宇宙傳送門: 3.5

現時凌晨唔知幾多點，復仇之戰已經展開，多得然人突然其來嘅電筒照射，仲有我隻雀腳，一瞬間解決咗三個敵人，面前剩低四個敵人。

係我身後嘅，係一具內臟走晒出嚟嘅屍體，而係我前面嘅，係暫時俾我所嚇親嘅兩個敵人。再加上，佢哋終於見到我個樣，所以仲加驚。

嗰日便利店嘅嗰班面具人，除咗郭俊言之外，其他面具人我都未見過樣，如今我終於見到佢哋嘅真面目。

一個係素未謀面嘅男人，同我差唔多年紀。另一個我都有印象佢係當年中學，郭俊言嗰班人嘅其中兩個。

而且係呢個時候，我見到呢兩個人嘅後面行嚟一個人，原來係角落頭嘅嗰個人就係郭俊言。





「What the fuck?……」郭俊言難以置信咁望住我。

呢三個人應該冇預過我竟然冇死到，更加應該冇預過我會自己出現係佢哋眼前。

我舉起右手把刀，指住郭俊言「我同你講過…..，我要你死十次。」

講完呢句嘢，我眼角嘅餘光發覺有啲唔對路，係我嘅右手邊應該係仲有個林日辰先啱，但而家咩人都冇。

我稍為擰少少面望清楚，右邊只有地下瞓係到嘅三具屍體，而林日辰就不見其蹤影。





所以林日辰係搞掂咗三個人，然後消失咗？

係我身後嘅然人應該察覺到我嘅疑惑「佢入咗去右邊個走廊，嗰邊仲有兩個人。」

原來仲有兩個人係右邊走廊，咁樣十個人就啱數。

林日辰自己走咗去解決走廊對面嘅人。佢竟然揼低我一個？點解唔係一齊搞掂埋面前嘅人先？呢個死痴線佬！

而家唔見咗林日辰，得返我自己一打三，原本對我哋有利嘅情況忽然一轉直下。





問心嗰句，我係冇信心可以自己搞掂三個人，但都已經冇時間去猶豫，因為前面嗰兩個人已經高舉武器，凶神惡煞咁衝緊過嚟。

而家唯有頂硬上，一係就我殺死佢哋，一係就佢哋殺死我。

「啊～」對面最前嗰兩個人壯烈咁大嗌，一個揸住把刀，一個揸士巴拿。

對面兩個都兜頭咁劈落嚟，於是我就舉起雙手，用兩把刀各自接住佢哋兩個武器。

雖則我接住咗佢兩個嘅攻擊，但佢哋並冇就此停手，瞬間再利用身邊其他部位進攻，一個右腳，一個左腳，佢哋起腳踢向我腹部。

佢哋嘅呢下起腳，令我束手無策，因為我雙手要繼續擋住頭上面嘅攻擊，已經冇多餘嘅手可以防禦，所以佢哋嘅攻擊自然就正中紅心。

我受到正面攻擊之後，雙手嘅兩把刀都鬆開咗，跌落地。

原本身體理應係向後仆落地，但跌到一半，大腦都冇反應得嚟，我隻雀腳就已經郁咗，向後一踏地，大力抓實地面，好穩陣咁支撐住咗我向後仆嘅身軀。





連我自己都冇預想到隻雀腳會咁有用，不過就係我個腦暫時諗緊其他嘢嘅時候，嗰兩個人已經到咗我面前。

佢兩個人原本預計我係會向後仆，所以已經衝咗過嚟想乘勝追擊。

雖然我冇好似預期咁跌低，但我因為暫時分心咗，所以對佢哋嚟講都係冇乜分別。

佢哋再一次兜頭攻擊我，刀同士巴拿一齊來襲，呢次我都係難去迴避，一嚟反應慢咗，二嚟我隻雀腳抓到塊地實一實，一時之間我抽唔出嚟，不由本意咁將自己鎖實咗係原地。

呢幾個禮拜以來，我都經歷咗幾次嘅生死關頭，知道接近死亡嘅嗰一瞬間係咩感覺，嗰一種嘅絕望，嗰一刻放棄嘅念頭。

不過，今次唔同，我冇嗰種絕望嘅感覺。如果係普通人，呢種情況係必死無疑，但可惜我唔係普通人。

如今應該話，好彩我唔係普通人。