【校園】想成為您的治癒: 09. 隱藏的事
喺邱茗然仍然努力地將兩本書放回原位時，兩本書忽然「自動歸位」，按住編號順利地插入前後嘅編號嘅書之間
邱茗然沿住幫佢將書推入書架嘅手望去，對方身上著住藍色嘅長袖冷衫；喺目光移動嘅時候，眼睛嘅餘留意到對方嘅左手拎住一本past paper
「唔、唔該⋯」邱茗然出於禮貌講道，佢望到殷書賢嘅時候有少少意外，佢冇諗到會喺呢度見到殷書賢
「唔洗。」殷書賢緩緩地開口回答道，佢嘅語氣雖然整體嚟講仍然係比人一種冷漠嘅感覺，但至少今次呢個「唔洗」係有一絲柔和夾雜其中
今次係邱茗然第一次聽到殷書賢講嘢嘅聲線，因為兩人之前一直都冇同過班，所以邱茗然一直都唔知道殷書賢把聲係點樣，之前memo紙嚟溝通就更加唔可能知道佢把聲
邱茗然望住殷書賢嘅時候，大腦唯一一樣可以諗到關於佢嘅，就係佢係全級第一同埋係嗰日喺天台佢留低咗嘅一把鎅刀
「唔洗。」殷書賢見邱茗然直勾勾地望住自己，緩緩開口道，一秒後又遲疑地開口：「你有冇睇到memo⋯？」
「哦有呀⋯！」邱茗然猛然醒起自己要搵殷書賢嘅原因，連忙從裙袋拎出鎅刀，「鎅刀⋯」
「唔該。」殷書賢即刻伸手拎，鎅刀一到手，連忙收番入褲袋
喺殷書賢伸手嘅一刻，左邊衫袖微微被扯上去，露出咗少少手腕
就喺呢刻，邱茗然就無意間瞄到殷書賢嘅手，見到喺手腕上幾條好幼、已經淡色嘅痕跡
殷書賢留意到邱茗然嘅目光，連忙拉一拉冷衫嘅衫袖，將衫袖拉到蓋到手腕嘅位置
「佢應該睇唔到⋯」殷書賢嘅內心慌張咗一秒，但見邱茗然冇咩反應，咁應該佢睇唔到
「嗰日喺天台⋯」邱茗然鬼使神差地提起嗰日喺天台嘅事，瞄一眼殷書賢嘅手後，思緒好似跟住佢望到嘅嘢行一樣，「你隻手⋯」
殷書賢忽然覺得有啲口乾嘅，喉核隨即微微一動，佢本來想當冇事一樣問邱茗然想講咩，但說話到嘴邊就講唔出口，下意識移開視線微微低頭拉一下衫袖
兩個人企喺原地，氣氛突然有啲尷尬；殷書賢聽到邱茗然問起佢隻手嘅時候，心臟緊張地噗噗跳
「茗然？」張萱淇見邱茗然咁耐都未番嚟搵佢，便主動地行去邱茗然所在着位置搵佢
張萱淇見到邱茗然同殷書賢企埋一齊，兩個人好似講緊嘢一樣，張萱淇心入面覺得有啲意外
「你搞掂啦？」邱茗然聽到張萱淇嘅聲音便回頭望，見到正朝自己行近嘅張萱淇
「你擺本書都擺咁耐⋯差啲就以為你比個書櫃食咗啦～」張萱淇開玩笑道
邱茗然無奈地笑，張萱淇拉住邱茗然離開，邱茗然行走嘅時候，回頭望咗殷書賢一眼，殷書賢打開手上嘅past paper睇
「佢手上面嘅傷，係唔係因為佢鎅手⋯？」邱茗然瞬間就估到傷痕嘅來源
「啱啱你地講咩呀？」張萱淇一踏出圖書館就忍唔住問
「冇講咩呀～」邱茗然搖搖頭
「明明見到你兩個企埋一齊仲話冇⋯係唔係宜家有好嘢都唔同我分享啦？」張萱淇不滿地問道，「我地咁friend你都唔同我講？」
「咁真係冇講啲咩呀嘛～」邱茗然一臉無辜，佢即刻伸手挽住張萱淇嘅手臂，「我似啲有秘密唔同你講嘅人咩～」
「好啦～信你啦～」張萱淇見邱茗然示好，佢即刻露出笑容，「我地係好朋友嘛～」
「係係～」邱茗然笑着點頭，「我最好嘅朋友咪你囉～有嘢一定同你講嘅～」
「我地將來讀大學都要成日約出嚟見㗎！你唔好因為識咗新朋友就唔記得我⋯」張萱淇扁起嘴，佢擔心將來上到大學之後，因為唔同科、識咗其他朋友之後，邱茗然會同佢冇咁friend咁close
「你先係呀！我一定一定會成日約你！」邱茗然堅定地講道
佢同張萱淇由中三開始先熟，因為同班又成日喺同一組做group project，所以變得愈嚟愈熟，慢慢開始講心事，然後就變成好朋友成日糖黐豆咁
「淇淇，今日Miss Li係唔係話要報陸運會項目？」邱茗然突然記起今朝早班主任提佢地要報項目
「係呀，你報咩呀？我跟你一齊呀～」張萱淇興致勃勃咁捉住邱茗然嘅手，「你係唔係跑100米呀？」
「是旦啦，之前都報開100米，咁今年都一樣啦～」邱茗然聳肩，佢對於要報咩項目都冇所謂，100米已經係唔算辛苦嘅項目
「咁我都報100啦～」張萱淇即刻都決定好比賽項目
「就打鐘啦，要番去啦！」邱茗然拉住張萱淇急步落樓梯
⋯
「嘖⋯記唔到⋯」殷書賢眉頭深鎖，提手拍自己嘅額頭兩下，大腦都記唔到嘢一樣嘅感覺令佢嘅內心好崩潰
琴日就已經將功課做好嘅佢，今日選擇用嚟溫書，要喺之後嘅考試都有好嘅發揮嘅話，咁一定要打好基礎
「唉⋯」殷書賢嘆一口氣，雙眼定睛地望住筆記發呆
殷書賢特別討厭呢種大腦Hang機嘅感覺，因為會令佢好無助，一旦開始溫書，佢根本就冇辦法令自己停落嚟唔溫書去休息
「一休息嘅話，成績就會跟唔上⋯測驗會考得唔好，測驗唔好即係我冇好好咁消化內容，考試就會考得唔好⋯其他人會唔會對我好失望⋯？」
只要一停落嚟，呢種想法即刻就會喺殷書賢嘅大腦浮現，感覺特別唔舒服
殷書賢起身行出課室，打算喺學校散個步行下放鬆，但卻一直忍唔住一樣喃喃自語，口講緊嘅都係要背要記嘅內容⋯
邱茗然將天台門「咔」一聲推開，一踏出門框就見到殷書賢嘅身影，佢同上次一樣企喺矮牆前望住前面一棵大樹
IG Link: https://www.instagram.com/nd_cotttoncandy/?hl=zh-tw