宇宙傳送門: 2.6

現時晏就兩點三十一分，我同家姐因為眼鏡佬冇晒名額殺人而逃過一劫，但眼鏡佬轉向圈圈落手。

「唔好呀！」

眼鏡佬對住圈圈高舉佢個殺戮錘仔，不過佢遲遲都未落手。

我諗住衝過去救圈圈，但眼鏡佬放低咗個錘仔，望咗去佢嘅左手邊「喔？」

見佢停咗手，我暫時鬆咗一口氣，小心咁接近圈圈抱返起佢。





眼鏡佬冇理到我，專注力繼續放咗係佢嘅左手邊。於是出於好奇，我都跟住望過去。

佢嘅左手邊，我嘅右手邊，除咗霧之外，我見唔到有乜特別，亦都聽唔到有咩聲音。

眼鏡佬究竟係見到啲咩？

「砰！」一下槍聲響起。

現實生活中，我未聽過槍聲，只係電影或者電視劇聽過，但呢下絕對係槍聲。





望返眼鏡佬，額頭中槍，錘仔跌咗落地，佢都隨之跌落地。

我望向槍射過嚟嘅方向，仍然未睇到有啲咩。點解突然會有槍？對方係呢度嘅人定係第二度嘅人？

家姐過嚟拉走我「走啦，仲望。」

俾家姐拉走之際，終於見到大霧中有啲身影，有一班人嘅身影。

係呢堆身影當中，忽然有一條嘢伸咗出嚟，直插咗去眼鏡佬個身入面，眼鏡佬個身體俾呢條嘢慢慢咁拖走。





我見到拖走眼鏡佬嘅呢條嘢，並唔係普通嘅一條繩，而係一條粉紅色嘅肉，就似係青蛙嘅脷咁。

呢條青蛙脷大約三隻手指咁闊，青蛙脷上面仲有啲一粒粒凸出嚟嘅肉粒。

呢個時候家姐同我已經匿埋咗係隔離棟樓嘅牆後面，我哋係牆後面小心咁偷睇。

頭先係霧裏面見到嘅身影係人形嚟，都有一定嘅高度。

但伸咗一條咁長嘅青蛙脷出嚟嘅話，到底係咩生物嚟？青蛙人？仲要有槍？

我哋嘅位置同嗰堆神秘生物都有啲距離，仍然係睇唔清楚佢哋嘅真樣。

佢哋將眼鏡佬拉到將近自己嘅範圍，不過呢個時候，離遠都見到眼鏡佬嘅身軀開始發出極光，然後冇耐就係佢哋面前消失咗。

嗰班神秘生物見到眼鏡佬消失咗，就圍咗一圈係度開會，隱約都可以聽到幾句聲音。





「¥*€^%%…..***¥¥€*^%*…..」

完全就係一堆冇聽過嘅語言，而且可能唔係地球嘅語言。真係青蛙人？外星人？但頭先嘅槍聲完全就係地球有嘅槍聲嚟。

佢哋開完會，準備離開，向我哋嘅方向接近。再近少少，再等多少少，就可以見到佢哋嘅真面目。

「啊！」我隔離嘅家姐忽然叫咗一下，佢腳附近有一隻狗嘅屍體，戴有頸圈，應該係寵物犬，但啲內臟係跌晒出嚟。

家姐即刻用手撳住自己把口，但都已經太遲。

我同家姐對望咗一下之後，一齊向後跑。

我一路跑，一路祈禱佢哋唔好開槍。





呢場大霧，再次成為我哋嘅幫手，幫忙遮掩我哋嘅行蹤。

跑到咁上下嘅距離，我哋判斷應該係安全，唔會追過嚟，就停低咗。

由珠寶店開始，接二連三嘅危機，而家終於可以休息下。

如果頭先唔係家姐唔小心叫咗出嚟嘅話，就應該可以見到佢哋係咩嚟，起碼可以知道係咩生物威脅我哋。不過再留多陣都唔一定安全。

我周圍望下，根本已經係迷晒路「已經唔會返到轉頭啦。」

「着返件衫先啦。」家姐係背囊拎佢件外套出嚟。

「啊！……唔該。」方才太多危險，都唔記得咗我係全裸，仲要連背囊都冇埋。

氣温本身已經熱，我哋又不停咁郁，我全身都爆晒汗，家姐都唔例外。





「家姐，冇事吖？」我指住自己個嘴角嚟提家姐佢嘴角有血。

家姐用手指公抺一抺嘴角嘅血「冇事，你仲慘過我。」

而家休息落嚟，我先慢慢感受到頭先打鬥完嘅痛楚。

而家唔好話同李浩朗佢哋會合，係連保住自己條命都難。又係強制傳送，又係第二個宇宙嘅我咁。

呢場大霧都係一把雙刃劍，人哋睇唔清我哋之餘，我哋都睇唔清人哋。

如果個個都似少女咁走唔到嘅話，即係可能會愈嚟愈多嘅我嚟殺我。

由而家開始真係要打醒十二分精神。