宇宙傳送門: 3.4

現時凌晨唔知幾多點，係十秒之間，一下子發生太多事，令我冇晒時間觀念。

因為我本人嘅失誤，意外咁打亂咗成個突襲計劃嘅開端，嘈醒咗身處三樓嘅面具人。

林日辰突然一聲令下，衝咗出去，我從後跟住。

原本黑暗嘅戰場，由然人係我身後射出一道光，賜予戰場一點嘅光明。

原本全部人都係一樣嘅條件，如果突然有光，大家都需要差唔多嘅時間去等雙眼適應，不過然人呢一下照射，造就咗個差異。





突如其來嘅光線由我身後射出，所以由我同林日辰嘅角度嚟講，光嘅強度比較弱，並唔係直接照射落我哋雙眼，因而眼睛所需要嘅適應時間相對較短。

相反，電筒照過去嘅方向，正正就係嗰班面具人嘅正面，對佢哋嚟講，光線嘅強度較高，甚至乎係閃住佢哋對眼，所以佢哋所需要嘅適應時間相對較長。

就係咁，然人造就咗我哋嘅優勢。

等到我雙眼都適應咗光線之後，可以睇清楚前面嘅空間係咩情況。

首先，由樓梯跑出嚟之後，係一個四四方方，完全空曠嘅空間，對面係一排冇玻璃，只剩低窗框嘅窗口。





左邊只係一面石屎牆，而右手邊就有一條黑暗走廊，但未有時間去睇條走廊通去邊度。

係我右前方嘅係林日辰，以跑緊嘅姿勢，右手握刀衝向前。

再係林日辰前面嘅有六個人，冇戴面具，佢哋只係某部分人手持武器。由於強光照射，有啲合埋咗雙眼，擺出痛苦嘅表情，有啲係單手手臂遮住咗雙眼。

然後，有零丁一個人係左邊角落頭，再係嗰六個人嘅身後仲有啲嘢，但時間太短，我嚟唔切望清楚係咩嚟，不過我好似見到有一排牙，一排有半個人咁高嘅利牙。

不過，然人話呢度總共有十個人，地下嗰層搞掂咗一個，應該仲剩九個人先啱，而面前只有七個人，仲有兩個人去咗點？





點都好，我哋要好好利用呢個短暫嘅優勢，先發制人，要先搞掂面前呢六個人先。

林日辰係短時間內已經將手上把刀插入最前嘅敵人個肚度，然後拔刀嚟個轉身，避開面前將要倒下嘅身軀。

林日辰轉身嘅時候，可以見到佢個殺人嘅眼神，仲有大啖呼吸緊空氣嘅口。

林日辰轉咗身之後，右手同時轉咗握刀嘅方向，一嘢插入下一個人條頸度。

林日辰係呢一瞬間就解決咗兩個人，成個空間就剩低五個人。

我都唔可以剩係望住林日辰，我都要行動先得。

係我面前有兩個人，頭先我望林日辰嘅期間，浪費咗幾秒，免費俾咗敵人時間去適應雙眼。

而家係我最面前嘅人，應該已經可以睇到啲嘢，佢對眼開咗一條罅隙，面開我，高舉長刀，衝緊過嚟。





我雙手持刀，本來應該係要用刀插佢，但未用過利器傷人嘅我，下意識都係伸咗隻右腳出嚟先。

伸完隻右腳出去，我先記起我呢隻右腳係一隻怪獸雀腳嚟。

雀腳一嘢踢落嗰個人個肚度，但並冇將佢踢開，反而係捉實咗佢。

我用隻雀腳係嗰個人個肚度收緊利爪，四隻利爪完全插入佢嘅體內。

通過啲爪，我可以感受到被強行穿透嘅皮膚，同扣住佢內臟器官嘅感覺。

呢下連我自己都有啲徬徨，然後我諗住收返隻腳，但我未完全控制到個力度，隻腳仲係扣住佢個人就開始向後扯。

首先，嗰個人俾我扯咗過嚟，跟住係途中，佢個肚開始被撕開，扯咗啲內臟出嚟，大腸、小腸…，一大堆血淋淋嘅嘢出晒嚟。





最後我右腳力向後揈，嗰個人嘅身體向我身後飛走，然後佢嘅內臟同血散落一地，有啲皮膚組織同部分內臟都仲插住咗係我啲爪到。

我自己都嚇到呆咗，更加唔好話係後面睇住嘅人。佢都睇到傻咗，一時之間郁唔到，好恐懼同荒謬咁望住我身後嘅嗰具屍體。

我好快冷靜返落嚟，揈一揈走雀腳上面嘅內臟，之後用銳利嘅眼神望向前面剩低嘅敵人，準備繼續開戰。

目前，呢層解決咗三個人，剩低四個人。