想死之前破處嘅我好似做咗渣男: 師生戀呢啲嘢都係AV入面睇下就算
跟住落嚟段故一樣喺中五嘅時候發生 可以話喺開學典禮嘅時候開始 嗰陣時學校唔知點解請咗兩個後生嘅女TA 對於男校嚟講就好似將兩隻全身綁滿咗A5和牛嘅羊仔揼入獅子籠咁 不過我哋其實係間操行冇乜問題嘅乖乖仔學校 老實講就冇我講到咁誇張嘅 純粹係唔少人都多咗共同嘅意淫對象 食飯嘅時候亦多咗個話題咁解 但係阿叔我一向最鐘意鑑賞師生類成人作品 不願意let my wet dreams be dreams 成日都FF有咩機會可以同佢哋有劇情發展 可惜現實總係令人失望 理所當然地 頭嗰幾個月我同佢哋係乜嘢交流都冇嘅
我地學校中五嗰時就迫每個人都要揾返個學會玩下 我冇乜特別有興趣 又唔想入啲多人嘅學會同人爭位 唯一叫做擅長少少嘅就只有睇外國YouTuber打機學返嚟嘅英文 於是就求鳩其揾左班朋友仔揀左個英文學會做副會長 心諗反正應該都冇乜嘢搞 可以輕輕鬆鬆做個冗員 同一時間 由於中學嘅時候我成績還好 而且份人唔識拒絕 喺啲老師眼中係個有責任心嘅好孩子 換句話講係個好使好用嘅工具人 所以我亦都被人推咗做班長 當時我哋班參加咗個英文集頌比賽 英文miss見我有呢種雙重身份 諗都唔諗就叫咗我做埋leader 最後基本上乜叉嘢都係我負責曬咁濟 成日準備啲到時要用嘅props整到勁夜 間中直情同啲老師一齊放工 不過冇計 呢啲被迫參加嘅比賽鬼有人有心機搞 掉哪媽 頂硬上 反正都係 不如就特登做夜啲 睇下博唔博到撞正其中一個TA放工時間 有一日 又真係我冇為意嘅時候先發現有位姐姐同我一齊走出校門 嗰次就係我同TA小姐嘅第一次真正交流（我同另一位TA冇故事 所以下述嘅TA小姐都係講緊呢位）
咁呢次部份人為嘅偶遇其實都幾尷尬 雖然我之前成日收英文miss order幫手做嘢 收下功課 搬下英文書 或多或少都同TA小姐有啲交流 不過通常都淨係講句thank you u或者骨morning就冇嘢好講 再加上我讀咗五年和尚寺 冇乜機會掌握同女性面對面溝通嘅技巧 根本就冇頭緒點樣同佢開始對話 係行咗幾步之後 我先勉强提起勇氣同佢打咗聲招呼 而出乎意料地 佢跟住都幾主動咁樣同我傾咗幾句閒偈 問下我做乜搞到咁夜 住邊呀嗰啲 詳情我唔係好記得講咗啲咩 不過考慮到嗰陣時我又緊張又有少少攰（兩個藉口） 應該都係覆咗啲毒撚式對話嘅嘢 但係唔知講到啲咩 TA小姐突然叫我估佢嘅芳齡 我嗰陣時好識做咁扮諗咗陣 跟住答咗18 佢先笑住咁開估 我先知原來我同TA小姐都已經差咗一個十年 學柴九哥話齋 人生唔係好多個十年 我經歷咗一個半多啲 而TA小姐就已經差唔多三個
