現時晏就一點五十三分,一劫接一劫嘅災難,眼鏡佬再次出現係我哋面前。

「我問你係咪呢個世界嘅我?」眼鏡佬托一托眼鏡。

我右腳慢慢向後退一步,準備逃跑。

眼鏡佬眼珠向下,佢注意到我嘅腳步,再托一托眼鏡,上身彎低,擺手開始跑過嚟。

我同眼鏡佬幾乎係同時起步,但我多咗個動作,就係要轉身。





「跑呀!」我再次對住家姐講半個鐘前先講過嘅嘢。

家姐抱返起係地下嘅圈圈,望住佢轉身開始跑,但我哋距離冇拉近到,反而好似遠咗。

一道阻力由後面出現,眼鏡佬捉住咗我膊頭,我成個人俾呢道阻力拉咗向後。

我雙腳都離晒地咁向後飛,然後眼鏡佬係我左邊出現,又係呢個厭世嘅眼神。有冇跑得咁快呀?

眼鏡佬一隻手拉住我,然後一嘢將我向後揼。





我成個波咁向後碌,明明上一秒都仲跑緊,而家就打倒褪瞓咗係地下。

我想咳返聲都嚟唔切,眼鏡佬就大力咁踩咗落我胸口。

「我條問題有咁難答咩?」眼鏡佬由上俯視我。

我由下仰望到眼鏡佬好似有啲嬲嬲地。

眼鏡佬拎開佢隻腳,不過佢冇放落地,而係向後拉。





仆街,佢隻腳瞄準嘅呢個角度係我個頭。

佢一腳踢落我個頭,再次俾佢當做波咁嚟踢。

眼鏡佬呢一下踢技,將我送返入頭先我自己開嘅半米窿度。

跌返入半米窿嘅我,盡快捉返啲三魂七魄返嚟,爬返出嚟地面。

眼鏡佬冇繼續攻擊我,佢嘅視線已經轉移咗。

令眼鏡佬轉移視線嘅係家姐,家姐返轉頭嚟救我,圈圈就俾家姐放埋咗一邊。

我見到家姐嗰個充滿決意嘅表情,雙手握拳放係面前,前後腳形成弓步。

家姐嘅呢個姿勢,雖然我唔係好識,亦都冇學過,但家姐係識打拳?





「好~嘈。」眼鏡佬耷低頭,將個錘仔收咗係背面褲頭。

家姐開始發動進攻,輕盈嘅身軀,衝刺去到眼鏡佬身前,一下右勾拳由下打上佢嘅下巴。

眼鏡佬俾家姐打中下巴,個頭受力向上抬。兩個人原本體格就有好大嘅差異,家姐只可以係速度上攞優勢。

家姐借住個勢,追加攻擊。正拳、擺拳同勾拳一齊運用,全部攻擊集中係眼鏡佬嘅上身。

家姐嘅每一個攻擊都擊中咗眼鏡佬,眼鏡佬上身受咗啲力而有所擺動,但佢雙腳由頭到尾都冇郁過,佢只係雙手舉起護頭。

眼鏡佬好似就係無意要避開家姐啲拳頭咁。

去到咁上下,家姐都覺得奇怪,體格幾大差異都好,都唔係咁誇張呱。就好似打緊一座山咁,然而家姐並冇終止進攻。





家姐打出佢嘅第十拳,再次一個右勾拳。今次。眼鏡佬終於有動靜,佢嘅左手接住咗呢個右勾拳,並且完全捉實咗家姐嘅右拳。

家姐想收返佢個拳頭,但完全冇辦法,眼鏡佬嘅左手鎖實咗佢。

眼鏡佬望實家姐,表情由始至終都冇變過,只係多咗一滴鼻血流出嚟。

眼鏡佬右手握拳高舉,向家姐進行第一擊。家姐及時向右側,避開咗呢一拳,但右手仍然係收唔返。

既然收唔返個右手,家姐就轉守為攻,左勾拳攻擊眼鏡佬嘅腰側,一拳又一拳咁打落去。

眼鏡佬一本初衷,完全唔避,今次仲擋都唔擋。

但忽然,眼鏡佬左手出力向下拉。呢下嘅出其不意,被捉住拳頭嘅家姐完全跟隨咗眼鏡佬嘅意願,上身一齊向下彎,係下面迎接家姐嘅係眼鏡佬嘅膝頭哥。

呢嘢膝頭哥,重創係家姐個肚度,而眼鏡佬嘅左手都終於放開。





家姐護住個肚,退後咗兩步,眼鏡佬都跟上去。

我當然冇諗住袖手旁觀,先衝咗過去先算。

而家戰況由追逐戰,變成係二對一嘅埋身肉搏。雖然我冇學過拳,但我嘅拳頭同家姐一樣,每拳都一樣可以到肉。

眼鏡佬都一樣,只係護住個頭,從容不逼咁接晒每一拳,好啱佢嗰個厭世嘅態度。

當然眼鏡佬都冇諗企係度任由我哋拳打腳踢,佢都會反擊。不過以佢嘅身型嚟講,佢嘅速度係相當之快。

眼鏡佬每三個拳頭,家姐都可以避到兩拳,而我就一拳都避唔到。

唔只眼鏡佬唔迴避全部嘅攻擊好奇怪,佢連唔用佢個錘仔都好奇怪。佢係唔想殺我哋,定係想赤手空拳打死我哋?





然後,過咗幾十招之後,眼鏡佬仍然係企直係度,家姐同我就跪咗係地下,喘晒氣。

我見到家姐都已經嘴角含血,我自己都口腫面腫。

我諗我哋兩個係完全冇勝算,但我感覺眼鏡佬唔係要殺咗我哋。

「我只係想你答我一條問題。」眼鏡佬開口。

「你係咪呢個世界嘅我?」佢第三次問。

我無可奈何,唯為點頭。係咪答咗佢,佢就會收手?

眼鏡佬見我默默咁點咗頭,然後佢慢慢咁行過嚟我嗰邊,拎返個錘仔出嚟放係膊頭,係我面前踎低。

家姐見到咁,努力咁起返身,想過嚟救我。

眼鏡佬擰個頭望向家姐「我今日唔會殺兩位,我已經到咗七個人嘅名額。但係..」

「我聽日開始會留一個俾你。」眼鏡佬望返住我講。

眼鏡佬講完,企返起身,推一推副眼鏡,轉身離開。

眼鏡佬離開嘅時候,圈圈跑咗去佢身邊,打開晒對鴨翼同把口咁對住佢。

眼鏡佬同圈圈眼神對峙咗幾秒「你,太嘈。」

「如果係你嘅話,都唔算係超出名額。」眼鏡佬對住圈圈舉高錘仔。

「唔好呀!」
已有 0 人追稿