宇宙傳送門: 1.20

現時朝頭早十點二十一分，四個人全部集中咗係商場嘅六樓，刀疤佬對我哋嘅單方面毆打暫停咗，所以人嘅目光放咗係我嘅身上。

當我心急想要保護好佢哋，我嘅心跳同時亦都加速，而換嚟嘅係第二次極光。

雖然上一次係冇事，但唔知今次會唔會有變數。

刀疤佬係以奇怪嘅目光望住我，更加唔好話李浩朗，佢已經係嚇到淨係識得叫我個名「星?」

我都唔知我可以做啲咩，我都只能夠望住佢哋。





大家四目相對之際，我嘅視角開始變得奇怪，我見到前面嘅人同物升高咗。

我望落我自己對腳，我對腳好似熔岩咁將地下熔化，原來係我自己下降緊。

慢慢咁個地下俾我溶開咗個窿，同我個身體一樣大嘅窿。

「李浩朗？」我向佢哋投放無助嘅眼神。無論我點掙扎，我身體掂到嘅地方都好似俾我食咗咁，消失咗。

情況並冇好轉，我嘅極光冇將我傳送，而係令我身體侵蝕咗所有觸碰到嘅嘢。





極光冇消失，侵蝕亦都開始加速，不知不覺我己經係六樓嘅地下開咗個大窿，我跌咗去五樓。

當我即將要跌落五樓地下嘅時候，我再次係地下溶開咗個大窿，我停唔到墜落。

就係咁，我一路侵蝕住我接觸到嘅嘢，由六樓開始冇阻礙咁一路墜落。

六樓……

五樓…..





四樓….

三樓…

二樓..

我望住上面我跌落嚟嘅樓層，一個又一個同我身體同樣大嘅窿，一層又一層咁跌落去，我嘅危機意識令我想捉住身邊任何嘢，但我咩都捉唔到。

我好撚驚，永無止境嘅墜落，呢種感覺就好似我係一個有重力嘅宇宙咁，身邊咩都冇，但我係不停咁向下跌，而且我係咩痛覺都冇。

無比嘅恐懼，我會唔會一路跌落地底，跌落地殻，跌落地幔，跌落地核？

最後跌穿埋一樓嘅地下。求下你，停呀！～～

嚟到地下大堂嗰層，我將要再跌穿埋大堂地下之際，我驚到合埋咗眼。





「啊！」觸覺，我掂到嘢。痛覺，係墜落到地面嘅痛。我立即擘大眼，發現自己趴咗係商場大堂嘅地下。

我而家掂到嘅係實實在在嘅地面，我冇繼續跌落去，極光都停止咗。

我轉身望上上面，上面係一層層嘅窿，我已經唔知點去形容呢個奇況。而且我由六樓跌落嚟竟然冇死到。

我將自己撐起身，感覺到好暈，我向商場門口慢慢咁前進。路過見到企係大堂嘅保全，佢成個樣呆滯咗咁望住我。我都冇理到佢，繼續行。

我行出咗呢個商場門口，我好似就嚟要暈低，眼前嘅景物都變得模糊。方才俾刀疤佬打嘅痛楚都仲係深深咁感受到。

呢個時候，樓上傳嚟爆玻璃嘅聲音，我個頭擰過去望，有兩個人嘅身影由樓上跌落嚟。

兩個都係頭落地，血液同腦漿灑滿地。唔會呱？我單手撐住隔離架私家車，行近去確認。





行到面前，呢兩個人，一男一女，由佢哋嘅衣著可以知道，就係少女同刀疤佬。

我望上去佢哋跌落嚟嘅地方，就係商場嘅六樓，而且依稀見到有個人伸個頭出嚟，應該就係李浩朗。

我再望返係地下嘅佢哋，開始發光，最後兩個都消失咗。

去到呢度，已經頂唔順，我就地暈低咗。