【校園】想成為您的治癒: 01. 解題者
「唉⋯真係唔識做呀⋯！點算呀⋯」邱茗然攬住西史書，同張萱淇一齊由樓上嘅課室行番嚟，「中六第一個小測就咁唔順利，點算？」
「你次次都咁講㗎啦，冇事嘅冇事嘅～都係溫書test嚟啫！」張萱淇伸手搭住邱茗然嘅膊頭安慰道，「暑假冇溫書，有少少唔記得係正常嘅Okay？」
「唔Okay⋯」邱茗然抬頭望住張萱淇，開學第一個test就唔太順利，對佢嚟講完全唔係件好事
邱茗然同張萱淇行入課室，邱茗然行番埋位，發現自己嘅數學書仲喺枱上面，啱啱去上西史堂嘅時候，佢都唔記得咗收番埋本數學書先再去上堂
「係喎⋯仲未計到條數⋯」邱茗然坐低後將西史書放入櫃桶，然後將放喺角落頭嘅數學書放到自己面前，打開cal機，準備再諗下啱啱計極都計唔啱嘅數學題
一掀到數學練習嘅一頁，邱茗然望住書頁呆咗，然後望住數學書細聲地講：「邊個⋯」
邱茗然因為唔想寫錯嘅答案落堂課簿，所以用黃色嘅memo紙寫低貼喺書中，因為錯咗無數次，答案擦咗一次又一次
但令邱茗然愕然嘅係，喺因為擦咗無數次而有密密麻麻嘅鉛筆痕旁邊，有一個好清晰嘅解答步驟
「邊個寫㗎⋯？」邱茗然疑惑地望住貼喺書中嘅memo紙
邱茗然望一眼嗰個人寫嘅答案，又掀到書後面睇一睇正確答案；邱茗然望住嗰個人寫低嘅正解一臉愕然，呢條題目係練習題裏嘅進階題，仲要打咗三粒星喺度，冇一定嘅頭腦能力，大概會解好耐都解唔開
「邊個咁勁解到呢題呀⋯？」邱茗然仍然目瞪口呆咁望住題目嘅正解，喺回神後嘅第一件事係抬頭望向黑板，「啱啱係X1嘅堂⋯我地班房係用嚟上咩堂⋯？」
「茗然，去唔去toilet呀？」張萱淇手拎住一包tissue走向邱茗然嘅座位
「哦好呀⋯」邱茗然遲疑地點頭，然後合上數學書行出座位，「淇淇你知唔知我地班房用嚟上咩elective？係唔係Chem呀？」
「我地班房呀？唔⋯」張萱淇稍微沉思，「好似真係Chem，做咩突然咁問嘅？」
「冇，問下啫～」邱茗然搖搖頭，喺心裏默默地道：「邊個寫㗎呢⋯下次睇下先～」
⋯
「上次題數學題唔該你！！！」邱茗然喺Memo紙上寫低，然後貼喺放喺枱上
邱茗然故意將中文書放喺枱上遮住貼喺枱上memo紙，只將memo紙露出一個角，因為接住落嚟係X1堂，邱茗然好好奇嗰個人會唔會睇到，然後回答佢
「茗然，行啦，上堂啦！」張萱淇行到邱茗然嘅座位，邱茗然及時地將中文書移好位置，然後拎起西史書就同張萱淇一齊行
「叮噹叮噹，叮噹叮噹～」
邱茗然同張萱淇一齊行番課室，番到嚟嘅時候，Chem堂已經落咗堂，喺課室嘅同學都係佢地班嘅同學，讀Chem嘅同學早就各自番咗自己嘅班房
「唔知佢有冇睇到？」邱茗然番到埋位，中文書仍然喺原位，邱茗然有啲期待咁拎放喺枱上嘅中文書移開，「佢答咗⋯！」
對方喺邱茗然寫嘅感謝字句下以整潔工整嘅字體寫上四個字：「只係順手」
「都太順手啦掛⋯幫人地計埋答案⋯」邱茗然無奈地望住貼喺枱上嘅memo紙
⋯
「我真係好好奇佢係邊個⋯」邱茗然望住memo紙喺心入面道，然後拎起原子筆又喺memo紙上寫道：「你係邊個？」
「茗然，行未呀？」張萱淇行到邱茗然嘅座位問道
「行啦行啦！」邱茗然依舊將上一堂嘅書放喺枱上，將memo紙遮住
等到X1嘅堂完結之後，邱茗然由上西史堂嘅課室番去自己C班嘅課室，但同琴日一樣，一向準時落堂嘅Chem堂已經完結，讀Chem嘅同學都已經番咗自己班
「佢地落堂都落得幾快⋯佢地一打鐘就落堂㗎⋯？」邱茗然不禁喺心裏默默地講道，「唔知佢今日有冇答？佢係邊呢到底？」
邱茗然行到番埋位，坐低後將上一堂嘅書推開，見到memo紙上有對方嘅文字回答：「讀Chem嘅」
「多謝晒⋯你同答我係人類有咩分別⋯？」邱茗然一臉無言地望住memo紙上嘅回答
⋯
喺下次嘅X1堂時，邱茗然喺紙上又寫：「你咩班？唔講得係邊個？」「E，你估」
「咁神秘⋯？」邱茗然望住對方寫比佢嘅回覆，「又唔可以知係邊個⋯」
「點呀？你個Pen friend未覆你呀？」張萱淇唔知幾時企咗喺邱茗然隔離，彎腰同邱茗然一齊望住張紙同時好奇咁問
「覆咗啦⋯」邱茗然無奈地抬頭望張萱淇，「佢死都唔肯話我知係邊個⋯」
「冇計啦～Chem次次都咁準時落堂，你唯有希望佢唔好咁準時，比你見到係邊個啦～」張萱淇一個小跳步行到邱茗然前面嘅座位坐低
「好好奇想知佢係邊個。」邱茗然望住手中嘅memo紙，將紙對摺放到櫃桶，「但次次Chem都咁準時⋯想八卦下都唔得⋯」
「比我睇下～」張萱淇伸手想要嗰張memo紙
「要嚟做咩呀⋯」邱茗然將memo從櫃桶拎出嚟放到張萱淇嘅手中，「你知係邊個？」
「唔知喎～」張萱淇一臉輕鬆咁聳肩，打開張紙望住紙上寫嘅嘢，「啲字咁整齊，應該會係女仔？」
「係唔係女仔？」「唔好深究」
「只係好奇，畢竟你幫我解咗題數學」「舉手之勞，唔洗太好奇」
「你啲字好好睇，好整齊」「你啲字都好睇」
「到底佢係邊個呀⋯好想知⋯」邱茗然拎出對方寫完放咗喺佢櫃桶嘅Memo紙，打開只見對方讚佢嘅字都好睇
IG Link: https://www.instagram.com/nd_cotttoncandy/?hl=zh-tw