【校園】想成為您的治癒: 13. 逃避話題

「愛情嘅嘢隨緣啦～嗰個補習同學都幾好呀～」邱茗然笑道

「唔好囉！佢成日周圍識女仔，我先唔要！」張萱淇聽到就已經耍手擰頭，「你係唔係上去圖書館呀？」

「係呀，咁我上去啦～聽日見～」邱茗然踏上梯級，張萱淇則落樓梯，兩人隔住中間嘅扶手欄杆講拜拜

邱茗然踩住輕快嘅步伐上樓梯，去到圖書館之後，邱茗然揀咗窗邊對住大街嘅位置坐低

「做功課先～」邱茗然打開書包，拎出功課同筆袋放喺枱上，「做咗⋯默書改正先啦～」





邱茗然喺低頭做功課嘅時候，除咗聽到冷氣機發出嘅機器聲之外，忽然間聽到有腳步聲喺佢身後經過；邱茗然坐好個人，自然就回頭望，見到殷書賢孭坐書包喺佢身後行過

殷書賢由邱茗然右邊行到左邊，喺經過咗邱茗然嘅背後行到邱茗然嘅左邊時，殷書賢望咗邱茗然一眼之後，從褲袋中拎咗張對摺成一個小正方形嘅memo紙放喺離邱茗然嘅手有一隻手位嘅位置上

「Memo紙⋯？」邱茗然嘅目光落喺淡黃色嘅memo紙上，拎起memo喺打開前望一眼行到離佢兩個位遠坐低嘅殷書賢

殷書賢同平日一樣坐喺靠嘅位置，拎出功課，將筆袋放喺前面，喺開始做功課同溫書前戴上眼鏡，拉一拉長袖冷衫嘅衫袖同衫腳

邱茗然打開memo紙，見到殷書賢以工整嘅字體寫下嘅回答：「跳高，所以你真係冇同人講？」





「做咩唔信我⋯？」邱茗然喺心入面無奈地講道，然後喺殷書賢嘅回答下又寫：「冇呀，我好口密好唔好」

邱茗然四周張望，見到附近都冇人經過之後，將摺成小方形嘅memo紙朝殷書賢嘅方向輕輕一拋，memo紙「噠」一聲落喺殷書賢嘅手邊，邱茗然頓時低頭繼續做功課

殷書賢眼睛嘅餘光瞄到喺佢隔離嘅memo紙，佢望一眼邱茗然後先伸手去拎，將memo紙拎到自己面前打開

「噠。」細聲嘅一聲，memo紙又番到去邱茗然嘅手邊

「居然會掉番過嚟⋯！？」邱茗然望到memo紙嘅時候，內心係驚訝嘅，佢打開memo睇下殷書賢今次寫咗咩比佢：「你報咗咩項目」





邱茗然更意外，殷書賢居然會問佢報咗啲咩項目，當然，邱茗然都知道殷書賢係禮貌咁禮尚往來

「100米，你仲有冇報其他」「班際4X400」

「我淨係報咗一個項目，都冇報其他」「冇咩所謂，都係用嚟Hea下」

「你讀咩科？」「Chem，Bio，M2」

「都係啲好有前途⋯嘅科⋯？」邱茗然喺心裏讚嘆道，「都係嘅⋯佢一睇就知係啲好有前途嘅人⋯」

「次次都考第一好勁」「努力嘅成果，你讀咩科」

「地理同西史⋯理科唔太好⋯」「做多啲題」

兩個人一來一回咁喺memo紙上傾幾句，再講多兩句之後，邱茗然覺得一直打擾殷書賢唔太好就冇再掉memo比佢，而且佢自己都要溫書





「讀書叻真係好⋯出路都好似多過人咁⋯」邱茗然喺心入面慨嘆，佢都想自己叻啲出色啲

伴隨住心入面嘅一聲慨嘆，邱茗然伏低喺枱上，忽然間有重無力感湧上心頭⋯

殷書賢喺離開時間到前嘅十五分鐘開始執嘢，然後孭起書包走

「好攰⋯」邱茗然伸手揉眼，「都差唔多番屋企啦⋯！」

邱茗然執好嘢起身，自然地朝牆邊嘅位置望咗一眼，見到成個位都已經空空如也

「佢走咗啦⋯？幾時走㗎⋯」邱茗然都冇留意到殷書賢已經走咗，啱啱一直掛住溫書都冇留意，「仲有五分鐘打鐘，不過我就先一步番屋企啦～」

⋯





夜晚

「哥哥呢？唔等埋哥哥呀？」邱茗然見爸爸媽媽已經準備開飯便問，「定哥哥唔番嚟食？」

「哥哥約咗人，話晏啲先番嚟。」媽媽拎起筷子夾餸到碗中

「哦，好啦～」邱茗然笑一笑，忽然間就有啲想食雪糕，但佢又唔太想自己落街買，即刻就諗起有人或者可以順便買比佢，即刻拎起手機send message比邱旻顥：「哥哥！！！我想食雪糕，唔知你番嚟嘅時候會唔會可以順便買呢～」

邱茗然雖然係問「可唔可以」但佢都幾肯定，邱旻顥一定會買比佢

「食飯仲睇手機，專心食飯啦，成日機不離手⋯」媽媽眼見邱茗拎手上拎住手機便抱怨起嚟，「又唔見你手上拎住啲書嚟睇？」

「唉⋯又嚟啦又嚟啦⋯」邱茗然喺心裏無奈地講道，媽媽成日都咁樣講住，佢早道聽到煩聽到厭，但又唔可以反駁，「唔出聲算啦⋯一出聲答佢，佢又有機會繼續講呢個話題⋯」

邱茗然默默地將手機放低安靜地食飯，佢都唔明白，點解只係食個飯都可以拉到同讀書有關嘅嘢，明明只係食飯，點解會同讀書扯得上關係？





「茗然，你幾時要報大學呀？」媽媽見邱茗然唔出聲又問道

「唔知，就啦應該⋯」邱茗然喺心入面嘆氣，但都係乖乖地回答

「唔知？你上心啲啦⋯！諗好報咩科未？」媽媽見邱茗然一問三不知咁就忍唔住皺起眉頭，「你宜家呢個成績，夠唔夠分入呀？」

「知啦⋯我自己知㗎啦～」邱茗然想結束呢個話題，以一個乖巧嘅微笑回答，心入面攰到笑唔出

邱媽媽喺食完飯坐喺梳化睇電視時忽然心血來潮提醒邱茗然：「邱茗然你呀，今年同我生生性性好好讀書呀！」

「知啦⋯」坐喺餐枱前邊食生果邊睇手機嘅邱茗然抬頭望向媽媽，唔敢以帶着半點唔耐煩嘅聲線回答

不過，邱茗然早就聽慣咗媽媽嘅關心，但聽得多都覺得疲倦








IG Link: https://www.instagram.com/nd_cotttoncandy/?hl=zh-tw