【校園】想成為您的治癒: 11. 擔心
「嘻⋯」李雨揚低頭望住手機，忽然低聲一笑，然後send咗個message出去
張萱淇聽到李雨揚嘅笑聲，下意識望向佢，然後偷瞄佢嘅手機一眼
「又係女又係女⋯」張萱淇喺收回視線嘅時候悄悄地反一下白眼
「咁早到嘅你地～」一個女仔行入嚟，經過李雨揚同張萱淇面前道，然後行到李雨揚旁邊嘅座位坐低
「你遲啫～」李雨揚自然地回答，目光落喺放喺女仔手邊啱啱買嘅奶蓋紅茶，「又自私飲～」
「略略略～冇你份呀李雨揚～」著住校服嘅少女飲一啖奶蓋紅茶後對李雨揚調皮地吐舌
張萱淇望一望李雨揚，心入面有啲無奈，都唔知呢個人係嚟補習定識女仔
「你做咩唔講嘢嘅？」李雨揚察覺到張萱淇嘅安靜，望向佢嘅同時微微向佢嘅方向靠，「咁靜嘅你？」
「聽緊佢講嘢。」張萱淇輕皺着眉頭指一指螢幕，瞄李雨揚一眼，伸手捉住李雨揚手中嘅筆，「你唔聽書嘅話比番枝筆我，免得你唔還。」
「咩呀，我聽呀！」李雨揚推開張萱淇嘅手，「枝筆就借比我先啦～最後一定還！」
「係一定要還囉！枝筆好好寫㗎。」張萱淇收番手，雖然唔係佢平時用開嘅筆，但呢枝筆一定放喺佢筆袋入面
一直用開嘅慣用筆係佢嘅「戰友」，陪佢做過大大小小嘅測驗考試，雖然筆芯一直換，但筆殼始終如一，由中四開始陪伴佢
「得啦得啦～」李雨揚提手比個Okay
天色剛好暗起嚟，時間嚟到時7點鐘，補習堂都結束了，張萱淇執好嘢準備走，企起身孭書包就行
「李雨揚你行未呀？」張萱淇順口地問李雨揚一句，因為兩人番屋企嘅方向一樣
「我仲有嘢做就唔番去住。」李雨揚搖搖頭
「哦，咁⋯我行先啦。」張萱淇遲疑地點頭，然後孭住書包朝門口行去
張萱淇行到門口，喺真正踏出一步離開課室之際回頭望一眼，沉思兩秒後行出課室
⋯
「今日lunch之前要報名啦，sport day項目每個人都要報呀！」Miss Li拎起自己嘅教科書，喺行出課室去其他班上堂前提醒道，「唔好要人追你地報呀！」
「呵～欠⋯」邱茗然掩住嘴打咗個喊露，用手抹走喺眼眶嘅眼水，「好眼瞓⋯」
邱茗然托住腮，雙眼放空，面上一啲表情都冇
新嘅一日啱啱先開始，但邱茗然已經覺得眼瞓想番屋企，可能呢個係所有學生嘅通病，番學想放學，上堂想食飯，臨瞓前想聽日係假期
「好想瞓呀⋯點解今日會咁攰⋯？係唔係因為今日係星期三⋯？」邱茗然稍微回神後喺心裏道，「星期三都唔係啲咩好日子⋯」
上完頭兩堂之後係小息，邱茗然行到去張萱淇嘅座位旁，張萱淇仲做緊改正；張萱淇眼尾瞄到邱茗然喺佢隔離，隨即抬頭望佢，微微側一側頭
「去唔去toilet呀？」邱茗然問張萱淇，「我想去toilet⋯」
「哦好呀，我同你一齊去呀～」張萱淇點點頭企起身
兩個女仔一齊行出課室，喺經過E班嘅課室時，邱茗然偶然望入面一眼，視線自然地落喺殷書賢嘅身上：殷書賢坐喺位安靜地做功課
不過其實都唔止殷書賢一個係咁樣，因為呢個似乎係E班嘅常態，班上有好多人都係咁樣利用小息同lunch呢啲時間做功課溫書，所以話成績好唔係好彩嘅事
「殷書賢，你係唔係做咗數A份改正？借嚟睇下～」張思群拎住數A簿走向殷書賢
「哦係呀⋯」殷書賢嘅視線從chem嘅功課上移開，抬頭望向張思群
喺佢抬頭望張思群之際，眼睛嘅餘光見到邱茗然喺外面行過，一見到邱茗然，殷書賢就不自覺地拉一拉長袖冷衫嘅衫袖
「A簿呀⋯」張思群望住一副若有所思嘅殷書賢無奈地提醒，「你發咩呆⋯？」
張思群望向走廊嘅方向，好快又擰番過嚟望殷書賢，殷書賢當冇事發生過一樣自然咁喺櫃桶拎A簿遞比張思群
「轉頭比番你～」張思群接過A簿就番埋位，殷書賢拉一拉衫袖後默默耷低頭繼續做功課
張思群坐喺位打開數A簿，搵到自己要改嘅一題，見到殷書賢嘅題目係啱嘅之後，直接就將答案照抄去自己嘅數A
張萱淇同邱茗然一齊行入廁所，兩人各自行入廁格，去完廁所後喺洗手盆前邊整理儀容邊等對方搞掂；等緊邱茗然嘅張萱淇右手拎住手機睇IG，左手摸住自己嘅馬尾
「你去唔去補習，後日」張萱淇望住李雨揚喺10分鐘前send比佢嘅message
「去呀，做咩咁問」張萱淇笑了笑回覆道，「你唔去咩」
「我只係突然想問你後日去唔去補習」李雨揚好快就回覆張萱淇嘅message
「咁突然諗起我呀⋯」張萱淇嘅回覆係表達緊佢嘅無奈，但臉上卻掛住連佢自己都冇察覺到嘅微笑
「補習成日都見住你㗎啦～」「我唔想㗎，只係咁啱同你補同一日」
「唔好咁衰啦，幾時約食飯？」「唔知呀，睇下點先啦」
「哦⋯同邊個食飯呀～」邱茗然安靜地企喺張萱淇嘅身後偷睇張萱淇嘅對話
「嘩！？你幾時喺我後面㗎！？」張萱淇比邱茗然嚇咗要跳，膊頭一縮，雙手拎佳手機向自己胸口靠，「行路冇聲嘅你⋯」
「同邊個傾計咁開心呀～」邱茗然八卦地輕撞張萱淇一下，瞄一眼張萱淇嘅手機，「你嘅意中人呀～」
IG Link: https://www.instagram.com/nd_cotttoncandy/?hl=zh-tw