「呀?」 我本來已經做好畀表妹鬧嘅準備 

「其實你知唔知佢哋兩個係點樣起埋一齊㗎?」 

「唔知 ,冇問過。」 我點會有興趣問呢啲傷心事 

「其實佢哋係聯校活動嗰陣時識嘅,條仔起初淨係教佢做數,然後教多咗就熟咗。」 

你老味 教數我都識啦 唔搵我 



「然後條友冇幾耐之後表白,表咗好幾次先成功。」 

「咩話?即係佢起初被人拒絕咗都繼續呀?」 

「佢試多咗幾次之後,表姐就有一半嫌麻煩,一半畀佢打動咗,決定接受咗佢。」 

扑你個臭街 唔係呀話 雖然我明溝女呢啲嘢就好似博演唱會飛咁 一係要夠早一係要有錢 但我實在估唔到死纏爛打都得到米 

「 我都覺得表姐因為咁就同人拍拖唔係幾好,不過又費事咁多口, 但係佢男朋友好似都察覺到我唔係好鍾意佢。」 



「Ok…咁點解你話佢哋感情唔好嘅?」 

「可能因為咁,佢男朋友都成日針對我,搞到我同表姐都好唔開心。」 

講到呢度 我都開始冇懷疑同我講嘢嘅人係咪M小姐表妹 

「除此之外,佢哋又成日因為啲小嘢嘈交,有時仲搞到我表姐喊添。」 

老實講除咗齋聽之外 我都唔知可以畀咩反應好 不過話唔嬲就假嘅 嬲自己同時亦嬲佢條仔 不過條女又唔係我嘅 嬲嚟把撚咩 唯有死死地氣咁問句:「點解你要同我講呢樣嘢嘅?」 



表妹又藍tick咗我一陣先覆:「其實我睇你哋啲對話,覺得你嗰人都幾暖男,對我表姐都幾好。」 

「Err…thx?」 

「你幾高呀?冇矮過我表姐吓話?」 

「唔知喎我得兵長咁高。」 

「咁得啦,冇問題。」 

我冇覆佢 

「…唉你自己睇下點啦, 呢排我次次見到佢條仔都覺得煩,知道佢成日整喊表姐我都唔好受。」 

「…多謝你同我講咁多。」 



「咁又唔使,我就快要畀返部電話表姐啦,呢段對話我等陣就del㗎啦,費事畀佢見到。你…加油啦。拜拜。」 

就係咁 我完咗同M小姐表妹第一次亦都係最後一次對話 表妹最後嗰幾句說話 雖然冇畫公仔畫出腸 但係同眨單眼講句「你識做啦 」冇乜分別 咁我都覺得正常人都睇得出呢個係一個萬年難得一見嘅機會嚟嘅 比你知道咗自己鍾意條女同條仔有感情問題已經少見 上次A小姐有個好姊妹做助攻 今次直情有個由細玩到大嘅親戚提供幕後情報 可能世界上有時真係會有咁大隻蛤乸隨街跳 但係你淨係睇住佢跳唔識捉埋係冇用㗎 廢柴如我 冇即時把握呢個機會 反而攝高枕頭諗咗幾晚 

一方面可能係因為我一直都係一個好多顧慮嘅道德撚 始終都係覺得撬人牆腳唔係幾好 另一方面 其實我都冇信心畀到幸福人 我之前第二章都講過下我嗰個反智嘅愛情觀 對我嚟講 拍得拖就有責任要畀到幸福人 我知咁樣對個對象嚟講可能好沉重 所以呢樣嘢應該都只會係在心中 雖然我話知道佢條仔整喊佢有啲嬲 但係我都唔敢寫包單擔保我真係可以完全咩問題都冇咁一直同佢相處落去 我知道呢個係一個好離譜嘅要求 但係我始終阻止唔到自己鑽牛角尖 係咁懷疑同否定自己 可能就係因為咁 我同之前提到嘅兩位小姐傾咗咁耐 最後都係唔敢進一步發展同佢哋嘅關係 

結果我有兩個選擇 一係就大膽啲 趁呢個機會積極啲溝人 或者再賤格啲慫恿佢同條仔分手 雖然我知唔係話做就做到 但係起碼試過唔會後悔 另一個選項就係繼續做佢朋友 以朋友身份陪住佢 睇下可唔可以幫到佢修復同佢男朋友嘅關係 但係呢個選項對於我嚟講應該同俾人凌遲冇乜分別 簡單啲講 我需要揀嘗試直接定間接畀幸福佢 最後 我揀咗折磨自己
已有 0 人追稿