宇宙傳送門: 2.32

現時夜晚十一點十八分，我仍然係自己一個人係間房入面。

由我閂埋房門嗰下開始到而家，冇人入過嚟間房，我亦都聽唔到出面有咩動靜。

呢段時間我個腦冇停過，一個人諗咗好多嘢。完全忘記咗食嘢同去廁所。

於是，我打開房門，諗住出去屙尿，順便睇下咩環境。

一出到去，周圍冇任何嘅燈光，大家都應該瞓咗。





我見到梳化上面，家姐打側背住我咁瞓咗係度，而地下就有個爆炸頭細路同圈圈瞓咗係度。

經過大門嘅時候，見到大門係被爆開咗，而爛門嘅隔離就坐咗林日辰係度。

林日辰並冇瞓覺，只係坐係度，望住我。佢係守緊個門口？

我同林日辰互相對望，冇人郁，冇人開聲。

幾秒之後，我無視咗佢，然後經過李生嗰間房，我可以想像到門後面嘅嗰股負能量。





屙完尿出返嚟客廳，家姐坐咗起身「你係咪肚餓吖？」佢嘆住氣咁問。

我摸一摸自己個肚仔「嗯….」

家姐之後又再拎咗碗麵入嚟間睡房，然後佢閂埋咗道門，坐咗係地下，我嘅隔離，一齊挨住張床。

「你點….」「對唔….」

我同家姐同時咁開口講嘢。





「對唔住。我今日….」

「得啦，得啦。你食咗先啦。」

雖然唔係一個完整嘅道歉，但我見家姐都好似冇乜嘢，我就放心食咗嘢先。

我食食下「…嗯。但係呢，你知唔知我隻腳咩事？」我抬高自己隻綠色雀腳俾家姐睇。

家姐望住我隻雀腳，反應淡定，應該都唔係第一次見到。

「當時真係以為你今次死硬，呢啲時候可以係邊揾醫院，有醫院都冇醫生。」

「….」

「但係，就係大家都冇晒辦法嘅時候，然人唔知對你做咗啲咩，然後你又有極光出嚟，斷咗嗰個位。」





「極光？然人?」然人？日本名嚟？

「嗯，即係個細路，之後你就生咗而家呢隻腳出嚟，血都止埋。」

「就係咁….順利？」即係話，呢隻雀腳係由我自己傳送過嚟？又關個細路咩事？

雖然唔係人腳，但都救咗我一命。而且，就連神經，血管嗰啲都自己完美咁連接到。到底我係咩人嚟？定係嗰個然人幫我？

「咁李生呢，佢點吖？」

「嗯….佢自己鎖咗係對面嗰間房，冇出過嚟。」

「李太係咩事，幾時發生㗎？」





「難產。就係尋日。」

「….」

「個林日辰，係佢救咗我哋？」

「林日辰係嗰個男人個名？係，係佢救我哋出嚟。」

「….」

「你想點打算？我哋一齊走佬？定係要趕走個林日辰？」家姐問。

「我唔知….」

「我覺得，林日辰的確係殺人犯，但如果佢要對我哋不利，佢都唔使搞咁多嘢。」





「….」

「我唔係話要你原諒佢。或者放過佢，就當係放過你自己。」

「….」

「如果你要報仇殺咗佢，你就同佢一模一樣。」

家姐講完呢句，我有啲心虛。佢係唔希望我好似林日辰咁殺人，但我已經唔係佢所諗嘅人。

雖然對我嚟講係有充分嘅理由，但我的確有殺過人。

「你唔係一個人㗎。」家姐向我伸出手「雖然係好老土，但握實拳頭只會整痛自己。」佢打開我隻手，攤開我手掌「手唔鬆開，何來捉住其他重要嘅人。」家姐用佢温暖嘅右手握住咗我冰冷嘅左手。





家姐並唔知道真正嘅我，我做過嘅嘢。我唔知應唔應該捉住佢呢隻手，我望住佢握住我隻手，我仍然係攤開晒啲手指。

我覺得我所做嘅選擇，冇分對與錯，只係取捨嘅問題。

係呢個環境，要繼續捉住重要嘅人嘅話，我必須要作出取捨，剷除威脅。

我好厚顏無恥咁捉住咗家姐隻手，向佢回應咗佢對我嘅期望。