【校園】想成為您的治癒: 03. 「 :) 」

「居然！？」張萱淇一臉震驚，「啲字咁靚，我仲以為係女仔⋯！」

「我冇估到嗰個人係殷書賢⋯」邱茗然嘅好奇心解開後，迎嚟嘅係一份意料之外嘅訝異

殷書賢，佢地級嘅學霸，上到高中後長期位於全級第一，幾乎冇考過第二，佢第一次考第二應該係中五下學期

「難怪解到條數學題⋯」邱茗然諗起數學題嘅正解，頓時覺得一啲都唔意外

「茗然，你行未呀？」 張萱淇閂上locker門，扣上鎖，「定你今日會留低喺圖書館？」





「唔⋯」邱茗然有啲猶疑不決，佢望向黑板，今日有幾份功課，但今日嘅佢有啲想番屋企，「算啦⋯我做完功課溫陣書先走⋯你今日去補習呀？」

「嗯，今日係補習嘅日子⋯」張萱淇聲線都係滿滿嘅疲倦，「如果唔係為咗考好成績，我先唔去補習⋯」

「我媽已經成日問住我同唔同你一齊去補習⋯」邱茗然輕嘆一口氣，「日日唔係DSE～DSE～咁提住我，就係「洗唔洗補習？」、「同唔同淇淇一齊補？」」

「你都唔洗補啦，你成績都keep得住。」張萱淇講道

「唉⋯我媽唔係咁諗呢～」邱茗然又嘆氣，「宜家我哥讀咗大學，我媽就集中火力喺我度⋯日日都提住，學校又提住，番到屋企都要聽住⋯」





「咁你都考到大學咪得囉～」張萱淇輕鬆地講道

「你就講得簡單⋯你估我講就考到㗎啦咩？」邱茗然無奈反白眼，「要考大學邊有想像中咁簡單⋯點可能係努力一下就考到？」

「努力多幾下囉～」張萱淇笑道，「努力多幾下咪得囉～」

「好啦，你係唔係走啦？」行到樓梯口時，邱茗然再問張萱淇

「係呀，今晚再傾啦～」張萱淇微微點頭轉身落樓梯，行咗兩步又回頭望邱茗然，對佢揮揮手，「拜拜～」





邱茗然上到圖書館，坐喺近窗邊嘅位置，背面係高高嘅書架，書架剛好擋住門口嘅位置，其他人推門入嚟嘅時候，唔會見到自習區

「做功課～」邱茗然喺心裏哼着歌，然後將書包放喺旁邊，拎出功課file同筆袋放到枱上

啱啱將功課簿打開，後方嘅遠處傳嚟開門聲，但邱茗然冇多理，拎出原子筆就低頭做功課

殷書賢孭住書包行入圖書館，行到窗邊靠牆嘅位置，喺坐低前佢同離佢有兩個位遠嘅邱茗然對望咗一眼殷書賢若無其事將視線移開，坐低就拎出功課，拎起筆就做功課

「殷書賢⋯？」邱茗然偷望殷書賢一眼，佢當然知道佢係殷書賢，全級第一、傳說中幾乎係文理雙全嘅學霸，邊個會唔識？

眼見殷書賢專心咁做緊功課，邱茗然都唔好意思打擾佢，佢都係默默低頭做功課，確定佢係唔係神秘嘅解數同學就之後先再算

喺過咗差唔多大半個鐘後，殷書賢將功課都做完，喺開始溫書前就睇一陣手機再溫書

「番到屋企再溫書，後日嘅補課有小測，聽日有默書，默書就溫咗⋯」殷書賢掀開佢用嚟寫功課嘅schedule book





邱茗然眼見殷書賢睇手機便打算把握機會同時間，喺一張全新嘅memo紙上寫「解數學題嘅神秘同學？」然後伸長手將memo貼喺殷書賢旁邊嘅位置

殷書賢眼尾餘光瞄到一張黃色紙貼喺旁邊，自然地朝memo紙望一眼

「唔會唔係佢呀嘛⋯」邱茗然安靜地觀察着殷書賢嘅反應，大腦思考緊對策，「如果唔係佢嘅話，咁我就話⋯我就話我認錯人啦⋯！」

殷書賢望到喺memo紙上有字後，下意識望一眼同佢相隔兩個位嘅邱茗然，眼見望一望佢又望一望貼喺枱上嘅memo紙，佢大概了解佢嘅意思，然後伸出右手將memo紙撕咗落嚟

殷書賢喺紙上快速地寫咗啲嘢，然後將紙貼番去近邱茗然嗰邊

「:)」邱茗然嘅目光落喺紙上，望住呢個微笑，邱茗然無言以對，但佢認得呢個「字跡」，肯定殷書賢就係嗰個神秘同學

邱茗然微微側着頭，目光朝殷書賢嘅方向望去，殷書賢察覺到邱茗然嘅視線，自然地抬頭頭望過去





「上次真係⋯」邱茗然細聲地開口想親自向殷書賢講多謝，畢竟人地幫佢解咗題，如果唔係佢諗爆頭都諗唔到

但邱茗然先啱啱開口，殷書賢提手，食指輕抵喺唇前，然後指一指貼喺佢旁邊嘅牆上嘅「請保持安靜」標示

「上次真係唔該你！！！」「唔洗，只係順手做咗」

喺邱茗然拎到memo紙見到殷書賢嘅回答後，覺得殷書賢有種明顯嘅沉默寡言，係唔願意開口講嘢嗰種，但當然都有機會係因為佢地唔熟

喺離5點半要離開學校嘅時間前，邱茗然喺走前去咗小食部一轉，打算買枝嘢飲再走；喺佢彎腰從飲品機拎出嘢飲時，佢偶然見到殷書賢孭住書包朝飲品機行嚟

邱茗然拎住盒裝飲品，行到飲品機旁邊插飲管先飲一啖；佢望住殷書賢行到飲品機前，但一直都冇買嘢飲

「差兩蚊添⋯」殷書賢望住手中嘅硬幣，佢微微探頭望一眼，見到邱茗然企喺離飲品機唔遠嘅地方，「但我同佢又唔熟⋯算啦，唔飲啦。」

殷書賢行離飲品機，放棄買盒嘢飲再番屋企嘅想法，選擇直接離開學校番屋企再算





「番到屋企有咩要溫⋯要背多次中文範文，要溫M2，有時間就溫埋過兩日嘅Chem test⋯」殷書賢邊行邊喺心中plan緊番到屋企後嘅「行程」，「今個學期，我唔可以再考第二。」

「等陣⋯！」一把聲音由遠處到殷書賢嘅身後，殷書賢一回頭，見到邱茗然行到佢身後停低落嚟，「請你飲㗎，多謝你上次幫我解咗題數學！拜拜～」

都未等殷書賢開口，邱茗然就對佢揮揮手從佢身旁以小跑嘅方式行離小食部；殷書賢望住手中嘅盒裝飲品，感覺邱茗然呢份謝禮太大




IG Link: https://www.instagram.com/nd_cotttoncandy/?hl=zh-tw