嗰次嘅對話雖然短 但我相信同TA小姐嘅距離都拉近咗少少 起碼令到佢知道有我呢個人嘅存在 出街撞到會認得出我個撚樣咁囉 之後每次幫英文老師做嘢嘅時候 見到TA小姐我都會借啲意傾多兩句 然後去到學期中嗰時 我哋個學會搞咗個每年都有嘅班際歌唱比賽 要搵啲老師做裁判 TA小姐主要係負責英文科嘅嘢 而且佢係喺之前嘅午間音樂會其中一個有份出嚟唱下歌仔嘅教職員 咁我當然就冇放過呢個機會提議邀請佢啦 亦都十分主動咁搶咗聯絡佢呢個職責 嗱我唔敢話自己經驗豐富 更加唔敢話識溝女 但係阿叔我可以好肯定咁話問人攞IG一定係十分重要嘅一步 有IG就有story睇 亦都有story畀人睇 自然就容易啲格硬迫啲話題出嚟講 所以我聯絡TA小姐嘅時候搵咗啲藉口冇問到佢電話而係問咗佢IG 喺搞完呢個歌唱比賽之後 我就開始比較積極咁覆佢story撩佢傾偈了
就好似之前提到嘅兩位小姐咁 同TA小姐傾偈又係傾咗年幾兩年都冇乜大進展 不過可能因為今次個對象係一個比較成熟嘅女性 我覺得我哋傾嘅話題好似比過往深入 甚至令到我自以為是咁覺得我對TA小姐嘅了解深過對其餘兩位嘅了解 首先我知道TA小姐其實同我一樣都係有少少情緒問題 可能物以類聚 emo始終會被emo吸引 我就係一隻成日畀呢啲想熄嘅火吸引嘅emoth （呢句將emo同飛蛾moth兩個字合埋咁食字係咪好有文偽feel呢） 所以兩個可憐人聚埋一齊其實都幾啱傾 另外我又知道咗原來TA小姐以前嘅男朋友就係喺我間學校到畢業 而且佢一直都放唔低佢 呢個亦都係佢過嚟做助教嘅其中一個原因 簡單啲講 我同時知道咗呢段又係另一段唔會有結果嘅單戀 不過老實講 我都唔可以肯定咁話我係真係鍾意咗TA小姐 如果你仲記得嘅話 起初其實我接近TA嘅目的係比較接近肉體方面 但係實際上傾熟咗之後 就好似一隻攞到核桃但係唔識開殼嘅傻鳩馬騮咁樣 我反而唔係好知應該點樣處理或者看待呢段關係 溝我又唔覺得我溝到 要攻到入城除咗要過一條叫「年齡代溝」嘅護城河 仲要攀越一幢叫「前男友 」嘅高牆 難度實在太高 另一方面 我又唔係幾好意思用咸濕嘅眼光看待一個不知不覺已經成為咗朋友嘅女仔（ 呢段期間我連老師本子都睇少咗 ） 最後我都係用返之前用過嘅策略 持觀望態度咁樣stay as friends
期間 我哋間中返學放晏嗰時會一齊食lunch 亦都試過單獨出嚟食一兩次飯 不過相處時候都只係普通朋友嘅feel 唯一一次令到我有心動嘅感覺 就係有日小息我同班bro周圍鳩fing嘅時候見到佢 四目交投咗一下 佢望住我哋成班人就只係對住我一個笑住咁打招呼 連我身邊班友都察覺到 當然啦 呢樣嘢可能只係我呢個想像力豐富嘅毒撚喺度FF 不過次次諗返起呢個畫面都會令到我聯想起九把刀嗰套那些年 所以為咗諗落開心啲我當係真㗎喇 講起又講 其實我同幾位女性嘅相處亦都幾似那些年 男女主角雖然相處得快樂 但係兜兜轉轉都係冇得走埋一齊 最後冇得擁有對方 留低嘅淨係得美好嘅回憶
後來 去到我畢業嗰時 同TA小姐見面嘅機會少咗 傾偈亦都少咗 慢慢就失咗聯絡 而家我喺IG見到佢好似已經喺另一個地方做緊嘢 唔知係咪仲單身 點都好啦 我都費事隔咁耐仲搵返人咁尷尬 依家只希望佢可以幸福 話唔定有一日可以見到佢喺story入面拖住前男友嘅手