【校園】想成為您的治癒: 10. 他的秘密
「佢又喺度嘅⋯」邱茗然喺心裏道，手將天台嘅門閂上
邱茗然拎出手機，想覆張萱淇嘅message，但又忍唔住好奇殷書賢做緊咩
殷書賢冇聽到門閂上嘅聲音，深吸一口氣，右手嘅前臂垂直放喺矮牆上，左手以水平嘅方式凌空着，右手捉住左手嘅手腕；本來企得畢直嘅殷書賢喺向後踏咗一小步後彎下腰，將額頭靠喺左手嘅前臂上
「佢喺度做緊啲咩⋯？」邱茗然對於殷書賢嘅個令人疑惑嘅動作感到奇怪又好奇
邱茗然悄悄地邁步走向低着頭嘅殷書賢，與此同時，殷書賢抬起頭鬆開右手，將本來朝住右手手心嘅左手手腕朝自己嘅方向一翻
「唉⋯」殷書賢輕嘆一口氣後，又默默地用右手捉住左手嘅手腕，雖然話係嚟休息，但口中仍然低聲地唸唸有詞，背緊書、記緊內容
「唔⋯」邱茗然遲行到去殷書賢嘅身旁後疑地開口，喺同殷書賢相隔咗三步嘅距離從裙袋拎出一包紙巾遞比殷書賢，「你⋯要唔要tissue⋯？」
「唔、唔洗⋯！」殷書賢比突然出現嘅邱茗然嚇一跳，都顧唔上滲緊血嘅手，直接就將衫袖拉番落嚟
「但你隻手流血⋯」邱茗然望住殷書賢嘅手，腦海幻想到冷衫嘅毛線同傷口嘅磨擦，忽然間覺得自己隻手都好痕好痛，「冷衫會有血跡⋯」
邱茗然抽咗張紙巾遞比殷書賢，殷書賢不信任嘅表情寫喺臉上，佢輕皺起眉頭望一眼紙巾，又望邱茗然一眼
邱茗然拎住嘅手向上提一下，殷書賢先半信半疑咁伸手接過紙巾，然後細聲地道：「唔該⋯」
殷書賢小心咁將衫袖拉起，將手上嘅血跡抹走，兩人之間仍然係三步之遙；邱茗然扮不經意定睛望住殷書賢隻手，殷書賢前臂上一道又一道微微凸起、淡淡嘅疤痕
前臂上一道一道淺淺嘅疤痕⋯愈近手肘嘅位置疤痕愈疏，愈近手腕嘅位置愈密⋯
「之前覺得好奇怪，佢點解日日都著住長袖冷衫⋯」邱茗然早就留意到殷書賢嘅冷衫不離身，「原來⋯」
邱茗然今次親眼睇到令殷書賢著住長䄂冷衫嘅原因，佢冇表面上冇太大反應，但心入面係震驚
殷書賢拎開紙巾望住啱啱鎅出嚟嘅傷口，見到冇再滲血後默默地將紙巾揉成一團，然後拎起放喺矮牆上嘅鎅刀用紙巾抹一抹刀片後，將刀片收回，拉開咗將鎅刀嘅鎖定扣，將鎅刀放回褲袋，所有步驟都係如此熟練⋯
「好熟手⋯」邱茗然默默地留意住殷書賢嘅舉動
喺將血抹乾淨後，殷書賢將衫袖拉番落嚟，偷瞄邱茗然一眼，心入面有啲不安，無論用咩姿勢企都覺得唔自在
「你⋯唔好同人講⋯」殷書賢緩緩開口，以請求嘅語氣對邱茗然道
「呀？」邱茗然望殷書賢，邱茗然嘅大腦都未反應得切，答完先開始諗番啱啱殷書賢同佢講咗啲咩，「哦，我好口密㗎！」
邱茗然望一望殷書賢，正想開口講啲咩嘅時候，裙袋裏嘅手機就震起嚟
「淇淇？做咩呀？」邱茗然接電話嘅同時輕輕推矮牆一下，借力令自己轉身，「嗯，仲喺學校⋯係呀～你要呀？」
殷書賢企喺原地，邱茗然伸手朝殷書賢尷尬地揮一揮手，用口型道：「拜拜～」
殷書賢望住邱茗然離開嘅身影，聽到天台嘅鐵門閂嘅聲音嘅佢，不禁鬆一口氣
「佢真係唔會同人講掛⋯」殷書賢嘅內心嘅不安感又開始躁動起嚟，一諗到自己嘅秘密有機會比人知道，佢就覺得好不安
應該話，一諗到呢個有多一個人知嘅秘密好快就會變成有好多個「多一個人」知嘅狀況，殷書賢就覺得好頭痛
「你番到屋企之後send比我呀～Thanks～」張萱淇講出請求，語速都特別快，「今晚我放補習之後再講啦！」
張萱淇一講完即刻就收線，邱茗然企喺樓梯，無言地望住被掛斷嘅電話，然後嘆一口氣後邁步行
「唉～番屋企啦我都～」邱茗然行入課室，將枱上嘅嘢收拾好放入書包，孭起書包就番屋企
邱茗然行到出去學校門口，回頭望一眼學校嘅校舍，微微抬起頭朝學校嘅天台望去，冇太多嘅想法就轉身離開
企喺天台嘅殷書賢帶着少許嘅苦惱轉身離開
⋯
過咗大半個鐘之後，補緊習嘅張萱淇終於收到邱茗然send比佢嘅嘢
「send比你啦，諗下點報答我啦～」張萱淇拎起手機放喺枱底睇，見到係邱茗然send嘅message
「我將就下，以身相許啦就」張萱淇笑着回覆
「咁將就呀？咁你咪冇得識男朋友！？」
「朋友先係一世㗎嘛！我似啲有男朋友就唔要朋友嘅人咩？」張萱淇回覆
「喂，張萱淇，你有冇多枝筆？」坐喺張萱淇隔離嘅男仔用手肘撞佢一下後細聲地問
張萱淇抬起頭將手機螢幕鎖上，望一眼坐喺佢隔離嘅人
「嘖⋯邊有人補習唔帶筆㗎⋯？」張萱淇皺起眉頭，雖然用不滿嘅語氣講，但手都係伸入筆袋中拎咗枝藍筆比佢，「你上次補習借咗我枝藍筆都未還呀李雨揚！」
「下次還番比你，我貪你枝筆做咩？」李雨揚接過張萱淇遞比佢嘅藍筆，「我又唔係冇錢買筆。」
「我點知你，你借咗我好多枝筆都冇還就真⋯！」張萱淇輕力打一下李雨揚嘅膊頭
「下次一次過還囉！」李雨揚托住下巴講道
張萱淇收拾心情，聽住補習阿sir講嘅內容，然後喺補習社派嘅筆記上用紅筆抄低解釋、用螢光筆間低重點
IG Link: https://www.instagram.com/nd_cotttoncandy/?hl=zh-tw