【校園】想成為您的治癒: 04. 中六的煩惱

邱茗然一番到屋企就將書包掉低，沖個涼就灘喺床上小休

「呀⋯好攰呀⋯」邱茗然翻身將頭埋喺枕頭，一諗到晏啲就要溫書，佢就覺得好攰，「做高中生好攰呀⋯」

邱茗然坐起身行出廳，然後拉開櫈就坐低喺餐枱前，因為喺床上面灘咗太耐，灘到個人都有啲眼瞓有啲攰，加上番學上堂時大腦要高速運轉，消耗嘅精力都好多

「食飯。」「食飯⋯」

同大家叫食飯嘅聲音相比起，邱茗然嘅聲線一啲精神都冇，一臉疲倦地拎起筷子夾餸食





「茗然你今年考DSE啦⋯你洗唔洗去補習？」邱媽媽望一望邱茗然，出於關心地問道

「又嚟啦⋯」邱茗然嘅內心頓時疲倦地講道，然後乖巧地回答：「唔洗⋯」

「你唔同你個好朋友⋯淇淇一齊去補習？」邱媽媽又問道，完全冇留意到邱茗然一副唔情願嘅表情，「嚟緊考試，你自己知自己事啦！努力啲考間大學，唔洗要三大，邊間都得。」

「哦⋯」邱茗然耷低頭食飯，敷衍地答咗一聲，佢只想快啲結束呢個每星期嘅例行話題

「你唔好敷衍咗我就算，哥哥入到大學啦，你都要努力讀書知唔知呀？」邱媽媽又對邱茗然講道





「嗯⋯知道⋯」邱茗然食一啖白飯，用腳輕輕地踢咗邱旻顥一下示意邱旻顥快啲幫手結束話題

「佢知㗎啦，佢自己係想考大學嘅話佢會努力㗎啦⋯」邱旻顥收到邱茗然嘅求救信號，連忙開口講道

「茗然呀，你知自己要到咩成績啦！你喺學校嘅成績都喺中游嘅話出到去點同⋯」「嗯⋯」

邱茗然今次喺媽媽再講落去之前就先回答，今次邱媽媽終於發現邱茗然唔太多停留喺呢個話題，都唔再講落去

食完飯休息一陣之後，邱茗然默默地行番房坐喺書枱拎出書，反正後日同大後日都有小測





佢拎起筆，努力地將書中嘅內容溫習一次又一次，背咗一次又一次，理解咗一次又一次

「唉⋯」邱茗然望住書本嘅內容默默地嘆咗一口氣，輕輕地拍咗自己嘅額頭兩下，「如果我都可以好似佢咁次次考第一就好⋯」

邱茗然拎自己同第一名嘅學霸比較，雖然佢唔可能係殷書賢，但佢好想自己可以好似佢咁每次都考第一

「至少我媽就唔會日日都同我講要努力讀書呢啲完全冇鼓勵作用嘅嘢⋯」邱茗然伏低喺枱上

邱茗然嘅書上面用螢光筆同紅筆寫滿重點；為咗唔去補習，平日上堂都用200%嘅力專心上堂，因為只有專心上堂，溫書先可以事半功倍⋯

邱茗然一直坐喺書枱前溫書，既然自己冇人地咁叻咁聰明，咁就要下多啲苦功努力，先可以靠近自己嘅目標

「邱茗然你聽日唔洗番學咩？」早就灘咗喺上格床嘅邱旻顥問道

「要呀⋯」邱茗然嘅雙眼仍然望住課本，「但後日有測驗呀⋯」





「哦⋯溫書唔好溫到咁夜⋯」邱旻顥蓋好被就準備瞓覺，「你閂房燈開枱燈啦⋯我要瞓啦⋯聽日番8半堂⋯」

「哦⋯」邱茗然默默地開枱燈，將房燈閂上

喺安靜嘅房間裏，只剩下呼吸聲同書掀頁嘅聲音

「聽日教新一課⋯預習埋先瞓啦⋯」邱茗然抬頭望一眼交喺眼前嘅時鐘

邱茗然打開雞精書，螢光色嘅長形memo貼喺每一課嘅重點區，有啲課題都未教，因為呢本雞精書係佢哥哥邱旻顥考完DSE比佢

時針分針喺唔顯眼嘅滴答聲下慢慢走過，時間不知不覺到2點幾；邱茗然嘅雙眼都就嚟要合埋，感覺意識都開始迷迷糊糊

「唔得啦⋯要瞓啦真係⋯」邱茗然喃喃自語同時合上書，將書放入書包





⋯

「你著住長袖冷衫唔熱呀？我望到都覺得熱。」謝澤謙皺起眉頭，將殷書賢由上而下打量一次，「日日都著住長袖冷衫⋯」

「我又唔怕熱。」殷書賢低頭望一眼自己嘅冷衫，「慣咗。」

「唔怕熱都係啫⋯係真係打算一直stay喺課室唔出去？」謝澤謙無奈問道

「宜家我唔係出咗嚟同你一齊去買嘢食？」殷書賢望謝澤謙一眼

兩人喺C班嘅課室窗前經過，本來企喺locker前嘅張萱淇行到邱茗然前面嘅座位坐低

「琴晚嗰集真係好好睇！你有冇睇呀？」張萱淇邊行邊激動地問邱茗然，「男女主角就差少少⋯！就可以一齊啦～」

「有呀有呀！好期待下一集呀！」邱茗然聽到佢感興趣嘅話題連忙回答，「唔知下一集講咩呢⋯」





「不過，今日有冇咩測驗？」張萱淇問，「小息之後咩堂？」

「冇⋯係。」邱茗然猶疑諗一諗之後回答

喺回答張萱淇第二個問題前，邱茗然抬頭望向黑板，但寫時間表嘅地方空空如也，唯有睇自己貼喺schedule book入面嘅時間表

「中文，然後X1⋯Lunch之後係LS。」邱茗然雙手合十，將捧喺手上嘅schedule book合上

「死啦中文堂呀！」張萱淇忽然一臉慌張，邱茗然比張萱淇忽然一叫都搞到頭腦空白，「中文係唔係有背默？」

「係呀～」邱茗然一臉輕鬆地道，同張萱淇嘅慌張完全唔一樣，「你唔知咩？《師說》頭三段。」

「茗然呀！你點解唔提我呀！」張萱淇雙手捉住邱茗然嘅前臂，佢都要急死，「中文書中文書，我要快啲背先⋯！」





「我⋯以為你知嘛⋯而且你都冇問⋯！」邱茗然嘅目光隨住張萱淇企起身而動，無辜地望住張萱淇，「小息得番五分鐘咋喎⋯」

「背得一句得一句⋯！」張萱淇跑番自己位拎出中文書背課文

「你咁樣臨急抱佛腳真係有用咩⋯？」邱茗然回頭疑惑地望住努力中嘅張萱淇




IG Link: https://www.instagram.com/nd_cotttoncandy/?hl=zh-tw