揾李浩朗，叫佢報警。」以防萬一我連自己部電話都俾埋少女。

少女望住我，點咗點頭，轉身準備離開。

「喂吖～走去邊呀？！」刀疤佬開始向住少女跑過去。

原本仲趴係地下回復緊嘅我，快速咁企起身，撲向跑緊嘅刀疤佬，成功阻止咗佢跑去少女度，少女亦都成功向後樓梯嘅方向離開。

而家六樓就只係剩低我同刀疤佬，就咁睇佢好似冇咩致命嘅武器，所以我只要捱到李浩朗佢哋帶到幫手嚟就得。另外，我亦都唔可以俾呢個變態佬接近少女同李浩朗。





我同刀疤佬同時咁碌咗係角落頭，我好好彩咁坐咗係佢上面，稍為佔咗個上風。

俾人毆打嚟講我係經驗豐富，但打人反而係少之又少。我叉住咗佢條頸「點解你要殺我？」

雖則係話俾我叉住咗條頸，但佢好似唔太辛苦咁，佢右手握拳，向我塊面揮過嚟。

我即刻鬆開左手，身體向右飛走，一瞬間就結束我呢個上風。

佢起返身「咩都要試下啦，反正就算冇原因我都會殺咗你，因為我鍾意～。」





完全唔知佢講緊咩，總之就係變態佬一個。見住佢慢慢咁行過嚟，態度輕浮咁，簡直就係唔當我係一回事。

我嚟一個出其不意，揮拳向佢，但佢輕鬆避開。

咁大個目標，但我一拳都打唔中，佢避開晒我所有嘅攻擊。

佢一邊避開之餘，仲可以繼續講嘢「橫掂大家都係不死之身，繼續留係度對大家都唔好啦。」

對佢嚟講佢係不死之身，死咗可以傳送重生。反觀我自己，冇人可以保證我都有呢個能力，加上成功嘅方式係死，試完唔得我都唔會知，而且參考返尋晚，我應該係傳送唔到。

至於佢所講嘅唔好，應該就係講緊少女之前提及嘅強制傳送，或者佢講緊被通緝。但點解佢要咁講？佢自己走咪得囉，死都要煩埋我。

佢避完我嗰幾拳，終於出手，佢只係一個拳頭，就正確咁打中咗我塊面。

我成世人俾幾個人毆打過，佢係目前為止最大力嗰個，但佢嘅身高同體格都同我差唔多。





我啲鼻血完全唔受控制咁不停流，條腰已經彎低咗一半，完全係靠意志力企係度。我唔可以瞓低，唔可以暈低，一瞓低我就只有死路一條。

刀疤佬嘅第二拳冇諗住俾我休息嘅時間，好似成架車咁撞落我個肚。

久違地，膽汁都噴埋出嚟，我隨即跪低咗，雙手護住個肚。如果頭先嗰拳又係打落個頭度，我好有可能會失去意識，但好彩係個肚，目前我都可以捱得住。

由細到大，屋企人冇俾過啲咩我，留低俾我嘅就只有呢個比平常人更捱得打嘅抗打能力。

我要快啲起返身，呢個狀態嘅我，跑係唔會跑得嬴。只要護住個頭，我仲可以頂得住。

下一波嘅攻擊即將來臨之際「停手！」

呢把聲，係李浩朗，企佢隔離嘅仲有少女。





「點解？」點解佢倆個要自己落嚟。

「終於諗通啦你。」刀疤佬係同少女講緊「但完咗之後你都要死。」

根據我所知，李浩朗平時連行幾步路都話攰，可況係打交，佢應該係算唔上啲咩戰力，一兩拳佢就玩完。

至於少女，雖然佢睇落唔似，但佢幾好打都唔會係刀疤佬嘅對手。我連自己都只係勉強搞得掂，而家仲要顧及埋佢倆個。

刀疤佬移轉對象，開始靠近佢哋倆個。

呢個時候嘅李浩朗都算似返個男人，佢遞手護住少女係自己嘅身後「嘩呢條友，真係咁似樣都有嘅！？」

唔可以俾佢接近佢哋，要快啲起身。我好痛苦咁起返身，諗住從後箍刀疤佬條頸。

我迅速咁行近，不過都係失敗咗，俾刀疤佬識破咗。





佢轉身諗住送多拳俾我，然而拳頭停低咗。佢望住我，面上充滿住不解。

「星？」李浩朗同少女都注目緊我。

呢種感覺好似似曾相識，我望一望自己對手「又嚟？偏偏要呢個時候。」

我身上又再出現又紅又綠嘅光。