宇宙傳送門: 2.33

現時朝頭早嘅十點十六分，林日辰入咗嚟間睡房，同場嘅仲有嗰個然人同佢手中嘅圈圈。

「你冷靜完未？定係你又想再打過？」林日辰問。

「你講嘅共識到底係乜嘢？」

「….」林日辰揾咗張凳坐低「我救走你嘅原因係因為你唔可以死。至少我係咁認為係。」

「吓？」





「正如你所見，你嘅宇宙七國咁亂，亦唔知咩原因，另一啲平行宇宙嘅我哋就留咗係度，走唔到。」

「咁關我咩事？」

「其他平行宇宙嘅我哋會嚟殺你。」

「….？」

「其他人認為，係呢個宇宙嘅你令佢哋走唔度。加上呢個情況係從來未發生過嘅事。」





「…. 咩邏輯嚟？」

「繼續留底嘅話，就只會愈嚟愈危險，對我哋呢啲死完又復活嘅人嚟講簡直就係地獄，所以唔走唔得。」

「….」

「從來冇一個嘅我哋係會留咗係自己嘅宇宙。係我揾返你之前，我係呢個宇宙已經遇到兩個係咁諗，呢個解決方法應該係佢哋認為最簡單，反正大家都係不死之身。」

「….」我仲係唔太明白佢講乜。





「但我唔係咁諗，因為殺咗你，冇證據證明可以解除呢個詛咒。或者呢一切真係因你而起，但假如你真係死咗嘅話，冇人知會發生咩事，可能會有更嚴重嘅影響。」

「….」

「所以，你暫時唔可以死住，係一切都有確實嘅證據之前。」

「….」

「共識就係，我會保護你，而你唔會因為要報仇去殺我或者避開我。」

「….」

「加上你似乎同我哋嘅能力唔一樣，有必要搞清楚先。」林日辰望住我隻雀腳講。

其他人要嚟殺我？因為我其他人都唔可以離開呢個宇宙？所以少女走唔到係因為我？要我死少女先可以離開…？「咁你係點揾到我？」





而家周圍環境咁大霧，佢可以揾到我都可以話係奇蹟。如果知道咗個方法，話唔定佢可以幫我揾返李浩朗同少女佢哋。

林日辰指住咗隔離個爆炸頭細路「佢可以係一定範圍內感知到其他人。」

「即係你揾到我嘅？」果然呢個細路真係可以用超能力。即係佢可以揾到李浩朗佢哋。

「仲有你隻鴨。」林日辰再指向圈圈。

「？」

「我最多只可以定位，但我唔會知道嗰個係邊個嚟。」第一次聽到然人開口講嘢。

「即係咩吖？一次過講清楚得唔得？」





「然人佢只可以話俾我知邊度有人，而嗰個人係咪你就唔清楚。關鍵就係呢隻鴨嘅叫聲，然人佢話佢完全聽唔到，只有我聽到。」

圈圈嘅叫聲？之前少女都曾經講過，但我都完全冇聽過圈圈嘅聲音，仲有嗰個眼鏡佬都有提及過「似乎係只有其他宇宙嘅我先可以聽到嘅叫聲。」

「咁樣嘅話就有個大問題，即係話其他宇宙嘅我哋都可以揾到你。」

如果林日辰可以靠圈圈嘅叫聲揾到我，即係少女佢都可以揾到我。唔應該係我哋去揾佢哋，應該係等少女揾到我哋。

「所以，如果唔搞掂隻鴨，其他人嚟殺你只係時間嘅問題。」

「唔得。你夠膽掂佢，我就即刻殺咗你。」

「….總知我就警告過你。」

我諗咗一陣頭先嘅對話，然後望住個爆炸頭細路「你叫然人吓話？你係咪可以感知到其他人？」





「嗯。」

「嗰班面具人，你嗰日有冇殺咗佢哋？」我問林日辰。

「我只係救咗你哋出嚟，我冇咁多時間解決埋佢哋。」

「你會唔會可以揾到佢哋出嚟？」我問然人。

「….」然人望一望林日辰然後先答我「我知道佢哋係邊。」

「….！」

「因為我哋同佢哋嘅距離唔遠，只要係一定範圍内，我一直都可以感知到佢哋嘅位置。」





我聽完之後，望向窗口，再諗咗一陣。

「我唔會原諒你，亦都唔係你嘅同伴，但如果你對我有利用價值嘅話，我可以暫時唔報仇。」我同林日辰講。

「….」

「我可以同你達成你個共識。」

「….」

「但你哋要帶我去揾嗰班面具人。」