講完啲無謂嘅插曲  係時候講返M小姐呢個主線劇情 上上回講到M小姐有咗男朋友 而你聽完上兩段故 應該都知道我另尋對象亦都唔太順利 所以我始終都係放棄唔到呢段情 時間仲係中五 我一邊應付校內試嘅同時 一邊成日搵三位小姐R水吹 聽落就好似好充實 實際上諗返起其實都幾可憐 我唔算成日chur住人 應該又未去到被人當做狗公啩 但係又真係同隻追住個波畀人撚嘅狗仔冇咩分別 跑嚟跑去但最後都係得個吉 (不過三位小姐都冇乜波 ha) 

直至有一日 就有啲tvb膠劇都寫唔出嘅劇情出現咗 喺我如常WhatsApp M小姐唔知講咩廢話嘅時候 覆我嘅唔係佢 而係一個自稱係佢表妹嘅人 我依家盡量用記憶重現返我哋當時嘅對話 

「(M小姐)唔喺度呀,我係佢表妹,借咗佢電話用。」 

「吓 ,你好地地做乜要借人電話用。」 

「我部電話壞咗呀 ,咁啱嚟探佢有啲悶咪借咗嚟玩下。」 



「佢又咁順攤借畀你嘅,佢唔駛用咩?」 

「我哋由細玩到大好friend㗎,佢都唔介意比部電話我睇,佢用嗰時我咪畀返佢囉。」 

「…ok,但你唔使幫埋佢覆我啩?」 

阿表妹已讀咗我 隔咗陣先覆:「其實你係咪鍾意我表姐呀?」 

我屌 呢位神秘嘅新角色除左迫我用標點符號之外 仲五句都冇就突然問埋啲咁嘅問題 嚇到我心都離一離 嗰陣時我冇認真考慮嗰條問題 因為我已經知道答案 反而我比較顧慮嘅 就係呢個究竟係咪M小姐嘅表妹 如果係M小姐本人扮緊嘢 咁我答錯就傑㗎喇喎 係男朋友就仲大劑添 雖然我冇做過亦都冇講過任何越界嘅嘢啫 但係一個唔小心畀人塞入行李箱棄置草叢都唔出奇 面對咁峰迴路轉嘅劇情發展 我即刻去搵咗班A0軍師幫我做情報分析 但係面對咁大粒花生 係冇朋友會有心情幫你 所以呢單嘢都係要我自己拆掂佢 



「咁我假設你真係佢表妹啦,你點解要咁問先。」 

「其實我睇咗你哋啲對話,所以你唔使答我大約都feel到㗎啦,我冇我表姐咁遲鈍。」 

我屌 

「咁你都知佢有男朋友㗎喇…」 

我屌我屌我屌 



「…其實佢哋感情唔係幾好。」 
已有 0 人追稿