《藍藍》〈科幻/奇幻〉: 第二章 初「蟹後」

第二章 初「蟹後」

日子一日一日咁過, 藍藍都大個咗好多了。有一日, 爸爸又帶藍藍出嚟玩…🎉

照往常一樣, 藍藍好開心咁跑到鞦韆方向去。但係今次爸爸要忙自己事, 所以冇陪佢去玩。佢跑下跑, 跑下跑, 前面遇到Coco…

藍藍响遠處已經望到Coco企咗喺鞦韆前面！ 呢個Coco同以往一樣, 岳高頭, 下巴對人, 擺到明就係一副霸道嘅態度, 似乎係想攔住藍藍嘅去路。藍藍見到Coco個一貫霸道嘅姿勢, 都企定定喺度唔敢再行前。

Coco見到藍藍咁驚, 更加持住大家姐嘅姿態, 慢慢一步一步咁行過去進迫。藍藍呢一刻心裏面真係一步一驚心, 佢唔忿氣又唔想退讓, 因為自己鍾意玩嘅鞦韆就喺面前, 自知如果自己唔爭取就冇, 但係又怕被人打, 都夾硬企喺原地扮鎮定… 🥶🥶🥶





Coco越行越近, 終於行到藍藍面前了。 Coco呢個時候見到一個已經變得身材高大嘅藍藍, 已經唔係昔日嘅小小藍藍, 個心都有少少怯一怯, 喺度諗：「呢個死靚妹, 唔見一排點解高咗咁多, 佢已經同我差唔多高… 唔係, 佢已經高過我少少, 而佢個態度似乎轉咗強硬, 佢唔係想反抗㗎嘛…😠 唔得, 我係大家姐, 唔畀啲下馬威佢睇, 以後我仲喺度有定企？ 😡」

Coco為咗保持大家姐嘅地位, 結果選擇出手, 起手一掌打向藍藍。 呢一下竟然被藍藍一手捉住, 而且大力揸住Coco隻手, 令到Coco痛到嗌咗出嚟, 藍藍更加揈開佢隻手。 藍藍心裏面喺度諗, 自己終於出手了, 何來咁大嘅勇氣, 個心不停猛烈咁跳, 好緊張, 但面對前面嘅玩具, 意識話畀佢聽今次一定唔輸得, 結果籃籃一巴掌向Coco嗰塊面「啪~」一聲打過去, 令到Coco非常尷尬, Coco自知力量已經唔係藍藍之上, 唯有死死地氣離開。

深深不忿嘅 Coco於是走到 Lice身邊, 伏响佢心口求安慰。Lice都係想當年睇住爸爸帶 Coco返嚟, 從小已經當佢係親妹妹咁照顧, 有咩好食嘅、好玩嘅、好睇嘅, 都一一分享畏呢個妹妹, 甚至乎幫佢吹埋頭, 整理髮型呢啲貼身事情, 一一都無私奉獻。

藍藍又驚又喜喺度諗：「我係咪打贏咗佢呀, 我係咪發緊夢呀, 係咪真㗎~😱」自從果日起, Coco再唔能夠欺負藍藍了, 呢一切亦都畀响遠處嘅爸爸完全偷偷望到, 所以爸爸就再冇為藍藍嘅小菇屋單位上鎖了, 以後畀佢自由出入🚪。

每當爸爸入嚟呢個正方立體的「起居室cube」空間, 藍藍就算休息緊都會立刻彈起身, 走到爸爸身邊, 展示美麗的衣服, 為他跳舞, 而且嗲爸爸同佢一齊玩玩具, 氹得爸爸好歡喜。日子久了, 藍藍的生理時鐘就跟了爸爸的了, 其他「人仔」亦都係。





註：「人仔」就是藍藍、Coco 和 Lice那些矮小的人類品種, 跟爸爸的「大人」種, 是不一樣的人種。「人仔」是爸爸的寵物。「人仔」同「大人」嘅語言不通, 響「人仔」耳入面, 聽到「大人」講嘅講嘢聲係 「si si sap sap」 嘅聲音, 相反「大人」亦都聽唔明「人仔」講乜嘢。

