宇宙傳送門: 第二幕 2.0

現時朝頭早十點十六分，我由醫院離開，返到屋企。屋企有少女日星同圈圈迎接我。

「你手上嘅係…圈圈？」我指住少女手上嘅一隻鴨。

「係吖，我前日朝早起身，佢就變咗咁啦。」

少女手上抱住嘅係一隻已經成長咗嘅鴨。呢個樣嘅圈圈，體型都係比較嬌小，奶白色嘅羽毛，黃色嘅鴨嘴，圓轆轆嘅雙眼。

後來上網揾一揾，係似科爾鴨嘅一種，係比較討好嘅外表。





「原來啲鴨係大得咁快㗎？好似冇咗中間個過程咁嘅？」我都忍唔住拎咗圈圈嚟抱下「仲以為你係異世界嘅鴨添。」

「你食咗早餐未呀？」少女企咗係廚房。

「未呀，我想沖個涼先。」

「咁我煮個麵俾你先？過多陣我都煮晏就㗎啦，但係又要買餸啦。」

「好呀。」





沖完個涼出嚟，我食住少女煮嘅麵，觀察住成年嘅圈圈，竟然進化咗都仲係咁得意，又鍾意轉圈。

「我哋而家點吖？」少女坐係我對面問。

呢句嘢雖然問得好大範圍，但處於呢個時勢嘅人都會明佢問緊咩。

我哋三個人啱啱先係醫院死裏逃生，嗰日走得出嚟嘅都係極少數人，仲要我哋三個都冇事，係超級幸運嘅事。

「我都唔知。」





「其實我有諗過試多一次，將我自己傳送走。」

「….」

「如果都係同一張床度醒返，我就係真係走唔到。」

「….」

少女走唔到，如果佢係真係棘住咗係呢個宇宙，會唔會另外嗰兩個都走唔到？會唔會嗰個痴線佬都仲係度…

鈴鈴鈴！電話鈴聲截斷咗我嘅思考。

我放低筷子，聽電話「喂？做咩？我啱啱返到咋。」

「我老豆老母唔見咗。」對面係李浩朗。





「吓？」

「返嚟佢哋已經唔係度，兩個嘅電話都係度，明明話係屋企等我哋…」

「你慢慢講。可能冇預你哋咁早到，落咗去買嘢啫。」

「冇呀，銀包都仲係佢哋房。可以打嘅電話都打晒，個個都話冇見過佢哋。」

聽住李浩朗把聲，聽得出佢心急如焚嘅心情。

「應該真係落咗街一陣㗎啫。你再等多一陣先。」

「星，你話佢兩個會唔會做咗極光人..？吓？如果…」





「李浩朗。你先係屋企等多陣先，我而家過去，大家一齊係附近揾下。同埋…」我唔係好講到出口，我都保證唔到啲咩「…未知嘅，唔好咁快亂諗嘢先。」

「…..嗯。」

我嗱嗱聲食埋個麵，然後入房再換返件衫。

出到嚟見到少女同圈圈，仔細一諗。對上一次出門口，以為一個朝頭早就會返去，點知之後隔咗十五日先返到嚟。

而家咁多不確定因素，呢次一出，又唔知幾時先返到嚟。

「一齊去啦，帶埋圈圈。」我同少女講。

「我哋都去？」

「係。」我同少女解釋返我嘅顧慮。





我同少女一人一個背囊，大家攞咗啲可能用得上嘅嘢，但都係好輕量，只係以防萬一。我亦都將我媽以前部電話俾咗少女。

我嚟到廚房，拎咗兩個罐頭，見到刀架上面嘅刀，諗下上次嗰個趁火打劫嘅阿叔，但帶把刀係身會唔會諗多咗？

執好兩個背囊之後，就要諗諗圈圈嘅容身之處，就咁抱住佢走好似唔係咁好。

圈圈而家雖然大個咗，不過size都唔算大隻，係由一個手掌size進化做兩個手掌size。

之後少女係廚房揾到個方形嘅保温袋，連我都唔知有個咁嘅袋。

呢個保温袋大細啱啱好，放兩條細毛巾之後就放埋圈圈入去，但圈圈好似唔係好樂意。

準備好出發之時，我諗起一個人。我係廚房攞咗個唔係屬於我嘅食物盒出嚟，叫少女等我一陣。





我去咗隔離單位撳門鐘「李太，還返呢個俾你先，我今晚要出去。」

李太伸手接住個食物盒「喔，咁下次先啦。」

我轉身要走之際，李太加咗句「出去要小心啲吖。」

呢句咁普通嘅說話，突然令我好有感觸。

「知道。」