【校園】想成為您的治癒: 02. 猜一猜

「點呀？你仲未諗到係邊個呀？」張萱淇坐低喺邱茗然前面嘅座位，「晏啲仲有堂X1， 陣間再問下。」

「點諗啫，佢地咁準時落堂，佢又唔肯講我知佢係邊個⋯」邱茗然無奈地拎住手上嘅memo紙

呢個狀況維持咗一個星期，但邱茗然都唔知道到底佢係邊個，邱茗然嘅好奇心滿滿，但無奈嘅係對方唔肯輕易講出自己係邊個，Chem堂亦次次準時落堂

「唉⋯陣間上咩堂？」邱茗然邊講邊將memo紙對摺起收到筆袋，邊抬頭望向黑板，「X2⋯」

「中史堂⋯」張萱淇起身行番埋自己位，從櫃桶中拎出中史書，「又上中史啦⋯！」





邱茗然望住嘆氣嘅張萱淇，邱茗然從櫃桶拎出地理書，佢嘅X2係地理堂，而地理堂剛好係用E班嘅課室

「佢喺E班⋯E班有咩女仔呢⋯？」邱茗然將地理書放到枱上時沉思起嚟

⋯

「起立。」老師企喺老師枱前

「呀⋯」邱茗然喺起立嘅時候，手唔小心撞咗枱一下，書枱微微一晃，兩本書隨即係櫃桶跌出嚟，書打開跌喺地上





喺敬完禮坐低後，邱茗然彎腰打算將書執起，喺指尖要掂到書頁嘅時候，邱茗然一頓

「啲字咁熟口面嘅⋯」邱茗然伸手執起本書，望住書中嘅字跡

邱茗然將書先放到櫃桶，然後拎出放喺筆袋中嘅memo紙，將對摺嘅memo紙打開對一對字跡

「啲字有啲似⋯」邱茗然一臉疑惑，睇落去兩者嘅字跡幾乎一樣，「會唔會係佢⋯？但平時邊個坐呢個位⋯？」

邱茗然抬頭望一眼黑板同螢幕，眼見老師未整好螢幕，便低頭悄悄地掀到封面同封底，打算睇下有冇寫名





「殷書賢⋯」邱茗然見到喺另一本書嘅封面上寫咗書嘅主人嘅名，「殷書賢咪嗰個學霸⋯？」

邱茗然望住寫喺封面上嘅字嘅字跡，直覺已經有90%肯定，同佢喺memo紙上「傾計」嘅人係殷書賢

「但會唔會認錯人⋯？」邱茗然內心猶疑，「貼張紙問下佢？但如果唔係佢嘅話，佢一定會覺得有個怪人貼紙喺佢張枱度⋯」

邱茗然嘅內心喺度掙扎，佢想知道殷書賢係唔係就係當事人，但同時佢亦怕自己認錯人

「但字跡真係好90%似呀⋯」邱茗然將殷書賢嘅書放番入櫃桶，「我寫memo紙又不記名嘅，而且字跡真係好似，試一試都冇捐失⋯」

喺距離落堂仲有5分鐘嘅時候，邱茗然決定都係寫一張memo紙問一下

「字跡咁似，都好難唔係，雖然我都擔心唔係就太樣衰⋯」邱茗然拎出夾喺file中嘅黃色memo紙，然後喺上面寫下佢嘅提問：「幫我做咗數學題嘅神秘同學係唔係你？」

邱茗然將memo紙撕落嚟，然後將memo紙貼喺櫃桶最上面嘅書嘅封面上





「叮噹叮噹，叮噹叮噹～」落堂嘅鐘聲響起，喺lunch番嚟之後有一堂X1， 邱茗然有啲期待對方嘅回答

⋯

喺lunchtime完結嘅鐘聲就嚟響起時，殷書賢同另外幾個男仔一齊番到嚟課室；殷書賢行番埋位，將櫃桶嘅書拎出嚟，陣間上Chem堂，佢都要拎番Chem書然後等夠鐘再過去

「嗯？」放喺櫃桶嘅書一拎出嚟，殷書賢就留意到放喺最上面嘅Bio書，封面上貼住一張memo紙

殷書賢望住memo紙，然後從筆袋中拎出原子筆，喺memo紙上寫咗回答後，將memo將落嚟後貼喺Chem書入面

「叮噹叮噹，叮噹叮噹～」上堂嘅鐘聲響起，殷書賢同另外幾個同學行到C班嘅課室準備上堂

殷書賢坐低喺邱茗然嘅座位，然後將memo紙從Chem書裏撕落嚟，伸手入櫃桶就將memo貼到最面嘅書上





⋯

最後嘅兩堂係X1嘅堂，邱茗然同張萱淇一齊行出課室去上面一層上西史堂

喺放學嘅鐘聲響起嘅時候，西史堂今日意外地準時落堂，邱茗然同張萱淇番到嚟課室，一如既往嘅係Chem堂已經落堂

「咩都冇⋯？」邱茗然離遠已經見到自己嘅枱面空空如也，愕然嘅表情差啲放到面上

行到番埋位，企喺枱邊將西史書放喺枱上，佢張枱好乾淨，一張紙都冇貼喺度，本來喺上堂前放喺枱上嘅數學書都收起咗

「櫃桶⋯！」邱茗然下一秒蹲低喺櫈邊望向櫃桶，見到書面上有張淡黃色嘅紙，「有⋯！」

本來貼喺枱面嘅memo紙，對方喺回答後將memo紙貼咗喺數學書嘅封面書上後放到櫃桶裏

邱茗然一下子將數學書從櫃桶拉出，見到上面貼住嘅係自己喺地理堂時寫嘅memo紙，上面寫住對方嘅回覆：「:)」





「呢個微笑回覆⋯即係我估中啦⋯？」邱茗然無奈地笑着自言自語起嚟




IG Link: https://www.instagram.com/nd_cotttoncandy/?hl=zh-tw