由於藍藍已經可以自由出入, 有一次响夜闌人靜嘅時候, 佢自己走出佢自己嘅單位房子, 打算四圍探索, 認真睇下出面cube其實係點樣樣嘅…

佢出到門口, 細細力閂好門, 再回頭睇下自己嘅房子, 原來係一個蘑菇形的小屋, 紅色菇頂係屋頂, 下面牆身就似菇菌類嘅直條纖維, 係一個好可愛嘅小屋。小屋附近不遠, 分別都放咗兩間小屋, 一個似居酒屋, 另一個就係格子圖案, 應該就係哥哥姐姐住嘅房子。

藍藍再環顧周圍, 除咗呢三間小房子, 爸爸放响中央的梳化和架空咗嘅電腦桌外, 似乎呢個空間咩都冇喇。呢個空間對人仔嚟講真係好大, 無論長、闊、高, 都有差不多7個「大人」嘅高度, 即係大約42個「人仔」咁多。牆身都係白壁無暇, 全密封空間, 但係爸爸根本唔係呢個cube入面, 唔知爸爸平時可以响邊度出入的。

佢正想再周圍摸索下出口, 呢個時候從唔知邊度傳嚟一陣拉小提琴嘅聲音🎻。藍藍好奇, 細心聽下音聲响邊度嚟, 佢合埋眼, 腳步跟住音樂方向行🎶, 行咗好耐, 「碰」一聲, 佢個頭撞到埋牆了~





「痛死我喇~ 已經到咗牆邊, 呢度一啲野都冇啵…… 依~唔係喎~」抬頭一睇, 牆身上面有一條直上天花板嘅壁梯可以爬上去。由於呢條樓梯係設計畀大人爬上, 對人仔嚟講, 就算爬一級都好辛苦。藍藍基於好奇本性, 決定爬上有42個同佢相等身高嘅梯爬上去🧐。

好奇心下不顧一切, 佢已經唔記得咗自己著住一條迷你裙仔。 佢試着雙手揸住上面嘅「橫樑」, 再用雙腳搖上去夾住, 就好似「燒乳豬」嘅姿勢, 但係力有不逮, 只係差在轉唔到個身體上去。

之後, 佢改用另一個方法, 佢用佢雙腳夾住側邊的「柱」, 再用雙手揸住上面嘅「橫樑」, 一下一下腳咁夾上去, 至屁股能夠爬上橫樑就坐低休息一下, 如此類推。

當爬到第5級, 呢個時候 Lice哥哥聽到外面有聲音就出咗嚟睇下, 佢見藍藍爬咁高有危險, 就跑上前問佢咩事：「喂! 𡃁妹, 落返嚟呀, 唔好玩啲咁危險嘅嘢啦… 我以前年輕嗰陣時冇而家咁肥都爬過, 但係我爬到一半就放棄咗啦, 你唔會爬到上去㗎!! 放棄把啦, 跌死你呀~😱😱」

藍藍對住地下嘅Lice哥哥單一單眼就話：「唔緊要㗎, 你畀我試下啦, 多謝你關心♡~!」

於是, 藍藍冇理到哥哥繼續爬上去, 著住迷你裙的佢, 露出了一條白色三角底褲, Lice睇到流晒鼻血, 唯有合埋雙🙈, 盤膝挨住樓梯邊坐住等, 結果都引來 Coco都出埋來。

Coco見到藍藍爬到咁高, 心諗鬼唔望佢跌死, 一邊拉走Lice對佢講：「死仔包, 你望夠未呀, 依家睇靚女唔理我啦！😭」Lice 雖然係出於真正關心, 但為免Coco嬲, 只好跟住Coco走了。

