【校園】想成為您的治癒: 08. 提問
「呼⋯」殷書賢鼓起兩泡腮後呼一口氣，佢望住枱上嘅書，只覺得今日唔想再溫書，「唉⋯」
喺嘆一口氣之後，殷書賢都係伸手打開書，為下次嘅測驗做準備；對佢嚟講，每一次測驗係對自己嘅考核，係自己有努力溫習嘅證明，所以佢唔可以鬆懈
⋯
翌日一番到學校，殷書賢第一時間行上天台，直接行到琴日自己企嘅位置前
「鎅刀唔喺度⋯」殷書賢望住自己眼前嘅位置
殷書賢沿住矮牆前行一圈，邊行邊睇地下牆邊
「冇嘅⋯？唔會跌咗落去呀嘛⋯」殷書賢企喺矮牆邊探頭往下望，睇下樓下操場有冇白色鎅刀嘅身影，「冇⋯」
殷書賢有啲擔心佢嘅鎅刀會比人執到，有啲怕佢比人發現佢鎅手呢個秘密，自殘行為喺大家眼中係不被認可嘅事
「比人發現就死啦⋯」殷書賢喺心裏緊張地講道，宜家佢只係想快啲搵番佢嘅鎅刀，「唔通真係喺佢度⋯？」
殷書賢諗起最後喺天台見到邱茗然，佢擔心會唔會係邱茗然執咗佢嘅鎅刀，今日啱啱好有X1堂，係殷書賢可以問邱茗然嘅好時機
喺小息完結後嘅X1堂，殷書賢寫低一張memo紙比邱茗然：「我把鎅刀係唔係喺你度，琴日喺天台」
殷書賢將memo紙貼喺邱茗然嘅櫃桶裏，希望陣間邱茗然番到嚟之後會見到喺櫃桶嘅memo紙
殷書賢摸一摸褲袋，今日鎅刀唔喺佢褲袋入面，搞到佢特別唔自在，心入面一直記掛住佢嘅鎅刀
「殷書賢，出嚟黑板寫低你嘅答案。」阿sir企喺黑板前，食指喺黑板上輕敲兩下
殷書賢起身行出去，拎起白色粉筆喺黑板上寫低佢嘅答案，大家好自然咁停低答題嘅筆，將目光落喺黑板等待殷書賢寫下嘅答案
寫完答案後，殷書賢放低粉筆行番埋位，行咗兩步時回頭一望，見到自己寫喺黑板上嘅答案漏咗一句，連忙轉身行番去寫番
「你做咩今日都心不在焉咁⋯？」謝澤謙覺得今日嘅殷書賢好似怪怪地，喺殷書賢行番埋位嘅時候細聲咁問佢，「朝早行路又差啲跌親，早會又發呆，宜家連寫答案都寫漏嘢。」
「冇，可能有啲眼瞓啫⋯」殷書賢微微搖頭，佢唔係因為眼瞓，而係因為佢身邊嘅朋友都唔知佢鎅手嘅事，畢竟又唔係啲特別光彩嘅事
殷書賢瞄一眼櫃桶，佢有啲擔心邱茗然番到嚟之後見唔到張memo，更怕鎅刀唔喺邱茗然手上
「希望鎅刀喺佢度，佢見到之後會還番把鎅刀比我⋯」殷書賢喺心裏祈禱道
「哈啾！」上緊西史堂嘅邱茗然打咗個乞嗤
「你洗唔洗要紙巾呀？」張萱淇關心道
「唔洗⋯」邱茗然擺擺手，然後又打多咗個乞嗤，「哈啾！」
喺完咗X1之後，接住落嚟嘅堂邱茗然要番課室上堂，邱茗然一早就將下一堂嘅書放咗喺櫃桶，番到課室一拎本書出嚟，就見到貼喺LS書上面嘅memo紙
「把鎅刀真係佢㗎⋯？」邱茗然有啲意外，雖然都知十成有九成都係佢，但見到殷書賢咁樣問佢，佢都係有啲意外
邱茗然喺memo紙上寫低：「喺我度」但寫完之後邱茗然望向黑板嘅時間表
「今日冇X2堂⋯我要點樣話佢知⋯？」邱茗然無奈地嘆氣，「直接拎去比佢⋯？」
⋯
「最衰今日遲咗落堂，唔知佢走咗未⋯」邱茗然將殷書賢嘅鎅刀放喺裙袋，打算將鎅刀物歸完主，「淇淇，陪我去一去隔離班得唔得？」
「可以係可以⋯但去隔離班做咩呀？」張萱淇跟住邱茗然行出課室，行到E班嘅班房門口
邱茗然探頭望入課室，但見唔到殷書賢嘅身影，班上坐喺門口嘅女同學見到邱茗然，因為以前同過班都叫認識，所以佢見邱茗然好似想入嚟但又唔好意思時，便主動行出去
「你搵邊個呀？」女同學友善地問道
「呀，我想問殷書賢喺唔喺度⋯？」邱落然問道
「殷書賢？」女同學聽到後回頭望一眼課室，望向殷書賢嘅座位，「佢可能出咗去食飯喎⋯你有事搵佢呀？」
「係呀⋯不過佢唔喺度就算啦，唔該。」邱茗然禮貌地點點頭，然後尷尬咁拉住張萱淇走
「你搵殷書賢做咩呀？」張萱淇好奇地問道
「有嘢還番比佢啫⋯」邱茗然聳肩，但唔講要還啲咩，免得張萱淇呢個活喺電視劇世界嘅人自己幻想太多，「唔緊要啦，我之後再還啦⋯」
「哦⋯」張萱淇微微點頭亦冇諗太多，不過張萱淇就諗起另一樣嘢，「食完飯番嚟，陪我去圖書館還書呀～」
「哦好⋯你借咗書咩？」邱茗然有啲疑惑，佢成日同張萱淇一齊都冇見過張萱淇借書
「係呀～上次咁啱喺圖書館睇到一本未睇完，所以先借走咋嘛～」張萱淇講道
「咁食完飯再番嚟還啦～」邱茗然笑一笑
⋯
「茗然，呢兩本書幫我擺番上書架得唔得？喺後面嗰個架嗰度。」張萱淇細聲地問邱茗然，然後將兩本小說遞比邱茗然，「另外呢兩本我自己擺就得。」
「哦好呀。」邱茗然接過兩本書，然後行到中間嘅書架
邱茗然望一望貼喺書脊上嘅編號後抬頭望向書架，書要跟住編號排，唔可以隨便插上架就算
「喺嗰度⋯」邱茗然望住第五層嘅書嘅編號，呢兩本書都係喺嗰度拎
邱茗然踮起腳尖，將兩本書嘅書底靠喺層板邊沿，將兩本書嘅一角先插入去放喺架上嘅兩本書之間嘅空隙
「有啲⋯高⋯！」邱茗然喺心裏無奈地講道，佢嘅左手扶住第四層嘅層板，用盡力氣踮起腳尖將成個人托高，「呀？」
IG Link: https://www.instagram.com/nd_cotttoncandy/?hl=zh-tw