宇宙傳送門: 2.1

現時朝頭早十點四十五分，李浩朗嘅老豆老母疑似失蹤，然後我、少女同圈圈執埋嘢將要前往佢屋企，睇下有咩幫手。

由我屋企出發徒步行去李浩朗屋企就二十分鐘，搭巴士就兩個站，雖然唔重，但都孭住兩個背囊同一個保温袋，所以揀搭巴士。

今次唔坐上層，下層又冇乜位，橫掂好快到，就企係度算。

我間中都睇下圈圈做緊咩，係毛巾圍繞嘅環境低下，仲要保温，佢就瞓着咗。

由巴士嘅車窗望出去，周圍都充滿迷霧，濕氣又重。二月嚟講，而家嘅氣溫都算有啲熱。





車窗嘅水珠依舊，大霧令到車速變慢，亦都令到五十米以外嘅視線變模糊。

咁大個仔都未見過城市地方可以咁大霧，唔知咩極端天氣嚟，定係或者代表住有極端天氣要嚟臨？

巴士嘅十幾米前着咗紅燈，準備減慢速度。而紅綠燈前嘅位置出現咗一個神奇嘅光景。

係呢個大霧之中，紅綠燈前有一道彩虹。彩虹約有兩個人咁高，低空咁打橫懸浮係馬路當中。

巴士係紅燈前停低，正正停係呢條彩虹嘅中間，彩虹嘅位置就係巴士嘅上層。





有幾個下層嘅乘客，拎咗電話出嚟上咗上層。但其實下層嘅我哋都可以見到，因為條彩虹都好長下。

成件事就好似有人用3D投影條彩虹出嚟咁。

「嘩～」少女睇到定咗格。

紅燈轉為綠燈，巴士開走，剩低彩虹留係度，之後都再冇見到咁嘅光景。

巴士到站，得我哋三個係呢站落車。好彩我嚟過好多次，如果唔係係呢個迷霧當中，唔識路嘅人都有機會迷路。





上到李浩朗住嗰層，撳門鐘之後係家姐開嘅門。

「喔？家姐。點吖？仲未有消息？」

家姐以一個憂愁嘅表情搖一搖頭之後，佢見到我身後嘅少女，就連平時冷酷嘅家姐都不經意露出奇怪嘅表情。

老實講我而家望少女，係我眼中已經再唔係一個女版嘅我，係獨立嘅一個林日星。

雖然之前係醫院隔離嘅時候都提過，不過對於第一次見面嘅人嚟講，家姐嘅反應係十分正常。

「佢就係平行宇宙嘅另一個我。」

「星妹？…」

「….可以唔使咁叫嘅..」





家姐比正常人更快咁接受呢個事實，畢竟都經歷過其他荒謬嘅事。

我以為李浩朗見到少女會心情好啲，但佢似乎真係好負能量，連同少女打招呼都冇。

「所以親戚朋友都出動晒，全部都話冇見過。」李浩朗嚴肅咁講，真係未見過佢咁樣。

「你哋最後一次同佢哋講電話係幾時？」我問。

「尋晚，我臨瞓前。」李浩朗答。

「報咗失蹤人口？」少女問。

「報失蹤係咪話要過四十八小時先會受理？」我問。





「唔使，我哋係諗住等下先報。」家姐答。

我行過去坐係李浩朗隔離「咁先報咗失蹤人口先，之後我哋一齊去附近揾下，咁樣好冇？」

李浩朗輕輕咁點點頭「如果真係極光…」

「先，先揾咗先啦。」我截住李浩朗呢個假設。

大家準備出發先去報失蹤人口。

「做咩你哋孭晒背囊咁嘅？呢袋又咩嚟？」李浩朗問。

「呢度裏面圈圈嚟，呢啲以防萬一。」我咁講完，李浩朗都好似明我咩意思，同家姐都執咗啲嘢，各孭一個袋。

李浩朗屋企附近，唔遠嘅位置就有差館。





等佢哋報完出嚟，我哋幾個圍埋一齊講陣間嘅行動。

家姐提議我哋分兩個一組，李浩朗同家姐要分開，始終附近佢哋熟悉啲，而且離遠見到佢哋老豆老母，佢哋會認得快啲。

家姐再建議男同女一組，佢係參照返上次醫院發生嘅事。

話說家姐自上次發生啲咁嘅事，之後好似都冇提起過，但我覺得佢應該唔係表面上咁堅強。

用以上兩個條件分組，即係我同家姐一組，李浩朗同少女一組，圈圈就由我暫時照顧住先。

雖然李浩朗同少女一組呢點我好想出聲，但始終而家係非常時期，而且家姐又講得啱，唔係計較呢啲無謂嘢嘅時候。

「記得保持聯絡。」家姐同另外一組講。





「知道。」少女認真咁回答。

我哋分組轉身，兵分兩路，一東一西，開始行動。

希望呢次分開，唔會又要隔幾十日先見返。更加希望我哋四個都安全再相見。