另一邊廂, 真係唔好睇少藍藍嘅好奇心, 佢一路爬, 心裏面諗住其他開心野, 唔諗爬柱的辛苦, 反而令佢繼步繼步, 不知不覺已經爬到頂, 摸到天花板了👍！





藍藍心諗, 天花板雖然無縫, 但係呢度放了一條由地面至天花的長梯一定係有用的。藍藍坐响最高果條「橫樑」望返落去自己間小菇屋, 已經變得好細少, 好細少, 如果呢度跌落去, 一定實死無生🥶🥶🥶。佢再四圍張望, 見到梯上柱邊接近天花處有一個細小的黑色鏡面, 於是就爬多兩步上去睇睇係咩嚟。

好了, 爬到了果個放置响高高在上嘅「黑色的鏡子」, 藍藍望一望, 果塊鏡只有佢一隻小眼睛咁大左右, 於是, 佢哄塊面去塊鏡果度, 爬梯上的天花板隨即解出一個正方形嘅裂縫, 向上輕微推上, 果塊正方形板就攝入到某處內牆裏去了。 藍藍見到咁覺得好驚訝, 佢見有得再上, 於是繼續爬上去, 從打開咗嘅正方形天花板爬入去…

爬到裏面之後, 竟然有另外一個好大嘅空間…

呢個空間同下面嘅正方立體空間cube完全唔同, 首先抬頭一望, 係畀一塊全透明、圓拱形突出嘅超大玻璃罩罩住呢度整個空間, 而玻璃罩下低嘅牆腳大概只有藍藍嘅高度咁高。由於呢度係全天幕嘅玻璃罩罩住, 上到來好自然就會被呢度外面嘅景觀包圍住咁, 外面係一個…

對藍藍嚟講完全係震驚, 呢度係一個一望無際嘅繁華星空, 非常偌大的星空！而且重有好多一條條架空嘅透明管道, 分別有紅、綠、藍三隻色, 管道裏面有好高速嘅物體不停閃過, 閃過時留低一兩秒嘅殘光影。

藍藍出世到而家第一次見到無窮嘅星空, 佢睇咗好耐先定落嚟, 佢記得返上來嘅目的了, 就係為咗音樂🎶嘅來源！佢再細心聽下, 原來果啲小提琴聲係隔離果個玻璃罩傳過來。於是, 藍藍就爬高, 爬上玻璃罩的「窗台」企上去, 終於見到了！

隔離果個玻璃罩裏面有一隻「蟹」, 其實係有一個同佢同類嘅人仔戴住了「蟹蟹」帽背住藍藍, 佢側起一邊頭, 夾著小提琴, 閉上眼睛拉出優美樂曲🎻🎶。藍藍聽得陶醉, 聽得扒向窗台, 讓手托著頭, 繼續聽。





當「蟹蟹」拉完後, 回頭一望, 就見到對面有個女仔睇住佢拉, 「蟹蟹」覺得非常尷尬, 面都紅埋, 急急忙忙收起佢嘅小提琴到盒子裏。原來蟹蟹係一個男仔, 響藍藍眼中覺得佢好QQ, 而且表示欣賞佢嘅才華, 所以對住蟹蟹點咗一下頭微笑回報😊。

就呢個時候, 天空上突然… 睇得藍藍毛骨悚然。天空上, 空間之中, 出現咗一個巨大的、而且似液體一樣嘅、又似水流又似啫喱嘅物體「游動」。呢件物體移動嘅時候會不斷變形, 而且係全透明, 要向折射下嘅星光好細心先見到佢, 呢個物體愈飄愈埋, 開始飄到來, 藍藍驚到花容失色, 驚佢會唔會嚟食咗佢, 佢於是不顧一齊跑返落去下面自己屋企匿埋。反而蟹蟹處變不驚, 見到對面個女仔咁驚逃跑, 覺得佢好有趣, 留下咗深刻嘅印象。

藍藍好快就跑返自己屋企, 即刻衝上床, 用大被冚住自己匿埋。當佢鎮定落嚟, 不知不覺已經瞓著咗了😴😴😴。

待續~